ഖത്തറിൽ ഹിതപരിശോധന നാളെ; ഇന്ത്യൻ സ്കൂളുകൾ ഉൾപ്പെടെ വിദ്യാലയങ്ങൾക്ക് അവധി

ദോ​ഹ: ഭ​ര​ണ​ഘ​ട​ന ഭേ​ദ​ഗ​തി​യിൽ ഹി​ത​പ​രി​ശോ​ധ​ന നടക്കുന്ന ചൊവ്വാഴ്​ച ഖത്തറിൽ സർക്കാർ, സ്വകാര്യ മേഖലകളിലെ സ്​കൂളുകൾക്ക്​ അവധി പ്രഖ്യാപിച്ച്​ വിദ്യഭ്യാസ, ഉന്നത വിദ്യഭ്യാസ മന്ത്രാലയം. അധ്യാപകരും അനധ്യാപകരും ഉൾപ്പെടെ സ്​കൂൾ ജീവനക്കാർക്കും അവധിയായിരിക്കുമെന്ന്​ മന്ത്രാലയം അറിയിച്ചു.

ഇന്ത്യൻ സ്കൂളുകൾക്കും അവധി ബാധകമായിരിക്കും. രാജ്യത്തെ മുഴുവൻ പൗരന്മാർക്കും ഹിതപരിശോധനയിൽ പ​ങ്കെടുത്ത്​ വോട്ട് ചെയ്യാൻ സൗകര്യമൊരുക്കുന്നതിന്‍റെ ഭാഗമായാണ്​ അവധി പ്രഖ്യാപിച്ചത്​. അതേസമയം, സർവകലാശാലകൾ ഉൾപ്പെടെ ഉന്നത വിദ്യഭ്യാസ സ്​ഥാപനങ്ങൾക്ക്​ ഇത് ​ബാധകമല്ലെന്ന്​ മന്ത്രാലയം അറിയിച്ചു.

ഭരണഘടന ഭേദഗതി സംബന്ധിച്ച നിർദേശത്തിൽ ചൊവ്വാഴ്​ച രാവിലെ ഏഴ്​ മുതൽ രാത്രി ഏഴു വരെയാണ്​ ഖത്തറിൽ ഹിതപരിശോധന നടത്തുന്നത്​. 18 വയസ്സ്​ തികഞ്ഞ മുഴുവൻ പൗരന്മാരും വോ​ട്ടെടുപ്പിൽ പ​ങ്കെടുത്ത്​ അഭിപ്രായം രേഖപ്പെടുത്തണമെന്ന്​ ജ​ന​റ​ൽ റ​ഫ​റ​ണ്ടം ക​മ്മി​റ്റി ആവശ്യപ്പെട്ടു.

രാജ്യത്തിന്‍റെ വിവിധ ഭാഗങ്ങളിലായി 28 പോളിങ്​ സ്​റ്റേഷനുകൾ, ഓൺലൈൻ വോട്ട്​ ചെയ്യാനുള്ള സൗകര്യങ്ങൾ, രോഗികൾ ഉൾപ്പെടെയുള്ളവർക്ക്​ വോ​ട്ട്​ ചെയ്യാനുള്ള മൊബൈൽ പോളിങ്​ സ്​റ്റേഷൻ ഉൾപ്പെടെ വിപുലമായ സൗകര്യങ്ങളാണ്​ അധികൃതർ ഒരുക്കിയത്​.