സുരക്ഷിതമാണ്​ ഖത്തറിൻെറ ഭക്ഷ്യമേഖല

ദോഹ: ഖത്തറിൻെറ ഭക്ഷ്യസുരക്ഷ ഭദ്രമാണെന്ന്​ വ്യക്​തമാക്കി മുനിസിപ്പാലിറ്റി പരിസ്​ഥിതിമന്ത്രാലയം സംഘടിപ്പിച്ച ദേശീയ സംവാദം സമാപിച്ചു. അടുത്ത മാസം നടക്കാനിരിക്കുന്ന ഐക്യരാഷ്​ട്രസഭ ഫുഡ് സിസ്​റ്റം ഉച്ചകോടിയുടെ മുന്നോടിയായാണ്​ രണ്ട് ദിവസം നീണ്ടുനിന്ന സംവാദം സംഘടിപ്പിച്ചത്. ഭക്ഷ്യ സുരക്ഷ, അവശ്യ ഭക്ഷ്യവസ്​തുക്കളുടെ സംഭരണം, വേനലിലുൾപ്പെടെയുള്ള പ്രാദേശിക ഉൽപാദനം, വിലവർധന തുടങ്ങി നിരവധി വിഷയങ്ങൾ സംവാദത്തിൽ ചർച്ച ചെയ്തതായി മുനിസിപ്പാലിറ്റി പരിസ്​ഥിതിമന്ത്രാലയം കാർഷിക, മത്സ്യബന്ധന വിഭാഗം അസി. അണ്ടർ സെക്രട്ടറി ഡോ. ഫാലിഹ് ബിൻ നാസർ ആൽഥാനി പറഞ്ഞു.

കാർഷിക വിളവെടുപ്പി​െൻറ മുമ്പും ശേഷവും ഭക്ഷ്യവസ്​തുക്കൾ പാഴായിപ്പോകുന്നതും പ്രത്യേകം ചർച്ച ചെയ്തതായും അദ്ദേഹം കൂട്ടിച്ചേർത്തു. പരിസ്​ഥിതിസംരക്ഷണവുമായി ബന്ധപ്പെട്ടും ഭക്ഷ്യസുരക്ഷ ലക്ഷ്യം സാക്ഷാത്കരിക്കുന്നതിനും രാജ്യത്ത് മതിയായ ഭക്ഷ്യസംഭരണം ഉറപ്പുവരുത്തുന്നതിനുമായി ബന്ധപ്പെട്ട പുതിയ ആശയങ്ങളും നിർദേശങ്ങളും സംവാദത്തിൽ മുന്നോട്ടുവെച്ചതായും അദ്ദേഹം വ്യക്തമാക്കി.

ഇത്തരം വിഷയങ്ങളിൽ ഇതാദ്യമായാണ് ഇതുപോലെയുള്ള സംവാദം സംഘടിപ്പിക്കുന്നതെന്നും അദ്ദേഹം സൂചിപ്പിച്ചു.

്അതേസമയം, പരിസ്​ഥിതിസൗഹൃദ ഭക്ഷ്യ ഉൽപാദനവുമായി ബന്ധപ്പെട്ട വിഷയങ്ങൾക്കാണ് സംവാദത്തി​െൻറ രണ്ടാം സെഷനിൽ മുഖ്യമായും ഊന്നൽ നൽകിയതെന്ന് ഭക്ഷ്യസുരക്ഷാവിഭാഗം മേധാവി മസ്​ഈദ് ജാറല്ലാഹ് അൽ മർരി പറഞ്ഞു. എല്ലാവിഭാഗങ്ങൾക്കും ന്യായമായ വിതരണത്തിലൂടെയുള്ള ഭക്ഷ്യവിതരണ ശൃംഖല സ്​ഥാപിക്കുക, ഭക്ഷ്യവിതരണ ശൃംഖലയിൽ നഷ്​ടങ്ങൾ കുറച്ച് ലാഭം വർധിപ്പിക്കുക തുടങ്ങിയവയും സംവാദത്തിൽ പ്രധാന വിഷയമായി കൈകാര്യം ചെയ്തുവെന്നും അൽ മർരി വ്യക്തമാക്കി.

കൂടുതൽ സുസ്​ഥിരമായ ഭക്ഷ്യസംവിധാനത്തിന് ഖത്തർ രൂപംനൽകുമെന്ന് നഗരസഭ പരിസ്​ഥിതിവകുപ്പ് മന്ത്രി ഡോ. അബ്​ദുല്ല ബിൻ അബ്​ദുൽ അസീസ്​ ബിൻ തുർക്കി അൽ സുബൈഈ നേരത്തെ വ്യക്തമാക്കിയിരുന്നു.

ദേശീയ ഭക്ഷ്യസുരക്ഷ അനലിറ്റിക്സ്​ സംവിധാനത്തിന് ഖത്തർ നേരത്തെ രൂപംനൽകിയിട്ടുണ്ടെന്നും ഭക്ഷ്യസുരക്ഷയുമായി ബന്ധപ്പെട്ട് സമഗ്രമായ വിവരങ്ങൾ ശേഖരിക്കാൻ ഇത് ഏറെ സഹായകമാകുമെന്നും ഭക്ഷ്യ സുരക്ഷയുമായി ബന്ധപ്പെട്ട് വിവരാധിഷ്ഠിതവും സത്യസന്ധവുമായ നയങ്ങൾ രൂപപ്പെടുത്തുന്നതിൽ ഇത് നിർണായകമാകുമെന്നും കൂടുതൽ സുസ്​ഥിരവും മികവുറ്റതുമായ ഭക്ഷ്യസംവിധാനത്തിന് രൂപംനൽകാൻ ഖത്തർ തയാറാണെന്നും അദ്ദേഹം പറഞ്ഞിരുന്നു.