മുസ്സോളിനിയുടെ ലോകകപ്പ്

യൂറോപ്യന്മാർ പരിഹസിച്ച്​ പുറംതള്ളിയതിനാൽ, കടൽ കടന്ന്​ ഉറുഗ്വായിലെത്തിച്ചാണ്​ ആദ്യ ലോകകപ്പിന്​ പന്തുതട്ടിയതെങ്കിൽ നാലു വർഷം കഴിഞ്ഞ്​ നടന്ന രണ്ടാം ലോകകപ്പിന്‍റെ കഥ മറ്റൊന്നായിരുന്നു. യൂറോപ്പിലെ വമ്പന്മാരുടെ ബഹിഷ്കരണത്തിനിടയിലും ഉറുഗ്വായ്​ ലോകകപ്പ്​ വിജയകരമായി നടന്നതോടെ 1934 ലോകകപ്പ്​ വിലപ്പെട്ടതായി. വേദിയൊരുക്കാൻ യൂറോപ്പിലെ പലരും സന്നദ്ധരായി. അന്നാൽ, അപ്പോഴേക്കും യൂറോപ്പും ലോകവും പ്രബല ചേരികളായി തിരിഞ്ഞിരുന്നു.

അഡോൾഫ്​ ഹിറ്റ്​ലറുടെ നാസി ജർമനിയും, ബെനറ്റോ മുസോളിനിയുടെ ഫാസിസ്റ്റ്​ ഇറ്റലിയും യൂറോപ്പിലെ കരുത്തരായ ശക്​തികളായി മാറിയ കാലം. സൈനിക, ആയുധ ശേഷിക്കൊപ്പം സ്​പോർട്​സിനെയും അവർ തങ്ങളുടെ ഏകാധിപത്യത്തിന്‍റെ ഉപകരണമാക്കാൻ ലക്ഷ്യമിട്ടു. കളത്തിലെ വിജയത്തിലൂടെ എതിരാളിയെ മലർത്തിയടിക്കാനുള്ള ആദ്യ നീക്കം ഹിറ്റ്​ലറുടേതായിരുന്നു.

1936ലെ ഒളിമ്പിക്സിന്​ വേദിയൊരുക്കാൻ കച്ച​കെട്ടിയിറങ്ങിയ ജർമനി 1931 ഏപ്രിലിൽ തന്നെ ആതിഥേയ പദവി സ്വന്തമാക്കി. അങ്ങനെ നാസി ജർമനി ബെർലിൻ ഒളിമ്പിക്​സിന്​ തയ്യാറെടുപ്പുകൾ തുടങ്ങുന്നതിനിടെയാണ്​ മുസോളിനി ലോകകപ്പ്​ ഫുട്​ബാളിനായി കളത്തിലിറങ്ങി കളിതുടങ്ങുന്നത്​​. 1932 ഒക്​ടോബറിൽ സ്​റ്റോക്​ഹോമിൽ നടന്ന ഫിഫ യോഗത്തിൽ മുസോളിനിയുടെ ഇറ്റലി 1934ലെ ലോകകപ്പ്​ വേദി സ്വന്തമാക്കി. ഫിഫയെ മുസോളിനി വിലക്കെടുത്തുവെന്നായിരുന്നു അക്കാലത്ത്​ മാധ്യമങ്ങളും ചരിത്രകാരന്മാരും എഴുതിയത്​. എന്തായാലും ഫാസിസ്റ്റ്​ ദേശീയതക്ക്​ സ്വീകാര്യത നൽകാനും, ജനങ്ങൾക്കിടയിലേക്ക്​ കുത്തിവെക്കാനും ഏറ്റവും മികച്ചൊരു ഉപകരണമായി മുസോളിനി 1934 ലോകകപ്പിനെ മാറ്റി.

