ആകെ പൊടിപടലം

ദോഹ: തുടർച്ചയായ ദിവസങ്ങളിൽ ആഞ്ഞുവീശുന്ന പൊടിക്കാറ്റിൽ ജനജീവിതവും ദുസ്സഹമാവുന്നു. റോഡ്​ ഗതാഗതവും യാത്രയും വരെ ദുരിതത്തിലാക്കിയാണ്​ കഴിഞ്ഞ ദിവസങ്ങളിൽ പൊടിക്കാറ്റ്​ വീശിയടിക്കുന്നത്​. ഖത്തർ ഉൾപ്പെടെ ഗൾ​ഫ്​ മേഖലയിലാകെ ഏതാനും ദിവസങ്ങളിലായി കാലാവസ്ഥാ മാറ്റത്തിന്‍റെ ഭാഗമായി കാറ്റ്​ വീശുന്നുണ്ട്​.

കലാവാസ്ഥാ വിഭാഗം കഴിഞ്ഞ ദിവസങ്ങളിൽ നടത്തിയ പ്രവചനങ്ങൾ പൂർണമായും ശരിവെച്ചുകൊണ്ടായിരുന്നു ​തിങ്കൾ, ചൊവ്വ ദിവസങ്ങളിൽ അന്തരീക്ഷത്തിലെ മാറ്റങ്ങൾ. കാഴ്​ചാ പരിധി തീരെ കുറഞ്ഞത്​ പലയിടങ്ങളിലും ഗതാഗതക്കുരുക്കിനും കാരണമായി. ട്രാഫിക്​ വിഭാത്തിന്‍റെ നേതൃത്വത്തിൽ വിവിധ റോഡുകളി​ലെ സൂചനാബോർഡുകളിൽ ഡ്രൈവർമാർക്കും യാത്രക്കാർക്കും ആവർത്തിച്ച്​ നിർദേശങ്ങളും നൽകുന്നുണ്ട്. കാഴ്ചാ പരിധി കുറഞ്ഞതിനാൽ വേഗത കുറച്ച്​ സഞ്ചരിക്കണമെന്നും, കാറ്റ്​ പലമേഖലകളിലും ശക്​തമായി വീശുമെന്നും അറിയിച്ചു.

​കഴ്ച നാല്​ മുതൽ എട്ട്​ കി.മീ വരെയും, രണ്ട്​ കി.മീറ്റിനും താഴെയായി ചുരുങ്ങുമെന്നും മുന്നറിയിപ്പ്​ നൽകി. ചിലയിടങ്ങളിൽ ചൊവ്വാഴ്​ച കാഴ്ച പരിധി പൂജ്യത്തിലേക്ക്​ താഴ്ന്നതായും കാലാവസ്ഥാ വിഭാഗം ട്വിറ്ററിലൂടെ അറിയിച്ചു.

പൊടിക്കാറ്റിനൊപ്പം ചൂടും വർധിക്കുകയാണ്​. ചൊവ്വാഴ്ച പകൽ താപനില 41 ഡിഗ്രി സെൽഷ്യസാണ്​ രേഖപ്പെടുത്തിയത്​.

ഈയാഴ്ച വടക്കു പടിഞ്ഞാറൻ കാറ്റ്​ ശക്​തമാവുന്നതിനാൽ വൈകുന്നേരങ്ങളിലെ കാഴ്ച തീരെകുറയുമെന്ന്​ കാലാവസ്ഥാ വിഭാഗം ആവർത്തിച്ചു. ​

തെക്കൻ ഇറാഖിൽ നിന്നാരംഭിക്കുന്ന കാറ്റാണ്​ കുവൈത്തും ഖത്തറും ഉൾപ്പെടെ ഗൾഫ്​രാജ്യങ്ങളിലേക്ക്​ പൊടിപടലം പടർത്തി ആഞ്ഞു വീശുന്നത്​.

പൊടിക്കാറ്റിൽ സൂക്ഷിക്കുക

അത്യാവശ്യത്തിനു മാത്രം പുറത്തിറങ്ങുക.

പ്രായമായവരും ശ്വാസകോശ സംബന്ധമായ രോഗമുള്ളവരും പുറത്തേക്ക് യാത്ര ചെയ്യുന്നത് ഒഴിവാക്കണം.

മൂക്ക്, കണ്ണ് എന്നിവയ്ക്ക് അടുത്തിടെ ശസ്ത്രക്രിയ നടത്തിയവര്‍ നേരിട്ട് പൊടി തട്ടുന്നത് ഒഴിവാക്കുക.

പൊടിക്കാറ്റ്​ വീ​ശുമ്പോൾ മാസ്ക്​ അണിയുക, പതിവായി മുഖം കഴുകുക