അഫ്ഗാനികളെ കാഴ്​ചയിലേക്ക്​ കൈപിടിച്ച്​ ഖത്തർ റെഡ്ക്രസൻറ്

ദോഹ: അഫ്ഗാനിസ്താനിൽ നേത്രസംബന്ധമായ രോഗങ്ങൾ അലട്ടുന്നവർക്ക് കൈത്താങ്ങായി ഖത്തർ റെഡ്ക്രസൻറ് സൊസൈറ്റി.തിമിരം ബാധിച്ച 1300 രോഗികൾക്ക് ശസ്​ത്രക്രിയയും ദരിദ്രരും അർഹരുമായ 2300 രോഗികൾക്ക് മെഡിക്കൽ പരിശോധനയും നൽകുന്ന പദ്ധതിക്കാണ് സൊസൈറ്റി തുടക്കംകുറിച്ചത്. കുനാർ, ലഘ്മാൻ, ബാമിയാൻ, ഘോർ, കുന്ദുസ്​, പകിത എന്നീ ആറ് പ്രവിശ്യകളിലാണ് പദ്ധതി നടപ്പാക്കുക.

ഒരു വർഷം നീണ്ടുനിൽക്കുന്ന പദ്ധതിയിൽ തിമിരരോഗികൾക്കുള്ള പരിശോധയും തുടർനടപടികളും നടക്കും. നേത്രരോഗ ചികിത്സ, കണ്ണടകൾ നൽകൽ, സാമൂഹിക ബോധവത്​കരണ പരിപാടികൾ, നേത്രരോഗങ്ങളെ പ്രതിരോധിക്കുന്നതിനുള്ള വിവരങ്ങളടങ്ങിയ ലഘുലേഖകൾ വിതരണം ചെയ്യുക തുടങ്ങിയവയാണ് പദ്ധതിയിലുൾപ്പെടുന്നത്.

കണക്കുകൾ പ്രകാരം അഫ്ഗാനിസ്​താനിൽ നാല് ലക്ഷത്തിനടുത്ത് അന്ധരും 1.5 ദശലക്ഷം കാഴ്ചക്കുറവുള്ളവരും ഉണ്ട്. കാഴ്ച നശിക്കുന്നതിെൻറ പ്രധാന കാരണങ്ങളിലൊന്ന് തിമിര രോഗമാണെന്നും കണക്കുകൾ വ്യക്തമാക്കുന്നു. തിമിര ശസ്​ത്രക്രിയക്കായി കാത്തിരിക്കുന്നവരുടെ എണ്ണം രണ്ട്​ ലക്ഷമാണെന്നും ആരോഗ്യപ്രവർത്തകർ അറിയിക്കുന്നു.കുനാറിൽ നടന്ന ഉദ്ഘാടനച്ചടങ്ങിൽ െപ്രാവിൻഷ്യൽ ഹെൽത്ത് ബ്യൂറോ മാനേജർ, പ്രാദേശിക ഭരണകൂടങ്ങളിൽനിന്നുള്ള പ്രതിനിധികൾ, ഖത്തർ റെഡ്ക്രസൻറ്, അഫ്ഗാൻ എജുക്കേഷൻ ആൻഡ് എയ്ഡ് ഓർഗനൈസേഷൻ, പ്രമോഷൻ ഓഫ് ഹെൽത്ത് ആൻഡ് കമ്യൂണിറ്റി സംഘടനാപ്രതിനിധികൾ തുടങ്ങിയവർ പങ്കെടുത്തു.