ഖത്തറിൽ കുട്ടികളുടെ വാക്സിനേഷൻ തുടങ്ങി

ദോഹ: ഖത്തറിൽ അഞ്ച്​ മുതൽ 11വയസ്സുവരെ പ്രായമുള്ള കുട്ടികൾക്ക്​ കോവിഡ്​ പ്രതിരോധ വാക്സിൻ കുത്തിവെപ്പ്​ ഞായറാഴ്ച ആരംഭിച്ചതായി പൊതുജനാരോഗ്യ മന്ത്രാലയം. ഫൈസർ ബയോടെക്​ വാക്സിനുകളാണ്​ കുട്ടികൾക്ക്​ നൽകുന്നത്​. ജനുവരിയിൽ കുട്ടികളുടെ വാക്സിനേഷൻ നടപടികൾ ആരംഭിക്കുമെന്ന്​ മാസങ്ങൾക്ക്​ മുമ്പു തന്നെ ആരോഗ്യ മന്ത്രാലയം വ്യക്​തമാക്കിയിരുന്നു. ആദ്യ ഡോസ്​ സ്വീകരിച്ച്​ മൂന്നാഴ്​ച പിന്നിട്ട ശേഷമായിരിക്കും രണ്ടാം ഡോസ്​ നൽകുക. മുതിർന്നവർക്ക്​ നൽകുന്ന ഡോസിന്‍റെ മൂന്നിൽ ഒരു ഭാഗം മാത്രമായിരിക്കും കുട്ടികൾക്ക്​ ​കുത്തിവെക്കുക.

ഫൈസർ വാക്സിനുകൾ കുട്ടികൾക്ക്​ ഏറെ സുരക്ഷിതമാണെന്ന രാജ്യാന്തര തലത്തിലെയും പ്രാദേശിക തലത്തിലെയും പഠനങ്ങളുടെ അടിസ്ഥാനത്തിലാണ്​ ഖത്തറിലും അഞ്ചിനും 11നും ഇടയിലുള്ള കുട്ടികൾക്ക് ഇതേ വാക്സിൻ നൽകാന തീരുമാനമായത്​. നിലവിൽ 12 മുതൽ മുകളിൽ പ്രായമുള്ള എല്ലാ വിഭാഗങ്ങൾക്കും ഖത്തറിൽ വാക്സിൻ നൽകുന്നുണ്ട്​. ഈ പ്രായക്കാർക്കുള്ള ബൂസ്​റ്റർ ഡോസ്​ വാക്സിനേഷനും സജീവമാണ്​.