അഫ്ഗാൻ സമാധാന ചർച്ച: ഖത്തറിന് യു.എൻ രക്ഷാസമിതിയുടെ പ്രശംസ

ദോഹ: സെപ്​റ്റംബർ 12ന് ദോഹയിൽ ആരംഭിച്ച അഫ്ഗാൻ സമാധാന ചർച്ചകൾക്ക് സൗകര്യമൊരുക്കിയ ഖത്തറിന് ഐക്യരാഷ്​ട്രസഭ രക്ഷാസമിതിയുടെ പ്രശംസ. അഫ്ഗാൻ സമാധാന ചർച്ചകൾ ദോഹയിൽ ആരംഭിച്ചത് സ്വാഗതം ചെയ്യുകയാണെന്നും അഫ്ഗാനിസ്​താെൻറ പരമാധികാരം, സ്വാതന്ത്ര്യം, ദേശീയ ഐക്യം എന്നിവ ഉറപ്പുവരുത്തുന്നതിന് രക്ഷാസമിതി പ്രതിജ്ഞാബദ്ധമാണെന്നും വാർത്താകുറിപ്പിൽ വ്യക്തമാക്കി.

സമഗ്രവും സുതാര്യവുമായ സമാധാന പ്രക്രിയകളിലൂടെ മാത്രമേ സുസ്​ഥിര സമാധാനം പുലരുകയുള്ളൂ. അഫ്ഗാനിലെ സംഘർഷങ്ങൾ അവസാനിപ്പിക്കുന്നതിന് സ്​ഥിരമായതും സമഗ്രവുമായ വെടിനിർത്തലും രാഷ്​ട്രീയ ഒത്തുതീർപ്പും അനിവാര്യമാണ്​. അതിക്രമങ്ങൾ അവസാനിപ്പിക്കുന്നതുൾപ്പെടെയുള്ളവ സ്വീകരിച്ച് സമാധാനം പുലരുന്നത് വരെ എല്ലാ കക്ഷികളും ചർച്ചകളും സംവാദങ്ങളും തുടരണമെന്നും രക്ഷാസമിതി ആഹ്വാനംചെയ്തു.

അഫ്ഗാനിൽ സമാധാനം പുനഃസ്​ഥാപിക്കുന്നതിൽ ഐക്യരാഷ്​ട്രസഭയുടെ പങ്ക് വലുതാണ്. അഫ്ഗാൻ ചർച്ചകൾക്കായി സൗകര്യമൊരുക്കുന്ന എല്ലാ മേഖല-അന്തർദേശീയ കക്ഷികളുടെയും ശ്രമങ്ങളെ സ്വാഗതം ചെയ്യുകയാണ്. അഫ്ഗാനിസ്​താനിൽ സമാധാനം സ്​ഥാപിക്കുന്നതിൽ മധ്യസ്​ഥത വഹിക്കുന്ന, അതിന് സൗകര്യം ചെയ്യുന്ന ഖത്തറിന് നന്ദി അറിയിക്കുകയാണെന്നും യു.എൻ രക്ഷാസമിതി അംഗരാജ്യങ്ങൾ വ്യക്തമാക്കി.

2020ലെ 2513ാം നമ്പർ പ്രമേയം നടപ്പാക്കുന്നതിെൻറ പ്രാധാന്യവും സമിതി ചൂണ്ടിക്കാട്ടി. അഫ്ഗാനിസ്​താനിലെ വിവിധ കക്ഷികൾക്കിടയിൽ ചർച്ചകൾ ആരംഭിക്കുന്നതിനും സംഘട്ടനങ്ങൾ അവസാനിപ്പിക്കുന്നതിനുമായി കഴിഞ്ഞ മാർച്ചിലാണ് പ്രമേയം അവതരിപ്പിച്ചത്.