ലോകം വൻ സാമ്പത്തിക മാന്ദ്യത്തിൽ (​Great depression) പൊറുതിമുട്ടിയ കാലത്ത്​ മുസോളിനി സ്​റ്റേഡിയം നിർമാണങ്ങൾക്കും ഒരുക്കങ്ങൾക്കുമായി 35 ലക്ഷം ഇറ്റാലിയൻ ലിറ നീക്കിവെച്ച്​ വമ്പൻ മേളയാക്കി മാറ്റി. റോം, ടൂറിൻ, ​േഫ്ലാറന്‍സ്​, നേപ്പിൾസ്​, ഗെനോ, ട്രീസ്​റ്റേ എന്നിവടങ്ങളിൽ വൻ കളിമുറ്റങ്ങൾ നിർമിച്ചു. മിലാനിലെ സാൻസിറോ സ്​റ്റേഡിയം ലോകോത്തരമാക്കി പുതുക്കി പണിതു.

അങ്ങനെ, ലോകകപ്പ്​ ഫുട്​ബാളിന്​ പുതിയ മുഖച്ഛായവും കരുത്തും നൽകുകയായിരുന്നു മുസോളിനി. ഒപ്പം, ഇറ്റാലിയൻ ജനതയുടെ മനസ്സിലേക്ക്​ ഇടിച്ചുകയറാനുള്ള വഴിയായി ഏകാധിപതിയായ ഭരണാധികാരി ഫുട്​ബാളിനെ കണ്ടു.

ചരുങ്ങിയ കാലംകൊണ്ട്​ അദ്ദേഹവും ഭരണകൂടവും ലോകകപ്പിനെ ഏറ്റവും മികച്ച സ്വാധീന ഉപകരണമാക്കിമാറ്റി. മൂന്ന്​ ലക്ഷം പോസ്റ്ററുകൾ രാജ്യത്തെമ്പാടുമായി പ്രചരിപ്പിച്ചു. ലോകകപ്പ്​ ചിത്രങ്ങൾ പതിച്ച സ്റ്റാമ്പുകളും, വേൾഡ്​ ചാമ്പ്യൻഷിപ്പ്​ (കാംപിയോനറ്റോ ഡെൽ മോണ്ടോ) എന്ന പേരിൽ സിഗരറ്റ്​ ബ്രാൻഡും വരെ പുറത്തിറക്കി ലോകകപ്പ്​ എന്ന ഇമേജിനെ ജനഹൃദയങ്ങളിലേക്ക്​ പതിപ്പിച്ചു.

അപ്പോൾ, മറ്റൊരു ലോക ശക്​തിയും ഫുട്​ബാളിന്‍റെ പിതൃമണ്ണുമായി ഇംഗ്ലീഷുകാർ ലോകകപ്പിനോട്​ പുറംതിരിഞ്ഞു തന്നെയായിരുന്നു. ഇംഗ്ലണ്ട്​, സ്​കോട്​ലൻഡ്​, വെയ്​ൽസ്​, അയർലൻഡ്​ എന്നിവ ചേർന്ന ഹോം നാഷൻസ്​ ചാമ്പ്യൻഷിപ്പാണ്​ യത്ഥാർത്ഥ ലോകകപ്പ്​ എന്നായിരുന്നു ഇംഗ്ലീഷുകാരുടെ വാദം. ഫുട്​ബാളിന്‍റെ നിയമങ്ങളും ചട്ടങ്ങളും തങ്ങളാണ്​ തീരുമാനിക്കുന്നത്​ എന്ന വല്ല്യേട്ടൻ ഭാവവുമായി ഇംഗ്ലീഷുകാർ തങ്ങളുടെ ഫുട്​ബാളും മുറുകെ പിടിച്ചിരുന്നു. എന്നാൽ, ഇതൊന്നും ഇറ്റലിക്കും മുസോളിനിക്കും ബാധകമല്ലായിരുന്നു.​ രണ്ടു ലക്ഷ്യങ്ങൾ മാത്രമായിരുന്നു അവർക്ക്​ മുന്നിൽ. ലോകകപ്പിന്​ ആതിഥേയത്വം വേണം. അതു ലഭിച്ചതോടെ, അടുത്ത ലക്ഷ്യം ഇറ്റലിക്കാരുടെ അഭിമാനമുയർത്താൻ കിരീട വിജയവും വേണം എന്നുമാത്രം. ഫലത്തിൽ കളത്തിൽ അന്ന്​ കരുത്തരായ ഇംഗ്ലണ്ട്​ ലോകകപ്പിൽകളിക്കാതിരുന്ന തീരുമാനം മുസോളിനിയുടെ ഇറ്റലി സ്വാഗതം ചെയ്തതായി ഫുട്​ബാൾ ചരിത്രകാരനായ ജിം ഹാർട്ട്​ കുറിക്കുന്നു. പ്രഥമ ചാമ്പ്യന്മാരായ ഉറുഗ്വായുടെ പിൻവാങ്ങാനുള്ള തീരുമാനവും അതുകൊണ്ട്​ തന്നെ ഇറ്റലി മനസ്സാൽ സന്തോഷം നൽകുന്നതായിരുന്നു.

