ഏഷ്യൻ ടേബിൾ ടെന്നിസ്​ ചാമ്പ്യൻഷിപ്പിന് ഖത്തർ വേദിയാകും

ദോഹ: 25ാമത് പുരുഷ, വനിതാ ഏഷ്യൻ ടേബിൾ ടെന്നിസ്​ ചാമ്പ്യൻഷിപ്പിന് ഖത്തർ വേദിയാകുമെന്ന് ഏഷ്യൻ ടേബിൾ ടെന്നിസ്​ യൂനിയൻ (എ.ടി.ടി.യു) പ്രഖ്യാപിച്ചു. അടുത്ത വർഷം സെപ്റ്റംബറിലാണ് ചാമ്പ്യൻഷിപ്. എ.ടി.ടി.യു എക്സിക്യൂട്ടിവ് ഓഫിസ്​ യോഗത്തിലാണ് ഖത്തറിെൻറ ആതിഥേയത്വ പ്രഖ്യാപനമുണ്ടായത്.ഏഷ്യൻ ടേബിൾ ടെന്നിസ്​ ചാമ്പ്യൻഷിപ്പിെൻറ വേദിക്കായി മുൻനിരയിലുണ്ടായിരുന്ന ചൈനയും ഇന്ത്യയും എ.ടി.ടി.യു ജനറൽ അസംബ്ലിക്കിടെ പിന്മാറിയതോടെയാണ് ഖത്തറിന് നറുക്ക് വീണത്. 2000ത്തിലാണ് നേരത്തേ ചാമ്പ്യൻഷിപ്പിന് ആതിഥേയത്വം വഹിച്ചത്. 20 വർഷത്തിനു ശേഷമാണ് ഖത്തറിൽ വീണ്ടും ചാമ്പ്യൻഷിപ് എത്തുന്നത്.

ഏഷ്യൻ ചാമ്പ്യൻഷിപ്പിന്​ രണ്ടു തവണ വേദിയാകുന്ന ആദ്യ അറബ്, ഗൾഫ് രാജ്യമായി ഖത്തർ മാറും. അന്താരാഷ്​ട്രതലത്തിലെ വമ്പൻ കായിക ചാമ്പ്യൻഷിപ്പുകൾ നടത്തുന്നതിൽ ഖത്തറിനുള്ള തുടർച്ചയായ അംഗീകാരങ്ങളുടെ ഭാഗമാണിത്.

ഈ ചാമ്പ്യൻഷിപ്പിലൂടെ ഖത്തരി ടേബിൾ ടെന്നിസ്​ മേഖലക്ക് ഉണർവുണ്ടാകുമെന്നും മികച്ച താരങ്ങളുമായി മത്സരിക്കുന്നതിലൂടെ വലിയ പരിചയം നേടിയെടുക്കാനാകുമെന്നും ഖത്തരി അറബ് ടേബിൾ ടെന്നിസ്​ അസോസിയേഷൻ പ്രസിഡൻറും എ.ടി.ടി.യു, ഇൻറർനാഷനൽ ടേബിൾ ടെന്നിസ്​ ഫെഡറേഷൻ എന്നിവയുടെ വൈസ്​ പ്രസിഡൻറുമായ ഖലിൽ അൽ മുഹന്നദി പറഞ്ഞു.

അത്യാധുനിക സൗകര്യങ്ങളും മികച്ച വേദികളും സാങ്കേതികവിദ്യകളുമാണ് ചാമ്പ്യൻഷിപ്പിനായി ഒരുക്കിയിരിക്കുന്നതെന്നും ഉന്നത അന്താരാഷ്​ട്ര നിലവാരത്തിലായിരിക്കും ചാമ്പ്യൻഷിപ് സംഘടിപ്പിക്കുകയെന്നും അൽ മുഹന്നദി കൂട്ടിച്ചേർത്തു.