ഡിജിറ്റൽ മികവിൽ ഖത്തർ മുൻനിരയിൽ

ദോഹ: സർക്കാർസേവനങ്ങളെ അതിവേഗം സാ​ങ്കേതികവത്​കരിച്ച ഖത്തറിന്​ രാജ്യാന്തരതലത്തിൽ അംഗീകാരം. ലോകബാങ്ക്​ പുറത്തുവിട്ട 'ഗവ. ടെക്​ മച്യൂരിറ്റി ഇൻഡക്​സ്​' പട്ടികയിൽ രണ്ടു വിഭാഗങ്ങളിൽ ഖത്തർ ഗ്രൂപ് 'എ'യിൽ ഇടംപിടിച്ചു. പൊതുജനസേവനങ്ങളുടെ ഡിജിറ്റലൈസ്​, ഗവ. ടെക്​ എനാ​ബ്​ളേഴ്​സ്​ ഇൻഡക്​സ്​ എന്നീ പട്ടികയിലാണ്​ രാജ്യം അന്തർദേശീയാടിസ്​ഥാനത്തിൽ മികവിന്​ ഉടമകളായത്​. ലോകത്തെ 198 രാജ്യങ്ങളുടെ ഡിജിറ്റൽ സേവനങ്ങളുടെ കാര്യക്ഷമതയും ലഭ്യതയും വിലയിരുത്തിയതി​െൻറ അടിസ്​ഥാനത്തിലാണ്​ ലോക ബാങ്ക്​ പട്ടിക പ്രസിദ്ധീകരിച്ചത്​.

നാല്​ വിഭാഗങ്ങളിലായാണ്​ സർക്കാർ ​ടെക്​ മച്യൂരിറ്റി ലിസ്​റ്റ്​ തയാറാക്കിയത്​. വിവിധ മേഖലകളിൽ 48 പ്രധാന പോയൻറുകൾ പരിഗണിക്ക​പ്പെട്ടു. സേവനങ്ങളും സൗകര്യങ്ങളും സാ​ങ്കേതിക പരിവർത്തനം ചെയ്യാനുള്ള സർക്കാറുകളുടെ താൽപര്യം, ഇ- സർവിസുകൾ, വിവര- സാമ്പത്തിക മാനേജ്​മെൻറ്​ സംവിധാനം തുടങ്ങി നിരവധി ഘടകങ്ങൾ ഇതി​െൻറ ഭാഗമാണ്​. മികവ്​ പരിഗണിച്ച്​ എ, ബി, സി, ഡി എന്നീ നാല്​ ഗ്രൂപ്പുകളായാണ്​ രാജ്യങ്ങളെ വേർതിരിച്ചത്​. സാ​ങ്കേതിക സംവിധാനങ്ങളിലൂടെ ഏറ്റവും മികച്ച സേവനങ്ങൾ ഉറപ്പാക്കുന്ന രാജ്യങ്ങളാണ്​ ഗ്രൂപ്​ 'എ'യിൽ ഇടംപിടിച്ചത്​. ഡിജിറ്റൽ പരിവർത്തനം സജീവമാവുകയും ജനങ്ങൾ ആ തരത്തിലേക്ക്​ ഉപയോഗിക്കുകയും ചെയ്യുന്ന വിഭാഗങ്ങൾ 'ബി'യിൽ ഉൾപ്പെടുന്നു.

പബ്ലിക്​ സർവിസ്​ ഡെലിവറി ഇൻഡക്​സ്​ പ്രകാരം, നികുതി റി​ട്ടേൺ സമർപ്പണം, ഇ–പേമെൻറുകൾ, ഫയൽ ട്രാൻസ്​ഫർ തുടങ്ങിയ മേഖലയിലെ സജീവ സാ​ങ്കേതികവത്​കരണമാണ്​ പരിഗണിക്കുന്നത്​. കോവിഡ്​ കാലം എല്ലാ രാജ്യങ്ങൾക്കും സാ​ങ്കേതികവത്​കരണ പ്രവർത്തനങ്ങൾക്ക്​ വേഗം നൽകിയെന്ന്​ റിപ്പോർട്ട്​ സൂചിപ്പിക്കുന്നു. സർക്കാറും പൗരന്മാരും ഏറ്റവും പുതിയ സാ​ങ്കേതിക സംവിധാനങ്ങൾ ഉൾക്കൊള്ളാൻ നിർബന്ധിക്കപ്പെടുകയും ചെയ്​തു.