16 ടീമുകൾ; യോഗ്യതാ പോരാട്ടം

പ്രഥമ ലോകകപ്പിൽ 13 ടീമുകളെ കണ്ടെത്താനായിരുന്നു സംഘാടകർ പാടുപെട്ടതെങ്കിൽ നാലു വർഷംകൊണ്ട്​ പ​ങ്കെടുക്കാൻ സന്നദ്ധരായവരുടെ എണ്ണം വർധിച്ചു. ലോകകപ്പിൽ ഇടം തേടി 36 ടീമുകളായിരുന്നു ഫിഫയെ സമീപിച്ചത്​.

ആകെ 16ൽ 12 സ്ഥാനങ്ങൾ യൂറോപ്പിന്​ നൽകി. മൂന്ന്​ അമേരിക്കയ്ക്കും ഒരെണ്ണം ആഫ്രികയ്ക്കും. ആതിഥേയരായ ഇറ്റലി ഉൾപ്പെടെ യോഗ്യതാ റൗണ്ട്​ കളിച്ചാണ്​ ലോകകപ്പിന്​ യോഗ്യത നേടിയത്​. അമേരിക്കൻ മേഖലയിൽ നിന്നും ചിലിയും പെറുവും പിൻവാങ്ങിയതോടെ ബ്രസീൽ, അർജന്‍റീന ടീമുകൾ യോഗ്യതാ മത്സരം കളിക്കാതെ ലോകകപ്പ്​ ടിക്കറ്റ്​ നേടി. മെക്സികോയെ തോൽപിച്ച്​ അമേരിക്ക യോഗ്യത നേടി. ആഫ്രിക്കയിൽ നിന്നുള്ള ആദ്യ ടീമായി ഈജപ്തും വന്നു.

1930 ലോകകപ്പ്​ ​യൂറോപ്യൻ ടീമുകൾ ബഹിഷ്കരിച്ചതിൽ പ്രതിഷേധിച്ചായിരുന്നു ഉറുഗ്വായുടെ പിന്മാറ്റം. ഗ്രൂപ്പ്​ റൗണ്ടുകളൊന്നുമില്ലാതെ നേരിട്ട്​ നോക്കൗട്ട്​ എന്ന നിലയിലായിരുന്നു ടൂർണമെന്‍റ്​ ഫോർമാറ്റ്​. 90 മിനിറ്റിലും കളി ടൈ ബ്രേക്കായില്ലെങ്കിൽ 30 മിനിറ്റ്​ അധിക സമയം അവതരിപ്പിച്ചു. എന്നിട്ടും ഫലമുണ്ടായില്ലെങ്കിൽ അടുത്ത ദിവസം വീണ്ടും കളി. ഇതായിരുന്നു രണ്ടാം ലോകകപ്പിന്‍റെ മത്സര നിയമം. അങ്ങനെ ആ മഹത്തായ ദിനമെത്തി. 1934 മേയ്​ 27. എട്ട്​ സ്​റ്റേഡിയങ്ങളിലും ഒരേ സമയം തന്നെ ഒന്നാം റൗണ്ട്​ പോരാട്ടം. ഒരു കളി മാത്രം അധികസമയത്തേക്ക്​ നീങ്ങി. ബാക്കിയെല്ലാം 90 മിനിറ്റിൽ പൂർത്തിയായപ്പോൾ അമേച്വർ ടീമുമായി ഇറങ്ങിയ അർജന്‍റീനയും ബ്രസീലും മടങ്ങി. എട്ട്​ യൂറോപ്യൻ ടീമുകൾ ക്വാർട്ടറിൽ. ഇറ്റലി -സ്​പെയിൻ, ഓസ്​ട്രിയ- ഹങ്കറി, ചെ​ക്ക്​ - സ്വിറ്റ്​സർലൻഡ്​, ജർമനി -സ്വീഡൻ എന്നിവരുടെ ക്വാർട്ട പോരാട്ടവും ഒരേദിവസം. സെമിയിൽ ഓസ്​ട്രിയയെ തോൽപിച്ച്​ ഇറ്റലിയും (1-0), ​ജർമനിയെ തോൽപിച്ച്​ ചെക്കോസ്ലവാക്യയും (3-1) ഫൈനലിൽ പ്രവേശിച്ചു.

