ലോകകപ്പ് ഫുട്ബാൾ​ ടിക്കറ്റിന്​ റെക്കോഡ്​ ബുക്കിങ്​; മുന്നിൽ ഖത്തർ, പിന്നാലെ അർജന്‍റീന

ദോഹ: ലോകകപ്പ്​ ഫുട്​ബാളിന്‍റെ ടിക്കറ്റ്​ ബുക്കിങ്​ ആരംഭിച്ച്​ 24 മണിക്കൂറിനുള്ളിൽ അപേക്ഷിച്ചത്​ 12 ലക്ഷം ആരാധകർ. ​​ബുധനാഴ്ച ഉച്ച ഒരു മണിക്ക്​ ആരംഭിച്ച ഫിഫ ലോകകപ്പ്​ ടിക്കറ്റിനുള്ള ബുക്കിങ്ങാണ്​ വ്യാഴാഴ്ച ഉച്ച കഴിയുമ്പോഴേക്കും റെക്കോഡ്​ അപേക്ഷകരിലെത്തിയത്​. ​ഏറ്റവും കൂടുതൽ അപേക്ഷകർ, ആതിഥേയരായ ഖത്തറിൽ നിന്നാണ്​. അർജന്‍റീന, മെക്സികോ, അമേരിക്ക, യു.എ.ഇ, ഇംഗ്ലണ്ട്​, ഇന്ത്യ, സൗദി അറേബ്യ, ബ്രസീൽ, ഫ്രാൻസ്​ എന്നീ രാജ്യങ്ങളാണ്​ തൊട്ടുപിന്നിലായുള്ളത്​.

​ഡിസംബർ 18ന്​ ലുസൈൽ സ്​റ്റേഡിയത്തിൽ നടക്കുന്ന ഫൈനൽ മത്സരത്തിനാണ്​ ഏറ്റവും കൂടുതൽ ആവശ്യക്കാർ. 1.40 ലക്ഷം ടിക്കറ്റ്​ അപേക്ഷകളാണ്​ ഫൈനലായുള്ളത്​. നവംബർ 21ന്​ അൽ ബെയ്ത്​ സ്​റ്റേഡിയത്തിൽ നടക്കുന്ന ​ഉദ്​ഘാടന മത്സരത്തിന്​ 80,000 ടിക്കറ്റുകളാണ്​ ബുക്​ ചെയ്തത്​.

ബുധനാഴ്ച ഉച്ചയോടെ ആരംഭിച്ച ലോകകപ്പിന്‍റെ ഒന്നാം ഘട്ട ടിക്കറ്റ്​ ബുക്കിങ്ങിന്​ ലോകമെങ്ങുംനിന്നുള്ള ഫുട്​ബാൾ ആരാധകരിൽനിന്ന്​ ആവേശകരമായ പ്രതികരണമാണുണ്ടായത്​. ഫെബ്രുവരി എട്ടിന്​ ഉച്ച ഒരു മണിവരെയാണ്​ ടിക്കറ്റ്​ ബുക്കിങ്ങിനുള്ള സമയം.

തുടർന്ന്​ മാർച്ച്​ എട്ടിന്​ ശേഷം റാൻഡം നറുക്കെടുപ്പിലൂടെ ടിക്കറ്റിന്​ അർഹരായവരെ തെരഞ്ഞെടുക്കുന്നതാണ്​ രീതി. ആദ്യ ദിവങ്ങളിലും, അവസാന ദിവസങ്ങളിലും ടിക്കറ്റ്​ ബുക്ക്​ ചെയ്യുന്നവർക്ക്​ ഒരേ പരിഗണനയാണ്​ നൽകുക. ​

30 വർഷത്തെ ലോകകപ്പ്​ ചരിത്രത്തിൽ ഏറ്റവും കുറഞ്ഞ്​ നിരക്കിലുള്ള ടിക്കറ്റുകൾ ലഭ്യമാക്കുന്ന വിശ്വഫുട്​ബാൾ മേള എന്ന റെക്കോഡും 2022 ഖത്തർ ലോകകപ്പിനുണ്ട്​. ​ടിക്കറ്റ്​ ബുക്കിങ്ങിന്‍റെ രണ്ടാം ഘട്ടം ഏപ്രിൽ ഒന്നിന്​ ടൂർണമെന്‍റ്​ നറുക്കെടുപ്പിന്​ പിന്നാലെ ആരംഭിക്കും.