19 വർഷമായി തുടരുന്ന അഫ്​ഗാൻ യുദ്ധം അവസാനിപ്പിച്ച്​ രാജ്യത്ത്​ സമാധാനം സ്​ഥാപിക്കാനായുള്ള ചരിത്രപ്രധാനമായ ചർച്ചകളാണ്​ ദോഹയിൽ പുരോഗമിക്കുന്നത്​.

അഫ്​ഗാൻ സർക്കാറും താലിബാനും തമ്മിൽ​ ഖത്തറി​െൻറ മധ്യസ്​ഥതയിൽ ഒരു മേശക്കു ചുറ്റുമിരിക്കുന്ന ചർച്ച ഇതാദ്യമായാണ്​ നടക്കുന്നത്​. കഴിഞ്ഞ ശനിയാഴ്​ച നടന്ന ഉദ്​ഘാടന സെഷനിൽ യു.എസ്​ സ്​റ്റേറ്റ്​ സെക്രട്ടറി മൈക്​ പോംപിയോ, ഖത്തർ വിദേശകാര്യമന്ത്രിയും ഉപപ്രധാനമന്ത്രിയുമായ ശൈഖ്​ മുഹമ്മദ്​ ബിൻ അബ്​ദുറഹ്​മാൻ ആൽഥാനി, അഫ്​ഗാൻ ദേശീയ അനുരഞ്ജന ഉന്നതസമിതി ചെയർപേഴ്​സൺ അബ്​ദുല്ല അബ്​ദുല്ല, താലിബാൻ ഉപനേതാവ്​ മുല്ലാ അബ്​ദുൽ ഗനി ബറാദർ എന്നിവരാണ്​ പ​ങ്കെടുത്തത്​.

ഏതെങ്കിലും പക്ഷം വിജയിക്കുകയോ കീഴടക്കുകയോ ചെയ്യുക എന്നതല്ല ചർച്ചയുടെ സ്വഭാവമെന്നും ശാശ്വതസമാധാനം പുലരുകയാണ്​ ലക്ഷ്യമെന്നും ഖത്തർ വിദേശകാര്യമന്ത്രി പറഞ്ഞു. അഫ്​ഗാനിലെ പ്രശ്​നങ്ങൾക്ക്​ സൈനികമായ പരിഹാരം സാധ്യമല്ലെന്നാണ്​ ചരിത്രം നമ്മെ പഠിപ്പിച്ചത്​. പെ​ട്ടെന്നും ശാശ്വതമായതുമായ വെടിനിർത്തൽ ഉടൻ നിലവിൽ വരണം. ഇതിന്​ അഫ്​ഗാനിലെ എല്ലാ ഗ്രൂപ്പുകളുമായും പാർട്ടികളുമായി ചർച്ചകൾ നടത്തേണ്ടതുണ്ട്​. ഇതിനുശേഷം അന്തിമമായ കരാർ സാധ്യമാവും. ആരെങ്കിലും വിജയിക്കുകയോ പരാജയപ്പെടുകയോ എന്നത്​ അടിസ്​ഥാനപ്പെടുത്തിയുള്ള കരാർ ആയിരിക്കില്ല അതെന്നുമാണ്​ വിദേശകാര്യമന്ത്രി പറഞ്ഞത്​.

അഫ്​ഗാൻ സമാധാനത്തിനായി നേരത്തേ നിരവധി ചർച്ചകൾ ദോഹയിൽ നടന്നിരുന്നു. യു.എസും താലിബാനും തമ്മിൽ നടന്ന ചർച്ചകളു​െട ഫലമായി കഴിഞ്ഞ ഫെബ്രുവരിയിൽ സമാധാന കരാർ ഉണ്ടാക്കിയിരുന്നു. എന്നാൽ അമേരിക്കയുടെ പാവസർക്കാറാണ്​ അഫ്​ഗൻ ഭരിക്കുന്നതെന്നും ഇതിനാൽ സർക്കാറുമായി ചർച്ചക്കില്ലെന്നുമായിരുന്നു താലിബാൻ നിലപാട്​.