ജൂലൈ 15 ഓർമയിൽ തുർക്കി എംബസി

ദോഹ: തുർക്കിയിലെ പരാജയപ്പെട്ട സൈനിക അട്ടിമറി ശ്രമത്തിൻെറ അഞ്ചാം വാർഷികത്തിൻെറ സ്​മരണപുതുക്കി ഖത്തറിലെ തുർക്കി എംബസി. 2016 ജൂലൈ 15നായിരുന്നു പ്രസിഡൻറ്​ റജബ്​ ത്വയിബ്​ ഉർദുഗാൻ സർക്കാറിനെതിരെ പട്ടാളത്തിലെ ഒരുവിഭാഗത്തിൻെറ നേതൃത്വത്തിൽ അട്ടിമറി ശ്രമം നടന്നത്​. ​

ഖത്തറിലെ തുർക്കി അംബാസഡർ മുസ്​തഫ ഗോക്​സുവിൻെറ നേതൃത്വത്തിൽ നടന്ന ചടങ്ങിൽ എറിത്രിയ സ്​ഥാനപതി ഫാഹിദ്​ സലിം അൽ മെറി, മറ്റു നയതന്ത്ര പ്രതിനിധികൾ, വിവിധ രാജ്യങ്ങളുടെ പ്രതിനിധികൾ എന്നിവർ പ​ങ്കെടുത്തു. സൈനിക അട്ടിമറിക്കിടെ കൊല്ലപ്പെട്ട രണ്ട്​ പേരുടെ കുടുംബാംഗങ്ങളും ദോഹയിൽ നടന്ന ചടങ്ങിൽ എത്തിയിരുന്നു. സംഭവത്തിൽ മരിച്ച 251 ​േപരോടുള്ള ആദരസൂചകമായി ഒരു മിനിറ്റ്​ മൗനം ആചരിച്ച ശേഷമാണ്​ ചടങ്ങുകൾ ആരംഭിച്ചത്​. നിർണായക സന്ദർഭത്തിൽ രാജ്യത്തിന്​ പിന്തുണ നൽകിയ ഖത്തർ ഭരണകൂടത്തിനുള്ള നന്ദി അംബാസഡർ അറിയിച്ചു.