ഫൈനൽ: കമ്യൂണിസം x ഫാസിസം

സോവിയറ്റ്​ യൂണിയനോട്​ ചേർന്നു നിൽക്കുന്ന ചെക്കോ സ്ലവാക്യയും മുസോളിനിയുടെ ഫാസിസ്റ്റ്​ പാർട്ടിയുടെ ഇറ്റലിയും തമ്മിലെ ഫൈനൽ പോരാട്ടം ആ കാലത്തെ രാഷ്ട്രീയ യുദ്ധയമായി വിശേഷിപ്പിക്കപ്പെട്ടു. റോമിലെ ഫാസിസ്റ്റ്​ പാർട്ടി സ്​റ്റേഡിയം (സ്​റ്റേഡിയോ നാസിയോണലേ ഡെൽ പി.എൻ.എഫ്​) ആയിരുന്നു കലാശപ്പോരാട്ടത്തിന്‍റെ വേദി.

മുസോളിനിയും പാർട്ടി നേതാക്കളും അനുഭാവികളുമെല്ലാം ഗാലറിയിലെത്തി. നാസി ജർമനിയുടെയും കമ്യുണിസ്റ്റ്​ ചെകോസ്ലവാക്യയുടെയും പ്രതിനിധികൾ ഗാലറിയിലുണ്ടായിരുന്നു. മുസോളിനി അടിച്ചമർത്തിയ ഇറ്റാലിയൻ കമ്യൂണിസ്റ്റുകാ​രുടെ ഓർമയിൽ മത്സരത്തിന്‍റെ രാഷ്ട്രീയ പ്രസ്ക്​തി വർധിച്ചു. പുറത്തെ വാശി കളത്തിലും പടർന്നു. ഫൗളും ആക്രമണവും കൈയാങ്കളിയുമായി മുന്നേറിയ പോരാട്ടം.

അവസാന 20 മിനിറ്റ്​ വരെ ഗോൾ രഹിതമായിരുന്നു അങ്കം. അ​േൻാണിൻ പകിന്‍റെ ഗോളിൽ ചെക്ക്​ ആദ്യം സ്​കോർ ചെയ്തു. ഗാലറിയിൽ മുസോളിനിയുടെ മുഖം വലിഞ്ഞുമുറുകി നിശബ്​ദമായ നിമിഷം. കളി തോറ്റ്​ കിരീടം കൈവിട്ടാൾ ടീം അംഗങ്ങൾക്ക്​ ജീവൻപോലും നഷ്ടമായേക്കാവുന്ന ഭീകരത.

എന്നാൽ, 81ാം മിനിറ്റിൽ റെയ്​മുണ്ടോ ഒർസിയുടെ ഗോൾ പോസോ വിറ്റോറിയോയുടെയും സംഘത്തിന്‍റെയും ജീവൻ രക്ഷിച്ചു. എക്സട്രാ ടൈമിൽ ഇറ്റാലിയൻ ​ഇതിഹാസം എയ്​ഞ്ചലോ ഷിയാവിയോയുടെ ഗോളിൽ അസൂറിപ്പട കപ്പും ജയിച്ച്​, മുസോളിയുടെ അഭിമാനവും കാത്തു.

