ഹമദ്, റുവൈസ്​ തുറമുഖങ്ങളിൽ പ്രത്യേക പരിസ്ഥിതി നിരീക്ഷണ സംവിധാനം

ദോഹ: ഹമദ് തുറമുഖത്തും റുവൈസ്​ തുറമുഖത്തും പരിസ്​ഥിതി നിരീക്ഷണത്തിനായി മുനിസിപ്പാലിറ്റി പരിസ്​ഥിതി മന്ത്രാലയം പ്രത്യേക ഉപകരണം സ്​ഥാപിച്ചു. ഖത്തർ പോർട്ട്സ്​ മാനേജ്മെൻറ് കമ്പനിയുമായി (മവാനി ഖത്തർ) സഹകരിച്ച് പരിസ്​ഥിതി നിരീക്ഷണ, ലബോറട്ടറി വകുപ്പാണ് വെള്ളത്തിന് മേൽ പൊങ്ങിക്കിടക്കുന്ന നാല് ഉപകരണങ്ങൾ സ്​ഥാപിച്ചിരിക്കുന്നത്. രണ്ട് തുറമുഖങ്ങളിലുമായി രണ്ട് വീതം ഉപകരണങ്ങളാണ് പ്രവർത്തിപ്പിക്കുന്നത്.

2022 ദേശീയ സ്​ട്രാറ്റജിയുടെ ഭാഗമായി തീര, സമുദ്രജല ഗുണമേന്മ നിരീക്ഷിക്കുന്നതിനുള്ള പ്രത്യേക പദ്ധതിയുടെ ഭാഗമായാണ് പുതിയ സംവിധാനം സ്​ഥാപിച്ചിരിക്കുന്നത്. ദേശീയ നിലവാരത്തിനും സമുദ്ര പരിസ്​ഥിതി സുസ്​ഥിരതക്കും അനുസരിച്ച് തീര, സമുദ്രജല ഗുണമേന്മ വർധിപ്പിക്കുകയാണ് ലക്ഷ്യം. കൂടാതെ സമുദ്ര പരിസ്​ഥിതിക്ക് ആഘാതം സൃഷ്​ടിക്കുന്ന വികസന പ്രവർത്തനങ്ങളോ നിർമാണങ്ങളോ നിരീക്ഷിക്കുകയും ചെയ്യുകയെന്നതും ഇതിലൂടെ ലക്ഷ്യമിടുന്നു. കടൽ പരിസ്​ഥിതിയിൽ എന്തെങ്കിലും തടസ്സങ്ങൾ രൂപപ്പെട്ടാലും മലിനീകരണം സംഭവിച്ചാലും വളരെ നേരത്തേ മുന്നറിയിപ്പ് നൽകുന്ന സംവിധാനമായും ഈ ഉപകരണങ്ങൾ പ്രവർത്തിക്കും.