വിശക്കുന്നവരെ തേടി വന്ന ഉമ്മയില്ലാത്ത നോമ്പുകാലം

രണ്ടു വർഷം മുമ്പൊരു റമദാനിലാണ് റോഡരികിൽ വൃദ്ധയായ ആ ഉമ്മയെ കാണുന്നത്, രണ്ടു കയ്യിലും നിറയെ ബിരിയാണിയും മജ്ബൂസ ുമുണ്ട്, കുറച്ചു മധുരപലഹാരങ്ങളും. അടുത്തെത്തിയപ്പോൾ ഭക്ഷണത്തിൻെറ കുറച്ച് കവറുകൾ കയ്യിൽതന്നിട്ട് കൊണ്ടുപോയി കുടുംബത്തോടൊപ്പം കഴിക്കാൻ പറഞ്ഞു. അതും വാങ്ങി ഞാൻ വീട്ടിലേക്ക് നടന്നു. അടുത്ത ദിവസവും അതേ നേരത്ത്, അതേ സ്ഥലത്ത ് സ്വദേശിയുടെ വീടിനു മുമ്പിൽ ആ ഉമ്മയുണ്ട്, കയ്യിൽ കവറുകളും. എന്നാൽ അന്ന് കവറുകൾ എൻെറ കയ്യിൽ തരാതെ അവർ എന്നോടൊപ് പം നടന്നുവന്നു. ‘മോൻെറ കുടുംബത്തെ കൂടി കാണണം’ അവർ പറഞ്ഞു. വീട്ടിൽ വന്ന് പ്രിയതമയുടെ കയ്യിൽ കവറുകൾ നൽകി. കുടുംബത്തെ വിട്ട്​ മറ്റൊരു രാജ്യത്ത്​ ജോലി ചെയ്യുകയും ഒറ്റപ്പെട്ട ഫ്ലാറ്റുകളിൽ താമസിക്കുകയും ചെയ്യുന്ന ഏതൊരു പ്രവാസിക്കും മനസിന് വലിയൊരു സമാധാനമാണ് മറ്റൊരു കുടുംബത്തോടൊപ്പം കൂട്ടുകൂടാനും സംസാരിക്കാനും കിട്ടുന്ന അവസരം. റമദാൻ മുഴുവനും പലവിധ പലഹാരങ്ങളും ഭക്ഷണവുമായി ആ ഉമ്മ വന്നുകൊണ്ടിരുന്നു.

ഷാജഹാൻെറ മക്കളോടൊപ്പം ബംഗളൂരു ചിന്താമണി സ്വദേശിനി ഗുലാബ്

ഞങ്ങൾ അവരോടൊപ്പമുള്ള നിമിഷങ്ങൾ ആസ്വദിച്ചു. ഞങ്ങളുടെ മക്കൾ അവർക്ക് സ്നേഹനിധികളായ പേരമക്കളെ പോലെയായിരുന്നു. അറബിയും ഉറുദുവും ഹിന്ദിയും കലർന്ന ആ സംസാരം ഞങ്ങൾ വളരെ പെട്ടെന്ന് തന്നെ സ്വായത്തമാക്കി, ഭാഷക്കും ദേശത്തിനുമപ്പുറം പരസ്​പര സ്നേഹം കൂടിക്കൊണ്ടിരുന്നു. അവർക്ക് താങ്ങായും തണലായും കഴിയുന്ന സഹായങ്ങൾ എനിക്കും ചെയ്യാൻ പറ്റി. കർണാടകത്തിലെ ബംഗളൂരു ചിന്താമണി സ്വദേശിയാണവർ. പേര്​ ഗുലാബ്. ആ ഉമ്മ വലിയ ഒരു കുടുംബത്തിൻെറ കാരണവരാണ്​. 20 വർഷം ദോഹയിൽ ജോലി ചെയ്ത അവർ ശാരീരിക ക്ഷീണം മൂലം പ്രവാസ ജീവിതം അവസാനിപ്പിച്ച് കഴിഞ്ഞ വർഷം സ്വദേശത്തേക്ക്​ മടങ്ങി. ഇപ്പോൾ മക്കളുടെയും പേരമക്കളുടെയും കൂടെ നാട്ടിൽ വിശ്രമ ജീവിതത്തിലാണ്​. നാട്ടിലും അവർ പള്ളികൾക്കും അയൽവാസികൾക്കുമൊക്കെ വലിയ സഹായങ്ങൾ ചെയ്തിരുന്നു. അവർ പറഞ്ഞ്​, മൂന്നു പള്ളികളിലേക്ക് വാക്വം ക്ലീനറും മറ്റും വാങ്ങി പാഴ്​സൽ അയച്ചിരുന്നത് ഞാനായിരുന്നു.

അതിനാൽ ആ കാരുണ്യം നേരിട്ടറിഞ്ഞിട്ടുണ്ട്​. റമദാൻെറ മുഴുവൻ കാരുണ്യവും ആ ഉമ്മയുടെ കയ്യിലൂടെ അനുഭവിച്ചറിഞ്ഞ രണ്ടു വർഷം സ്വന്തം ഉമ്മയെ പോലെ ഞങ്ങൾ അവരെ സ്നേഹിച്ചു, അവർ ഞങ്ങളെയും. ബംഗളൂരിലെ അവരുടെ മറ്റ്​ കുടുംബാംഗങ്ങളും ഇപ്പോൾ പരിചയക്കാരാണ്​.
ഈ റമദാനിലും വിളിച്ചപ്പോൾ പ്രായത്തെ തോൽപ്പിച്ച് നോമ്പെടുക്കുന്ന വിവരങ്ങൾ ആ ഉമ്മ പറഞ്ഞു. ഉമ്മയില്ലാത്ത ഖത്തറിലെ ഈ റമദാൻ അതിനാൽ തന്നെ ചില ഒറ്റപ്പെടലുകൾ
സമ്മാനിക്കുന്നു.