ഇന്ന്​ മുതൽ ക്വാറൻറീൻ

ദോഹ: ഇന്ത്യ ഉൾപ്പെടെ ആറ്​ ഏഷ്യൻ രാജ്യങ്ങളിൽനിന്ന്​ ഇന്ന്​ മുതൽ ഖത്തറിലെത്തുന്ന യാത്രക്കാർക്ക്​ സമ്പർക്കവിലക്ക്. വെള്ളിയാഴ്​ച ആരോഗ്യ മന്ത്രാലയം പ്രഖ്യാപിച്ച പുതിയ യാത്രനയങ്ങൾ പ്രകാരമുള്ള മാറ്റങ്ങൾ തിങ്കളാഴ്​ച ഉച്ചയോടെ പ്രാബല്യത്തിൽ വരും. ​

ഉച്ചക്ക്​ 12ന്​​ ശേഷം ദോഹയിലെത്തുന്ന യാത്രക്കാർക്കാണ്​ സമ്പർക്കവിലക്ക് നിർബന്ധമാക്കിയത്​. ഇന്ത്യക്കു പുറമെ, ശ്രീലങ്ക, നേപ്പാൾ, പാകിസ്​താൻ, ബംഗ്ലാദേശ്​, ഫിലിപ്പീൻസ്​ എന്നീ കിഴക്കനേഷ്യൻ രാജ്യങ്ങളിൽനിന്നുള്ള യാത്രക്കാർക്കാണ്​ സമ്പർക്കവിലക്ക് നിർബന്ധമാക്കിയത്​.

ഇതോടെ, ഇന്നുച്ച കഴിഞ്ഞ്​ ദോഹയിൽ വിമാനമിറങ്ങുന്നവരിൽ ഖത്തറിൽനിന്ന്​ രണ്ടുഡോസ്​ വാക്​സിൻ സ്വീകരിച്ചവർക്കും ഇവിടെനിന്ന്​ കോവിഡ്​ ബാധിച്ച്​ ഭേദമായവർക്കും രണ്ടു ദിവസ ഹോട്ടൽ സമ്പർക്കവിലക്ക് വേണം. രണ്ടാം ദിവസം ആർ.ടി.പി.സി.ആർ പരിശോധന ഫലം നെഗറ്റിവായാൽ പുറത്തിറങ്ങാം. ഖത്തറിന്​ പുറത്തു നിന്നും വാക്​സിൻ എടുത്ത യാത്രക്കാർക്ക്​ 10 ദിവസമാണ്​ ഇനി ഹോട്ടൽ സമ്പർക്കവിലക്ക്. രാജ്യത്തിന്​ പുറത്തുനിന്ന്​ കോവിഡ്​ ഭേദമായി മടങ്ങിയെത്തുന്നവർക്കും ഇതേ ചട്ടം ബാധകമാവും. ഓൺ അറൈവൽ, സന്ദർശക വിസയിലുള്ള യാ​​ത്രക്കാർക്കും 10 ദിവസ സമ്പർക്കവിലക്ക് നിർബന്ധമാവും.

ജൂൺ 12ന്​ നടപ്പായ യാത്രനയത്തിനു പിന്നാലെ, ഓൺ അറൈവൽ വിസ അനുവദിച്ചു തുടങ്ങിയതോടെ ഖത്തർ വഴി സൗദി, യു.എ.ഇ എന്നിവടങ്ങളിലേക്ക്​ മലയാളികൾ ഉൾപ്പെടെയുള്ള പ്രവാസികളുടെ യാത്ര തുടങ്ങിയപ്പോഴാണ്​ സമ്പർക്കവിലക്കിൽ പുതിയ പരിഷ്​കാരം നടപ്പാവുന്നത്​.

വെള്ളിയാഴ്​ച ഉച്ചയോടെ ഇന്ത്യൻ എംബസിയുടെ ട്വീറ്റിലാണ്​ ഇന്ത്യയിൽനിന്നുള്ള യാത്രക്കാർക്ക്​ സമ്പർക്കവിലക്ക് നിർബന്ധമാക്കിയ വാർത്ത പുറത്തറിയുന്നത്​. രാത്രിയോടെ ഖത്തർ ആരോഗ്യ മന്ത്രാലയം ഔദ്യോഗികമായി പ്രഖ്യാപിക്കുകയും ചെയ്​തു. തുടർന്ന്​ കഴിഞ്ഞ രണ്ടു ദിവസങ്ങളിലും വലിയ തിരക്കായിരുന്നു അനുഭ​വപ്പെട്ടത്​.

സമ്പർക്കവിലക്ക് പുനഃസ്​ഥാപിക്കപ്പെട്ട ആറു രാജ്യങ്ങളിൽനിന്നും വിമാനങ്ങൾ ഫുൾബുക്കിങ്ങിൽ തന്നെ ശനി, ഞായർ ദിവസങ്ങളിൽ ദോഹയിലെത്തി. കേരളത്തിൽ, കൊച്ചി, കോഴിക്കോട്​, കണ്ണൂർ എന്നിവിടങ്ങളിൽനിന്ന്​ നേരത്തെ തന്നെ ടിക്കറ്റ്​ കഴിഞ്ഞതിനാൽ ബാംഗ്ലൂർ, ചെന്നൈ, മുംബൈ, ഡൽഹി എന്നിവ വഴിയും മലയാളികൾ ഉൾപ്പെടെയുള്ള യാത്രക്കാർ ദോഹയിലിറങ്ങി. ഡിസ്​കവർ ഖത്തർ വഴിയുള്ള ഹോട്ടൽ സമ്പർക്കവിലക്ക് ബുക്കിങ്ങും സജീവമായി.