ഖത്തറിൽ കസ്​റ്റംസ്​ ട്രെയിനിങ് സെൻറർ ഇനി മേഖലാ കേന്ദ്രം

ദോഹ: ഖത്തർ ജനറൽ കസ്​റ്റംസ്​ അതോറിറ്റിയുടെ (ജി.എ.സി) കസ്​റ്റംസ്​ ട്രെയിനിങ് സെൻറർ, റീജനൽ ട്രെയിനിങ് കേന്ദ്രമായി വേൾഡ് കസ്​റ്റംസ്​ ഓർഗനൈസേഷൻ (ഡബ്ല്യൂ.സി.ഒ). ഉന്നത അന്താരാഷ്ട്ര മാനദണ്ഡങ്ങളോടെ പ്രവർത്തിക്കുന്ന ട്രെയിനിങ് സെൻറർ, റീജനൽ കേന്ദ്രമാക്കുന്നതുമായി ബന്ധപ്പെട്ട ധാരണപത്രത്തിൽ ജി.എ.സിയും ഡബ്ല്യൂ.സി.ഒയും തമ്മിൽ ഒപ്പുവെച്ചു. കസ്​റ്റംസ്​ മേഖലയിൽ ഉദ്യോഗസ്​ഥർക്ക് വിദഗ്ധ പരിശീലനം നൽകുന്നതിൽ റീജനൽ കേന്ദ്രം പ്രധാന പങ്കുവഹിക്കുമെന്നും വളരെ സുപ്രധാനമായ ചടങ്ങിനാണ് നാം സാക്ഷ്യംവഹിച്ചതെന്നും ജി.എ.സി ചെയർമാൻ അഹ്മദ് ബിൻ അബ്ദുല്ല അൽ ജമാൽ പറഞ്ഞു. മേഖലയിലെ കസ്​റ്റംസ്​ സംബന്ധമായ പ്രവർത്തനങ്ങൾ കൂടുതൽ കാര്യക്ഷമമാക്കുന്നതിലും മാനവിക വിഭവശേഷി കൂടുതൽ ശക്തമാക്കുന്നതിനുമുള്ള പ്രാധാന്യത്തെയാണ് അംഗീകാരം സൂചിപ്പിക്കുന്നതെന്നും ആഗോള വാണിജ്യമേഖല കൂടുതൽ വികസിച്ചുവെന്നും അതിനാൽ കൂടുതൽ നടപടികൾ സ്വീകരിക്കേണ്ടിയിരിക്കുന്നുവെന്നും അഹമ്മദ് അൽ ജമാൽ കൂട്ടിച്ചേർത്തു. ഖത്തർ കസ്​റ്റംസ്​ ട്രെയ്​നിങ് സെൻറർ 2007ൽ സ്​ഥാപിച്ചത് മുതലുള്ള നിരന്തര പരിശ്രമങ്ങളുടെയും തുടർനേട്ടങ്ങളുടെയും ഫലമാണ് റീജനൽ കേന്ദ്രമായി ഉയർത്തിയ അംഗീകാരമെന്നും അദ്ദേഹം ചൂണ്ടിക്കാട്ടി. ഉന്നതതല റീജനൽ ശിൽപശാലകളും പരിശീലന കോഴ്സുകളും സംഘടിപ്പിക്കുന്നതിൽ കേന്ദ്രത്തിന് വലിയ പരിചയസമ്പത്തുണ്ടെന്നും അദ്ദേഹം സൂചിപ്പിച്ചു. ഖത്തർ കസ്​റ്റംസ്​ട്രെയിനിങ് സെൻററി‍െൻറ നേട്ടത്തിൽ വേൾഡ് കസ്​റ്റംസ്​ ഓർഗനൈസേഷൻ സെക്രട്ടറി ജനറൽ ഡോ. കുനിയോ മികുരിയ പ്രശംസ അറിയിച്ചു. ലോകത്തിൽ തന്നെ കസ്​റ്റംസ്​ സംബന്ധമായ പ്രവർത്തനങ്ങളിൽ ഖത്തറിലെ റീജനൽ കേന്ദ്രം മാതൃകയായി മാറുമെന്നാണ് പ്രതീക്ഷിക്കുന്നതെന്നും അദ്ദേഹം പറഞ്ഞു.