മാറ്റിവെച്ച ഖത്തർ ഇന്ത്യൻ എംബസി അപെക്​സ്​ സംഘടന തെരഞ്ഞെടുപ്പ്​ ഏഴിന്

ദോഹ: മൊബൈൽ ആപ്പുമായി ബന്ധപ്പെട്ട സാ​ങ്കേതിക കാരണങ്ങളാൽ നീട്ടി​െവച്ച ഖത്തറിലെ ഇന്ത്യൻ എംബസിയുടെ അപെക്​സ്​ സംഘടനകളുടെ ഓൺലൈൻ തെരഞ്ഞെടുപ്പ്​ ജനുവരി ഏഴിന്​ നടക്കും. ഉച്ചക്ക്​ രണ്ട്​ മുതൽ രാത്രി ഒമ്പത്​ വരെയാണ്​ ഓൺലൈൻ തെരഞ്ഞെടുപ്പ്​ പ്രക്രിയ നടക്കുകയെന്ന്​ എംബസി ഇലക്ഷൻ കമ്മിറ്റി കൗൺസിലറും ചെയർപേഴ്​സനുമായ ടി. ആഞ്ചലീൻ ​പ്രേമലത അയച്ച അറിയിപ്പിൽ പറയുന്നു.

എ.ഒ (അസോസിയേറ്റഡ്​ ഓർഗ​ൈനസേഷൻ) റെപ്രസ​േൻററ്റീവുമാരുടെ തെരഞ്ഞെടുപ്പ്​ ജനുവരി ഏഴിന്​ രാത്രി എട്ടിനും ഒമ്പതിനും ഇടയിലാണ്​ നടക്കുക. എല്ലാ അംഗങ്ങളും ഓൺലൈനായി വോട്ട്​ ചെയ്യാനുള്ള ഡിജിപോൾ ആപ്പ്​ ജനുവരി ആറിന്​ ആറുമണിക്കുള്ളിൽ ഡൗൺലോഡ്​ ചെയ്​ത്​ വിവരങ്ങൾ അപ്​ലോഡ്​ ചെയ്യണമെന്നും അറിയിപ്പിൽ പറയുന്നുണ്ട്​.

ഇന്ത്യൻ കൾച്ചറൽ സെൻറർ (ഐ.സി.സി), ഇന്ത്യൻ കമ്മ്യൂണിറ്റി ബെനവലൻറ്​ ഫോറം (ഐ.സി.ബി.എഫ്)​, ഇന്ത്യൻ സ്​പോർട്​സ്​ സെൻറർ (ഐ.എസ്​.സി) എന്നിവയിലേക്കാണ്​​ തെരഞ്ഞെടുപ്പ്​ നടക്കേണ്ടത്​. ഇന്ത്യൻ ബിസിനസ്​ ആൻഡ്​​ ​പ്രഫഷനൽ കൗൺസിൽ (ഐ.ബി.പി.സി) തെരഞ്ഞെടുപ്പ്​ തൽക്കാലം നടത്തില്ലെന്ന്​ എംബസി നേരത്തെ അറിയിച്ചിട്ടുണ്ട്​.

ഡിസംബർ 26നായിരുന്നു തെരഞ്ഞെടുപ്പ്​ നടക്കേണ്ടിയിരുന്നത്​. ഇത്തവണ ഓൺലൈനായാണ്​ തെര​ഞ്ഞെടുപ്പെന്ന്​ നേരത്തെ എംബസി അറിയിച്ചിരുന്നു​. എന്നാൽ, ഇതിനായുള്ള പ്രത്യേക ഡിജിപോൾ ആപ്പിന്​ ആപ്പിളിന്‍റെ ഐ.ഒ.എസ്​ അംഗീകാരം ലഭിച്ചിരുന്നില്ല. ആപ്പ്​ൾ പ്ലാറ്റ്​ഫോമുകളിൽ ഏതെങ്കിലും ആപ്പ്​ ഉപയോഗിക്കാൻ ആപ്പിൾ ഓപറേറ്റിങ്​ സിസ്​റ്റത്തിൻെറ അംഗീകാരം ആവശ്യമാണ്​.

