ഇന്ത്യൻ കാപ്​സികം, ഏലം, പോത്തിറച്ചി ഇറക്കുമതി: ഗുണനിലവാര പരിശോധന കർശനമാക്കി ഖത്തർ

ദോഹ: ഇന്ത്യയിൽ നിന്നുള്ള കാപ്​സികം, ഏലം, ഒരിനം ഫ്രോസൻ പോത്തിറച്ചി എന്നിവയുടെ ഇറക്കുമതിയുമായി ബന്ധപ്പെട്ട നടപടികൾ ഖത്തർ ശക്​തമാക്കി. മനുഷ്യശരീരത്തിന്​ ഹാനികരമായ കീടനാശിനി ഇല്ലെന്നും പോത്തിറച്ചി ബാക്​ടീരിയകളിൽ നിന്ന്​ മുക്​തമാണെന്നും ഉറപ്പുവരുത്താനാണിത്​. ​ഇത്​ സംബന്ധിച്ച്​ പൊതുജനാരോഗ്യമന്ത്രാലയം എല്ലാ തുറമുഖങ്ങളിലേക്കും നിർദേശങ്ങൾ അയച്ചിട്ടുണ്ട്​.

നിലവിൽ എത്തിയ ഇത്തരം ഉൽപന്നങ്ങൾ പുതിയ മാനദണ്ഡങ്ങൾ പ്രകാരം പരിശോധിക്കണം. രാജ്യത്ത്​ നിലവിലുള്ള ആരോഗ്യസംബന്ധമായ എല്ലാ മാനദണ്ഡങ്ങളും ആവശ്യമായ ചട്ടങ്ങളും ഗുണനിലവാരവും പാലിച്ചിട്ടുണ്ടെന്ന്​ ഉറപ്പുവരുത്തിയാൽ മാത്രമേ ഇവ വിട്ടുകൊടുക്കാൻ പാടുള്ളൂവെന്നും നിർദേശത്തിൽ പറയുന്നു. ഏ​പ്രിൽ ഒന്നുമുതൽ ഇന്ത്യയിൽ നിന്ന്​ ഇറക്കുമതി ചെയ്യുന്ന കാപ്​സികം, ഏലം, ഒരിനം പോത്തിറച്ചി എന്നിവയുടെ കൂടെ ഐ.എസ്​.ഒ 17025 അംഗീകാരമുള്ള ലബോറട്ടിയിൽ നിന്നുള്ള ഗുണനിലവാരമടക്കമുള്ള കാര്യങ്ങളെല്ലാം വിശദമാക്കുന്ന സാക്ഷ്യപത്രം ഉണ്ടായിരിക്കണം.

ഏപ്രിൽ ഒന്നുമുതൽ ഇത്​ നിർബന്ധമാണ്​. അല്ലെങ്കിൽ ഇന്ത്യയിലെ ബന്ധപ്പെട്ട വകുപ്പുകളിൽ നിന്നുള്ള രേഖ ഉണ്ടായിരിക്കണം. ഉൽപന്നങ്ങൾ മനുഷ്യശരീരത്തിന്​ ഹാനികരമ​െല്ലന്നും സുരക്ഷിതമാണെന്നും സാക്ഷ്യപ്പെടുത്തുന്നതായിരിക്കണം ഈ രേഖ. കാപ്​സികവും ഏലവും കീടനാശിനിമുക്​തമാണെന്ന്​ ഇതിൽ രേഖപ്പെടുത്തിയിരിക്കണം. പോത്തിറച്ചി സാൽമനെല ബാക്​ടീരിയ മുക്​തമാണെന്നും ​ഈ സാക്ഷ്യപത്രത്തിലോ ബന്ധപ്പെട്ട വകുപ്പുകളിലെ രേഖയിൽ നിന്നോ തെളിഞ്ഞിരിക്കണം.

കുടല്‍ വീക്കം, ടൈഫോയ്ഡ് എന്നിവക്ക്​ കാരണമായതും മനുഷ്യൻെറയും മൃഗങ്ങളുടെയും കുടലില്‍ കാണപ്പെടുന്നതുമായ ബാക്ടീരിയയാണ്​ സാൽമനെല. ഇറക്കുമതി ചെയ്യുന്ന ഉൽപന്നങ്ങൾ ആവശ്യമായ മാനദണ്ഡങ്ങൾ പാലിക്കുന്നുണ്ടോ എന്ന്​ ഉറപ്പാകുന്നതുവരെ ഇത്തരം നടപടികൾ തുടരും. ആവശ്യമെങ്കിൽ ഈ ഉൽപന്നങ്ങളുടെ ഇറക്കുമതി നി​േരാധിക്കുമെന്നും ആരോഗ്യമന്ത്രാലയം തുറമുഖങ്ങൾക്കയച്ച നിർദേശങ്ങളിൽ ഉണ്ട്​.

ഭക്ഷ്യവസ്​തുക്കളുമായി ബന്ധപ്പെട്ട നിരന്തരനടപടികളു​െട ഭാഗമായാണ്​ ആരോഗ്യമ​ന്ത്രാലയത്തിൻെറ കീഴിലുള്ള ഭക്ഷ്യസുരക്ഷാവകുപ്പ്​ പുതിയ നിർദേശങ്ങൾ പുറ​െപ്പടുവിച്ചിരിക്കുന്നത്​. ഭക്ഷ്യവസ്​തുക്കളുമായി ബന്ധപ്പെട്ട്​ മനുഷ്യനുണ്ടാകുന്ന പ്രശ്​നങ്ങൾ ഒഴിവാക്കൽ, ഓരോ ഉൽപന്നങ്ങളുടെയും നിരീക്ഷണം, ഭക്ഷ്യവസ്​തുക്കൾ അന്താരാഷ്​ട്ര മാനദണ്ഡങ്ങൾ പാലിക്കുന്നുണ്ടോ എന്ന്​ ഉറപ്പുവരുത്തൽ എന്നിവയുമായി ബന്ധപ്പെട്ട തുടർനടപടികളാണ്​ ഇക്കാര്യങ്ങളിൽ ഉണ്ടാകുന്നത്​. ഭക്ഷ്യവസ്​തുക്കൾ എത്തിക്കുന്ന രാജ്യങ്ങൾ ഇത്തരം മാനദണ്ഡങ്ങൾ ഉറപ്പുവരുത്തണമെന്നും ആരോഗ്യമന്ത്രാലയം മുന്നറിയിപ്പ്​ നൽകുന്നുണ്ട്​.