ഭരണഘടന ഭേദഗതിയെ പിന്തുണച്ച്​ ഖത്തർ; 90.6 ശതമാനം പേർ അനുകൂലമായി വോട്ട്​ ചെയ്​തു

ദോഹ: ഭരണഘടനാ ഭേദഗതിക്ക്​ അനുകൂലമായി അഭിപ്രായം രേഖപ്പെടുത്തി ഖത്തറിലെ പൗരന്മാർ. ചൊവ്വാഴ്​ച നടന്ന ഹിതപരിശോധനയിൽ 90​.6 ശതമാനം പേരും ഭരണഘടനാ ഭേദഗതിയെ പിന്തുണച്ച്​ വോട്ട്​ ചെയ്​തതായി ജനറൽ റഫറണ്ടം കമ്മിറ്റി ചെയർമാനും ആഭ്യന്തര മന്ത്രിയുമായ ശൈഖ്​ ഖലീഫ ബിൻ ഹമദ്​ ആൽഥാനി അറിയിച്ചു.

9.2 ശതമാനം പേർ ഭേദഗതിയെ എതിർത്ത്​ വോട്ട്​ ചെയ്​തു. 1.8 ശതമാനം വോട്ടുകൾ അസാധുവായി. സാധുവായ വോട്ടുകളുടെ കണക്കെടുപ്പിൽ 90.6 ശതമാനം പേർ ശൂറാ കൗൺസിൽ തെരഞ്ഞെടുപ്പ്​ ഉൾപ്പെടെ നിയമങ്ങളിലെ ഭരണഘടന ഭേദഗതിയെ പിന്തുണച്ചു. രാവിലെ ഏഴ്​ മുതൽ രാത്രി ഏഴു വരെ നടന്ന വോ​ട്ടെടുപ്പിൽ 84 ശതമാനമാണ്​ പോൾ ചെയ്​തത്​. ഖത്തറിലെ വിവിധ ഭാഗങ്ങളിലായി തയാറാക്കിയ 28 പോളിങ്​ സ്​റ്റേഷനുകളിലെയും മെട്രാഷ്​ വഴിയുള്ള ഓൺലൈൻ വോട്ടുകളും എണ്ണിയ ശേഷം ബുധനാഴ്​ച പുലർച്ചെയോടെയാണ്​ ​ഫലം പ്രസിദ്ധീകരിച്ചത്​.

ഹിത പരിശോധനയിൽ സ്​ത്രീകളും യുവാക്കളും മുതിർന്നവരും ഉൾപ്പെടെ സജീവമായി പ​ങ്കെടുത്തു. പൗരന്മാരുടെ പങ്കാളിത്തത്തെ ജനറൽ റഫറണ്ടം കമ്മിറ്റി അഭിനന്ദിച്ചു.

പാർലമെൻറ് സംവിധാനമായ ശൂറാ കൗൺസിലിലേക്കുള്ള തെരഞ്ഞെടുപ്പ്​ പരിഷ്​കരിച്ചുകൊണ്ടുള്ളതാണ്​ പുതിയ ഭേദഗതി. ഇതുപ്രകാരം 45 അംഗ കൗൺസിലിലെ മുഴുവൻ അംഗങ്ങളെയും ഇനി അമീറിന്​ നാമനിർദേശം ചെയ്യാം. 2021ലെ തെരഞ്ഞെടുപ്പിൽ 30 പേരെ വോ​ട്ടെടുപ്പിലൂടെയായിരുന്നു തെരഞ്ഞെടുത്തത്​. ശേഷിച്ച 15 പേർ നാമനിർദേശത്തിലൂടെയും.

ഇന്നും നാളെയും ഖത്തറിൽ പൊതു അവധി

ജനഹിത പരിശോധനയുടെ വിജയകരമായ സമാനപനത്തിന്റെ ആഘോഷ സൂചകമായി ബുധൻ, വ്യാഴം ദിവസങ്ങളിൽ ഖത്തറിന്​ പൊതു അവധി പ്രഖ്യാപിച്ച്​ അമീരി ദിവാൻ. സർക്കാർ ഓഫിസുകൾ ഉൾപ്പെടെയാണ്​ അവധി നൽകിയത്​. സർക്കാർ, സ്വകാര്യ സ്​കൂളുകൾക്കും രണ്ടു ദിവസങ്ങളിൽ അവധിയാണ്​. വാരാന്ത്യ അവധി കൂടെ കഴിഞ്ഞ്​ ഞായറാഴ്​ചയാവും ഇനി പ്രവൃത്തി ദിനം.