ആപ്പിൾ സ്​റ്റോർ വാർഷിക അറ്റകുറ്റപണികൾക്കായി ഡിസംബർ 23 മുതൽ 27 വരെ ഷട്ട്​ഡൗൺ ചെയ്​ തിരിക്കുകയായിരുന്നു​. ഇതിനാലാണ് ആപ്പിന് അംഗീകാരം ലഭിക്കാൻ കാലതാമസം നേരിട്ടതും തെരഞ്ഞെടുപ്പ്​ നീട്ടിയതും. ​

അപെക്​സ്​ സംഘടനകളുടെ തെരഞ്ഞെടുപ്പുമായി ബന്ധപ്പെട്ട്​ ഇത്തവണ വീറും വാശിയും ഏറെയാണ്​. അണിയറ നീക്കങ്ങൾ നേരത്തെ തന്നെ സജീവമായിരുന്നു. മുൻകാലങ്ങളില്ലാത്ത വിധം ഇത്തവണ ഐ.സി.സി പ്രസിഡൻറ്​ സ്​ഥാനത്തേക്ക്​ കനത്ത മത്സരമാണ്​ നടക്കുന്നത്​.

3200ഓളം അംഗങ്ങൾ ഐ.സി.ബി.എഫിനും 2600ഓളം ഐ.സി.സിക്കുമുണ്ട്​. നിലവിലെ ഐ.സി.ബി.എഫ്​ പ്രസിഡൻറായ​ പി.എൻ. ബാബുരാജനാണ്​ ഇത്തവണ ഐ.സി.സി പ്രസിഡൻറ്​ സ്​ഥാനത്തേക്ക്​ മത്സരിക്കുന്നത്​. ജൂട്ടാസ്​ പോൾ ആണ്​ ​ഈ സ്​ഥാനത്തേക്ക്​ മത്സരിക്കുന്ന മറ്റൊരു പ്രമുഖൻ.

നിലവിൽ ഐ.സി.ബി.എഫ്​ മാനേജ്​മെൻറ്​ കമ്മിറ്റി അംഗമാണ്​ ജൂട്ടാസ്​. കടുത്ത മത്സരത്തിനാണ്​ അണിയറയിൽ അരങ്ങൊരുങ്ങിയത്​. ഡോ. മോഹൻതോമസ്​, ഷറഫ്​ പി. ഹമീദ്​ എന്നിവരാണ്​ ഇന്ത്യൻ സ്​പോർട്​സ്​ സെൻറർ പ്രസിഡൻറ്​ സ്​ഥാനത്തേക്ക്​ മത്സരിക്കുന്നത്​. ഷറഫ്​ പി. ഹമീദ് നിലവിൽ വൈസ്​പ്രസിഡൻറാണ്​.

ഐ.സി.ബി.എഫ്​ പ്രസിഡൻറ്​ സ്​ഥാനത്തേക്ക്​ മാനേജ്​മെൻറ്​ കമ്മിറ്റി അംഗവും സ്​പോൺസർഷിപ്പ്​ ആൻഡ്​​ ഇവൻറ്​സ്​ ഹെഡുമായ സിയാസ്​ ഉസ്​മാനാണ്​ മത്സരിക്കുന്നത്​. നിലവിലെ ജോയിൻറ്​ സെക്രട്ടറി സന്തോഷ്​ കുമാർ പിള്ളയും ഈ സ്​ഥാനത്തേക്ക്​ മത്സരിക്കുന്നുണ്ട്​.

തൽക്കാലം തെരഞ്ഞെടുപ്പ്​ നടക്കാത്ത ഐ.ബി.പി.സിയുടെ ഭരണത്തിനായി അഡ്​ഹോക്ക്​ കമ്മിറ്റി രൂപവത്​കരിക്കുകയാണ്​ ചെയ്യുക. ഈ കമ്മിറ്റി കാര്യങ്ങൾ പരിശോധിച്ചശേഷം മാത്രമായിരിക്കും ഐ.ബി.പി.സിയുടെ കാര്യത്തിൽ തുടർ തീരുമാനങ്ങളെടുക്കുക. ഖത്തറിലെ ബിസിനസ്​ മേഖലയിലെ പ്രമുഖരെ ഐ.ബി.പി.സിയിൽ കൊണ്ടുവന്ന്​ ഇന്ത്യക്കും ഖത്തറിനുമിടയിലെ വാണിജ്യ താൽപര്യങ്ങൾ കൂടുതൽ മെച്ചപ്പെടുത്തുക എന്നതും എംബസി ലക്ഷ്യമിടുന്നുണ്ട്​.