ആരോഗ്യ പ്രവർത്തകർക്ക്​ ആദരവുമായി സ്​റ്റാർസ്​ ലീഗിന് തിരിച്ചുവരവ്

ദോഹ: കോവിഡ് –19 രോഗവ്യാപനത്തെ തുടർന്ന് നിർത്തിവെച്ച ഖത്തർ സ്​റ്റാർസ്​ ലീഗ് മത്സരങ്ങൾ പുനരാരംഭിച്ചു. രാജ്യത്തിൻെറ രോഗ​പ്രതിരോധത്തിൽ മുൻനിരപ്പോരാളികളായ ആരോഗ്യപ്രവർത്തകർക്ക്​ ആദരമർപ്പിച്ചായിരുന്നു തുടക്കം. വക്റയിലെ ലോകകപ്പ് സ്​റ്റേഡിയമായ അൽ ജനൂബ് സ്​റ്റേഡിയത്തിൽ ക്ലബ് താരങ്ങൾ ആരോഗ്യ പ്രവർത്തകർക്ക് ആദരമർപ്പിച്ച പ്രത്യേക ജെഴ്സിയണിഞ്ഞാണ് വാം അപ്പിനിറങ്ങിയത്. സ്​റ്റെതസ്​കോപ്​ കഴുത്തിൽ അണിഞ്ഞുവെന്ന്​ തോന്നിക്കുന്ന ജഴ്​സിയായിരുന്നു ഇത്​.

ഖത്തർ സ്​റ്റാർസ്​ ലീഗ് മത്സരങ്ങൾ നാല് മാസങ്ങൾക്ക് മുമ്പാണ്​ നിർത്തിവെച്ചത്​. കോവിഡ് –19 മഹാമാരിയിൽ നിന്ന് ഖത്തറിനെ രക്ഷിക്കുന്നതിൽ പ്രധാന പങ്കുവഹിച്ച ആരോഗ്യപ്രവർത്തകർക്കുള്ള ആദരം കൂടിയായി സ്​റ്റാർസ്​ ലീഗിൻെറ പുനരാരംഭം. എന്നാൽ, ഗ്രൗണ്ടിൽ വീണ്ടും കാൽപന്ത് കളി ആരവമുയർന്നെങ്കിലും കാണികൾക്ക് പ്രവേശനത്തിന് വിലക്കേർപ്പെടുത്തിയിരുന്നു. ക്യു.എസ്.​എൽ േപ്രാട്ടോകോൾ പ്രകാരമാണിത്. വെള്ളിയാഴ്ച നടന്ന സ്​റ്റാർസ്​ ലീഗ് മത്സരങ്ങളിൽ അൽ ഗറാഫ, അൽ റയ്യാൻ ടീമുകൾക്കാണ്​ ജയം.

അൽ ജനൂബ് സ്​റ്റേഡിയത്തിൽ നടന്ന മത്സരത്തിൽ അൽ അറബിക്കെതിരെ ഏകപക്ഷീയമായ ഒരു ഗോളിനായിരുന്നു അൽ ഗറാഫയുടെ ജയം. ഗറാഫക്കായി ജൊനാഥൻ കൊജിയയാണ് ലക്ഷ്യം കണ്ടത്. സദ്ദിലെ ജാസിം ബിൻ ഹമദ് സ്​റ്റേഡിയത്തിൽ നടന്ന മറ്റൊരു മത്സരത്തിൽ ഒന്നിനെതിരെ രണ്ട് ഗോളുകൾക്ക് ഖത്തർ സ്​പോർട്സ്​ ക്ലബിനെതിരെ അൽ റയ്യാൻ വിജയം വരിച്ചു. റയ്യാന് വേണ്ടി യാസിൻ ബ്രാഹിമി, യോഹാൻ ബോലി എന്നിവർ വല കുലുക്കിയപ്പോൾ, കെയ്ക് റോഡ്രിഗസി​​െൻറ വകയായിരുന്നു ഖത്തർ സ്​പോർട്സ്​ ക്ലബി​​െൻറ ഗോൾ.