ഖത്തർ വിളിക്കുന്നു പെരുന്നാൾ ആഘോഷത്തിന്​

ബലി പെരുന്നാൾ ആഘോഷ ഭാഗമായി വൈവിധ്യമാർന്ന പരിപാടികൾ സംഘടിപ്പിച്ച്​ ഖത്തർ സഞ്ചാരികളെ മാടിവിളിക്കുന്നു. പെരുന്നാൾ ആഘോഷത്തിന്​ പൊലിമയേകാൻ വൈവിധ്യമാർന്ന പരിപാടികളാണ്​ ഖത്തറിൽ സംഘടിപ്പിക്കുന്നത്​. ഖത്തർ ടൂറിസം ജൂൺ 18, 19 തീയതികളിൽ ഖത്തർ നാഷനൽ കൺവെൻഷൻ സെന്‍ററിലെ അൽ മയാസ തിയറ്ററിൽ ‘ലൈലത്ത് അൽസമാൻ അൽജമീൽ’, ‘സിക്ര റിമെയ്ൻസ്’ എന്നീ രണ്ട് സംഗീത പരിപാടികൾ സംഘടിപ്പിക്കുന്നുണ്ട്​. 18ന് നടക്കുന്ന ‘സിക്ര റിമെയ്ൻസ്’ അന്തരിച്ച കലാകാരൻ തിക്രക്കുള്ള ആദരമാകും. അസ്മ ലംനവർ, ഉമൈമ താലിബ്​ തുടങ്ങി പ്രമുഖ കലാകാരന്മാർ ഈ പരിപാടിയിൽ അണിനിരക്കും. 19ന്​ നടക്കുന്ന ‘ലൈലത്ത് അൽസമാൻ അൽജമീൽ’ ആഘോഷത്തിൽ മെയ് ഫാറൂക്കിന്‍റെയും റിഹാം അബ്ദുൽ ഹക്കീമിന്‍റെയും സംഗീത പരിപാടികളുണ്ടാകും. ദോഹയിലെ പ്രശസ്തമായ കുതിരസവാരി കേന്ദ്രമായ അൽ ഷഖാബ് പെരുന്നാളിനോടനുബന്ധിച്ച്​ മൂന്നുദിവസത്തെ ഗംഭീരമായ ആഘോഷം സംഘടിപ്പിക്കുന്നു​. ജൂൺ 18 മുതൽ 20 വരെ വൈകുന്നേരം നാലുമുതൽ എട്ടുവരെ ലോംഗൈൻസ്​ ഇൻഡോർ അരീനയിലാണ് ​​പരിപാടി. കുട്ടികൾക്കും കുടുംബങ്ങൾക്കും ആസ്വാദ്യകരമായ വിവിധ വിനോദ പരിപാടികൾ, കലാപരിപാടികൾ എന്നിവയുമുണ്ടാകും. കുട്ടികൾക്ക്​ സർഗാത്​മക അനുഭവം പകരുന്ന വർക്​ ഷോപ്പുകൾ, കരകൗശല വസ്തുക്കളുടെ പ്രദർശനവും നിർമാണ പരിശീലനവും, പരമ്പരാഗത മൈലാഞ്ചി ഡിസൈനുകൾ, ബൗൺസി കാസിൽ, ഭക്ഷ്യമേള എന്നിവയുമുണ്ടാകും. അതോടൊപ്പം കുതിര സവാരി, അമ്പെയ്ത്ത്, അറേബ്യൻ കുതിരകളുടെ പ്രദർശനം തുടങ്ങിയവക്കും അവസരം ലഭിക്കും. കുട്ടികൾക്ക്​ കളിപ്പാട്ടങ്ങളും മറ്റു സമ്മാനങ്ങളും നൽകും. മുതിർന്നവർക്കായും വിവിധ മത്സര പരിപാടികളുണ്ട്​.

എല്ലാ വർഷവും അൽ ഷഖാബിൽ വൈവിധ്യമാർന്ന പരിപാടികൾ സംഘടിപ്പിക്കാറുണ്ട്​. ഖത്തറിന്‍റെ ചരിത്രവും പൈതൃകവും വിവരിക്കുന്ന എക്സ്​പോയും പരിപാടിയുടെ ഭാഗമാണ്​. 980,000 ചതുരശ്ര മീറ്റർ വിസ്തൃതിയുള്ള അൽ ഷഖാബിന്‍റെ ആകർഷണീയമായ സൗകര്യങ്ങൾ ഒരു കുതിരപ്പടയുടെ രൂപത്തിൽ സവിശേഷമായി രൂപകൽപന ചെയ്തതാണ്​. 10,000 കാണികളെ ഉൾക്കൊള്ളാൻ ശേഷിയുള്ള ഇൻഡോർ, ഔട്ട്ഡോർ വേദി ഉൾക്കൊള്ളുന്ന അത്യാധുനിക മെയിൻ അരീനയിൽ അന്താരാഷ്ട്ര കുതിരപ്പന്തയവും മറ്റു കായിക മേളകളും നടക്കാറുണ്ട്​.