റിയൽ എസ്​റ്റേറ്റ്: അനധികൃത ഏജൻറുമാർക്ക്​ പിടിവീഴും

ദോഹ: റിയൽ എസ്​റ്റേറ്റ് ഇടപാടുകളിൽനിന്ന് അനധികൃത റിയൽ എസ്​റ്റേറ്റ് ഏജൻറുമാരെ അകറ്റി നിർത്തുകയെന്ന ലക്ഷ്യം മുൻനിർത്തിയുള്ള നടപടികൾക്ക് ഖത്തർ തുടക്കം കുറിച്ചു.അംഗീകാരമില്ലാത്ത നിരവധി ഏജൻറുമാരാണ്​ ഈ രംഗത്ത്​ രാജ്യത്ത്​ പ്രവർത്തിക്കുന്നത്​. മലയാളികളടക്കമുള്ളവർ ഏറെ സജീവമായ മേഖലയാണ്​ ഖത്തറിലെ റിയൽ എസ്​റ്റേറ്റ്​ രംഗം. റിയൽ എസ്​റ്റേറ്റ് ഇടപാടുകൾ കൂടുതൽ സംഘടിത നിയമ പരിസ്​ഥിതിയിലാക്കുകയാണ്​ അനധികൃത ഇടപാടുകാരെ തടയുന്നതിലൂടെ ലക്ഷ്യമിടുന്നതെന്ന്​ അധികൃതർ പറയുന്നു. സർക്കാർ അംഗീകാരം ലഭിച്ച ഖത്തരി റിയൽ എസ്​റ്റേറ്റ് ഏജൻറുമാരുടെ പ്രഥമ ബാച്ച് കഴിഞ്ഞ ദിവസം സത്യപ്രതിജ്ഞ ചെയ്തു കർമരംഗത്തേക്കിറങ്ങിയിരുന്നു.

നീതിന്യായ മന്ത്രാലത്തിലെ റിയൽ എസ്​റ്റേറ്റ് േബ്രാക്കേഴ്സ്​ അഫയേഴ്സ്​ കമ്മിറ്റിക്ക് മുമ്പാകെയാണ് പ്രഥമ ബാച്ച് സത്യപ്രതിജ്ഞ ചെയ്തത്.ചടങ്ങുമായി ബന്ധപ്പെട്ടാണ്​ പുതിയ നടപടികൾ പ്രഖ്യാപിച്ചിരിക്കുന്നത്​. റിയൽ എസ്​റ്റേറ്റ് സംബന്ധമായ നിയമം നടപ്പാക്കുക, റിയൽ എസ്​റ്റേറ്റ് േബ്രാക്കറേജ് വ്യാപാരത്തിന് നിയമപരിരക്ഷ നൽകുകയും സംഘടിതമാക്കുകയും ചെയ്യുക തുടങ്ങിയ ഉദ്ദേശ്യങ്ങളാണ് ഇതിനു പിന്നിൽ.റിയൽ എസ്​റ്റേറ്റ് ഇടപാടുകളുമായി ബന്ധപ്പെട്ട 2017ലെ 22ാം നമ്പർ നിയമത്തിലെ വകുപ്പുകളുടെ പിൻബലത്തിലാണ് അംഗീകൃത ഖത്തരി റിയൽ എസ്​റ്റേറ്റ് ഏജൻറുമാരുടെ പുതിയ ബാച്ച് പുറത്തിറങ്ങിയിരിക്കുന്നത്​.

ഈ രംഗത്തെ സുപ്രധാന ചുവടുവെപ്പാണിതെന്നും റിയൽ എസ്​റ്റേറ്റ് രജിസ്​േട്രഷൻ ആൻഡ് ഓഥൻറിക്കേഷൻ വകുപ്പ് അസി. അണ്ടർസെക്രട്ടറി സഈദ് അബ്​ദുല്ല അൽ സുവൈദി പറഞ്ഞു.നിയമം അനുശാസിക്കുന്ന മാർഗനിർദേശങ്ങളും മാനദണ്ഡങ്ങളും പാലിക്കുന്ന മികച്ച സർക്കാർ പരിശീലനങ്ങൾ ലഭിച്ച ശേഷമാണ് പ്രഥമ ബാച്ച് പുറത്തിറങ്ങിയിരിക്കുന്നത്​.60ൽ അധികം റിയൽ എസ്​റ്റേറ്റ് േബ്രാക്കർമാരാണ് കർമരംഗത്തേക്ക് വന്നിരിക്കുന്നത്​. റിയൽ എസ്​റ്റേറ്റ് േബ്രാക്കർമാർക്ക് ജോലി സംബന്ധമായ പരിശീലനം നൽകുന്നതിന് പ്രത്യേക കോഴ്സുകൾതന്നെ റിയൽ എസ്​റ്റേറ്റ് േബ്രാക്കറേജ് വകുപ്പ് ആരംഭിച്ചിട്ടുണ്ട്.