ദൗത്യം പൂർത്തിയാക്കി താഴുവീണു

ദോഹ: ഖത്തറി​െൻറ കോവിഡ്​ പോരാട്ടത്തിൽ മഹത്തായ ദൗത്യം പൂർത്തിയാക്കി ലോകത്തെ തന്നെ ഏറ്റവും വിശാലമായ വാക്​സിനേഷൻ കേന്ദ്രം പ്രവർത്തനം അവസാനിപ്പിച്ചു. രാജ്യത്തെ വ്യവസായ, വാണിജ്യ, നിർമാണ മേഖലകളിലെ മുഴുവൻ തൊഴിലാളികൾക്കും ഏറ്റവും വേഗത്തിൽ വാക്​സിൻ നൽകുക എന്ന ലക്ഷ്യത്തോടെ ആരംഭിച്ച ഇൻഡസ്​ട്രിയൽ ഏരിയ സെൻററാണ്​ കഴിഞ്ഞ ദിവസത്തോടെ ദൗത്യം പൂർത്തിയാക്കി അടച്ചുപൂട്ടിയത്​. ആരോഗ്യ മന്ത്രാലയമാണ്​ ഇക്കാര്യം അറിയിച്ചത്​. അതേസമയം, രാജ്യത്തെ പ്രാഥമികാരോഗ്യ കേന്ദ്രങ്ങൾ വഴിയുള്ള വാക്​സിനേഷൻ കാമ്പയിൻ തുടരും.

കഴിഞ്ഞ ഏപ്രിലിൽ പ്രവർത്തനം ആരംഭിച്ച ഇൻഡസ്​ട്രിയൽ ഏരിയ വാക്​സിനേഷൻ സെൻറർ വഴി 16 ലക്ഷം ഡോസ്​ വാക്​സിൻ വിതരണം ചെയ്​തു. 300 വാക്​സി​ൻ സ്​റ്റേഷനുകൾ ഒരുക്കിയാണ്​ ലോകത്തെ തന്നെ ഏറ്റവും വിശാലമായ കോവിഡ്​ പ്രതിരോധ കുത്തിവെപ്പ്​ കൗണ്ടർ അധികൃതർ സജ്ജീകരിച്ചത്​.

ലോകശ്രദ്ധ നേടിയ ദൗത്യം രാജ്യത്തി​െൻറ അതിവേഗ വാക്​സിനേഷൻ പ്രവർത്തനത്തിന്​ ഊർജം പകരുന്നതായിരുന്നു. 700 മെഡിക്കൽ ജീവനക്കാരുടെ സേവനം ലഭ്യമാക്കിയിരുന്ന കേന്ദ്രത്തിൽ പ്രതിദിനം 25,000 ഡോസ്​ വരെ നൽകിയിരുന്നു.

തൊഴിലാളികളില്‍ ഭൂരിഭാഗം പേര്‍ക്കും വാക്സിന്‍ ലഭ്യമാക്കിയതോടെയാണ് സെൻറര്‍ പ്രവര്‍ത്തനം അവസാനിപ്പിക്കുന്നത്. കോവിഡ് നിയന്ത്രണവിധേയമാക്കി ജനജീവിതം സാധാരണ നിലയിലേക്ക് കൊണ്ടുവരുന്നതില്‍ സെൻററി‍െൻറ പ്രവര്‍ത്തനം നിര്‍‌ണായകമായിരുന്നുവെന്നും ഇതില്‍ അഭിമാനമുണ്ടെന്നും സെൻറര്‍ മേധാവികളിലൊരാളായ ഡോ. ഖാലിദ് അബ്​ദുന്നൂര്‍ പറഞ്ഞു.

പൊതുജനാരോഗ്യ കേന്ദ്രം, ആരോഗ്യ മന്ത്രാലയം, പ്രൈമറി ഹെല്‍ത്ത് സെൻറര്‍ കോര്‍പറേഷന്‍ തുടങ്ങിയവയുടെ സംയുക്ത സഹകരണത്തോടെയായിരുന്നു കേന്ദ്രത്തി​െൻറ പ്രവർത്തനം.

നിലവിൽ ഖത്തറിൽ രണ്ടു ഡോസ്​ വാക്​സിനേഷൻ ഏതാണ്ട്​ പൂർത്തിയായിക്കഴിഞ്ഞു. 12 വയസ്സിന്​ മുകളിലുള്ളവർക്കാണ്​ വാക്​സിൻ നൽകുന്നത്​. 50ന്​ മുകളിൽ പ്രായമുള്ളവരിൽ രണ്ട്​ ഡോസ്​ സ്വീകരിച്ച്​ എട്ടുമാസം കഴിഞ്ഞ വിഭാഗങ്ങൾക്ക്​ ബൂസ്​റ്റർ ഡോസ്​ വാക്​സിനും നൽകിത്തുടങ്ങി. 47.85 ലക്ഷം വാക്​സിൻ ഡോസുകളാണ്​ ഇതുവരെ രാജ്യത്ത്​ വിതരണം ചെയ്​തത്​.