സുസ്ഥിരത: ജി.എസ്​.എ.എസ്​ ഗോൾഡ് റേറ്റിങ്​ നേടി ലുലു ഹൈപർമാർക്കറ്റ്

ദോഹ: ലുലു ഹൈപർമാർക്കറ്റിന്​ സുസ്ഥിര പ്രവർത്തനങ്ങൾക്കുള്ള അന്താരാഷ്​ട്ര ഗോൾഡ് റേറ്റിങ്​ ബഹുമതി. ഗൾഫ് ഓർഗനൈസേഷൻ ഫോർ റിസർച് ആൻഡ് ഡെവലപ്മെൻറ് നൽകുന്ന ജി.എസ്​.എ.എസ്​ (ഗ്ലോബൽ സസ്​റ്റെയ്​നബിലിറ്റി അസസ്​മെൻറ് സിസ്​റ്റം) ഗോൾഡൻ റേറ്റിങ്ങാണ് ലുലു നേടിയത്​. മിഡിലീസ്​റ്റും ഉത്തരാഫ്രിക്കയും ഉൾപ്പെടുന്ന മിന മേഖലയിൽനിന്ന്​ ബഹുമതി കരസ്ഥമാക്കുന്ന പ്രഥമ റീട്ടെയിലറായി ലുലു ഇനി അറിയപ്പെടും. സുസ്ഥിരമേഖലയിലെ വിദഗ്ധരുടെ ഓഡിറ്റിങ്ങിൽ ഗോൾഡ് റേറ്റിങ്ങിനാവശ്യമായ 1.51 എന്ന സ്​കോർ ലുലു ഹൈപർമാർക്കറ്റ് കരസ്ഥമാക്കി. അൽ മെസീല ബ്രാഞ്ചിൽ നടന്ന ചടങ്ങിൽ ലുലു ഗ്രൂപ് ഇൻറർനാഷനൽ ഡയറക്ടർ ഡോ. മുഹമ്മദ് അൽത്താഫ് സർട്ടിഫിക്കറ്റും ഫലകവും ഏറ്റുവാങ്ങി.

കാർബൺ ഫൂട്ട്പ്രിൻറുകൾ കുറക്കുന്നതിന് ലുലു ഗ്രൂപ്പി​െൻറ സംരംഭങ്ങൾ പ്രശംസനീയാർഹമാണെന്ന് ഗോർഡ് ഫൗണ്ടിങ്​ ചെയർമാൻ ഡോ. യൂസുഫ് അൽഹോർ പറഞ്ഞു. ഇതിലൂടെ സുസ്ഥിര പ്രവർത്തനങ്ങൾ ജീവിതത്തിൽ തെരഞ്ഞെടുക്കുന്നതിന് ഉപഭോക്താക്കൾ കൂടുതൽ ബോധവത്​കരിക്കപ്പെട്ടിട്ടുണ്ട്​. പരിസ്ഥിതി സു​സ്ഥിരത ഉൾപ്പെടുത്തിക്കൊണ്ടുള്ള ലുലു ഹൈപർമാർക്കറ്റി​െൻറ നിരന്തര പ്രവർത്തനങ്ങൾക്കുള്ള അംഗീകാരമാണ് ജി.എസ്.എസ്​ ഗോൾഡ് റേറ്റിങ്ങെന്നും അദ്ദേഹം പറഞ്ഞു.

ബഹുമതി സ്വീകരിക്കാനായതിൽ ഏറെ സന്തോഷവും അഭിമാനവുമുണ്ടെന്ന് ഡോ. മുഹമ്മദ് അൽത്താഫ് പറഞ്ഞു. പ്രവർത്തനങ്ങൾ സുസ്ഥിരമാക്കുന്നതിനുള്ള പ്രയത്നത്തിലെ സുപ്രധാന നാഴികക്കല്ലാണിത്​.

2030ഓടെ പരിസ്​ഥിതി ആഘാതം ചുരുക്കുന്നതിനും കാർബൺ ഫൂട്ട്പ്രിൻറ് കുറക്കുന്നതിനും 2050ഓടെ കാർബൺ ന്യൂട്രാലിറ്റി നേടുകയെന്ന ലക്ഷ്യം വെച്ചും നിരവധി പ്രവർത്തനങ്ങളാണ് ലുലു നടത്തിക്കൊണ്ടിരിക്കുന്നതെന്നും അദ്ദേഹം കൂട്ടിച്ചേർത്തു. കാർബൺ പുറന്തള്ളപ്പെടുന്നത് പരമാവധി കുറക്കുക, പാക്കിങ്ങിന് പ്ലാസ്​റ്റിക് കവറുകളുടെ ഉപയോഗം കുറക്കുക, ഭക്ഷണവും കുടിവെള്ളവും പാഴാകുന്നത് കുറക്കുക തുടങ്ങിയവ ലുലുവിനെ സംബന്ധിച്ച് പ്രധാന വിഷയങ്ങളാണ്​.

പുനരുപയോഗം (റീസൈക്ലിങ്) പോലെയുള്ള സുസ്​ഥിര നടപടികൾ നടപ്പാക്കുകയെന്നതും ലക്ഷ്യമാണ്​. റിവേഴ്സ്​ വെൻഡിങ്​ മെഷീൻ, വെർട്ടിക്കിൾ ഫാമിങ്​ തുടങ്ങിയ അതിനൂതന മേഖലകളിലും ശ്രദ്ധ കേന്ദ്രീകരിക്കുന്നുണ്ട്​.ഗൾഫ് ഓർഗനൈസേഷൻ ഫോർ റിസർച് ആൻഡ് ഡെവലപ്മെൻറുമായി 2019ലാണ് ലുലു കൈകോർത്തത്​.കഴിഞ്ഞ രണ്ട് വർഷങ്ങളിലായി പ്രവർത്തനങ്ങളിൽ വലിയ പങ്കാളിത്തമാണ് ഉള്ളതെന്നും അദ്ദേഹം ചൂണ്ടിക്കാട്ടി.