സ്​ത്രീ അവകാശം: ഖത്തറിനെ മാതൃകയാക്കാം –ശൈഖ് മുഹമ്മദ് ആൽഥാനി

ദോഹ: അഫ്​ഗാനിസ്​താനിൽ സ്​ത്രീകളുടെ അവകാശങ്ങൾ പൂർണമായും വകവെച്ച് നൽകണമെന്നും ഇക്കാര്യത്തിൽ ഇസ്​ലാമിക രാഷ്​ട്രമെന്ന നിലയിൽ ഖത്തറിനെ മാതൃകയാക്കണമെന്നും ഉപപ്രധാനമന്ത്രിയും വിദേശകാര്യമന്ത്രിയുമായ ശൈഖ് മുഹമ്മദ് ബിൻ അബ്​ദുറഹ്മാൻ ആൽഥാനി.

സ്​ത്രീകളുടെ അവകാശങ്ങൾ പൂർണമായും ഉറപ്പുവരുത്തുന്നതിന്​ താലിബാനുമേൽ ഖത്തർ സമ്മർദം ചെലുത്തും. സ്​ത്രീകളുടെ വിഷയത്തിൽ താലിബാ​െൻറ നയങ്ങൾ 30 വർഷം​ മുമ്പുള്ളതാണ്​. അതു സ്​ത്രീകളുടെ അവകാശങ്ങളെ ക്രൂരമായി ഹനിക്കുന്നതാണ്​ -സി.എൻ.എൻ ചാനലിനു നൽകിയ അഭിമുഖത്തിൽ ശൈഖ് മുഹമ്മദ് ബിൻ അബ്​ദുറഹ്മാൻ ആൽഥാനി വ്യക്തമാക്കി. അഫ്​ഗാനിസ്​താനിൽ സ്​ത്രീകൾക്ക് നേരെയുള്ള അതിക്രമങ്ങൾ ഖത്തറിനെ സംബന്ധിച്ച് ഒരിക്കലും സ്വീകാര്യമല്ലെന്നും അദ്ദേഹം പറഞ്ഞു.

ഭീകരവാദത്തിനും ഭീകരവാദികൾക്കും വളരാനുള്ള മണ്ണായി അഫ്​ഗാൻ മാറുന്നതിനെ ഖത്തർ ഒരു നിലക്കും അംഗീകരിക്കുകയില്ലെന്നും മുഖം നോക്കാതെ എതിർക്കുമെന്നും വിദേശകാര്യമന്ത്രി ഓർമിപ്പിച്ചു.സർക്കാർ സർവിസുകളിൽ പുരുഷന്മാരെക്കാളേറെ സ്​ത്രീകളാണുള്ളത്. ഉന്നത വിദ്യാഭ്യാസ മേഖലയിലും വിദ്യാർഥികളെക്കാൾ കൂടുതൽ വിദ്യാർഥിനികളാണ്. വനിതകളുടെ കാര്യക്ഷമമായ പങ്കാളിത്തത്തോടെ മാത്രമേ മുന്നേറ്റവും പുരോഗതിയും സാധ്യമാകുകയുള്ളൂ -ഖത്തർ വിദേശകാര്യമന്ത്രി വ്യക്തമാക്കി.