ലോകകപ്പിലെ ആദ്യ സൂപ്പർതാരം

1934 മേയ്​ 27. അന്നായിരുന്നു ​രണ്ടാം ലോകകപ്പിന്‍റെ മൈതാനങ്ങളിൽ പന്തുരുണ്ട്​ തുടങ്ങിയത്​. പ്രാദേശിക സമയം വൈകുന്നേരം നാലിന്​ എട്ട്​ സ്​റ്റേഡിയങ്ങളിലായി 16ടീമുകൾക്കായി ​ഒരേമസയം വിസിൽ മുഴങ്ങിയ നിമിഷം. ആതിഥേയരായ ഇറ്റലിയും അമേരിക്കയും ഏറ്റുമുട്ടിയ റോമിലെ ഫാസിസ്റ്റ്​പാർട്ടി സ്​റ്റേഡിയത്തിലായിരുന്നു ഏ​വരൂടെയും ശ്രദ്ധ. മുസോളിനിയെന്ന ഏകാധിപതിയായ രാഷ്ട്രത്തലവൻ ദേശീയ വികാരം കുത്തിവെച്ചിറക്കിയ ടീം മാനേജ്​മെന്‍റിനും, ഗാലറിയിൽ ആർത്തലച്ച കാൽലക്ഷം കാണികൾക്കും മധ്യേ എരിപൊരികൊള്ളുകയായിരുന്നു കളിക്കാർ. ഇറ്റലിക്കും മുസോളിനിക്കും കിരീടത്തിൽ കുറഞ്ഞൊന്നും ലക്ഷ്യമായിരുന്നില്ല. അതിനാൽ, ആദ്യ മത്സരത്തിൽ എതിരാളിയെ നിഷ്പ്രഭമാക്കി തുടങ്ങുകയെന്നതായിരുന്നു ​നിശ്​ചയം.

ടീം മാനേജ്​മെന്‍റ്​ മനസ്സിൽ കണ്ട ലക്ഷ്യങ്ങൾ, കളത്തിൽ നടപ്പാക്കാനും വൈകിയില്ല. 90 മിനിറ്റ്​ പോരാട്ടം അവസാനി​ച്ചപ്പോൾ, അമേരിക്കൻ വലയിൽ ഏഴ്​ ഗോളുകൾ നിറച്ചു തന്നെ ഇറ്റലി തുടങ്ങി. 7-1ന്‍റെ തകർപ്പൻ ജയത്തോടെ അവർ കളം വിടുമ്പോൾ ഹാട്രിക്​ ഗോളുമായി എയ്​ഞ്ചലോ ഷിയാവിയോ ഇറ്റലിയുടെ സൂപ്പർതാരമായി മാറിയിരുന്നു. കളിയുടെ 18ാം മിനിറ്റിൽ തന്നെ ​അമേരിക്കൻ വലകുലുക്കിയ ഷിയാവിയോ ഇറ്റലിയുടെ ആദ്യലോകകപ്പ്​ ഗോൾ സ്​കോററും ഹാട്രിക്​ നേട്ടക്കാരനുമായി ചരിത്രം കുറിച്ചു. പിന്നീടുള്ള മൂന്ന്​ മത്സരങ്ങളിലും ഷിയാവിയോക്ക്​ വലകുലുക്കാനായില്ല. ക്വാർട്ടർ ഫൈനലിൽ സ്​പെയിനിനെതിരെ രണ്ടു തവണയാണ്​ അന്ന്​ ഇറ്റലി ഏറ്റുമുട്ടിയത്​. എക്സ്​ട്രാ ടൈമിലേക്ക്​ നീങ്ങിയിട്ടും സമനില മുറിയാതായതോടെ, അടുത്ത ദിവസം വീണ്ടും മത്സരം നടന്നു. റെക്കോഡ്​ ജനക്കൂട്ടമൊഴുകിയെത്തിയ മത്സരത്തിനൊടുവിൽ ഒരു ഗോളിനായിരുന്നു ഇറ്റലി രണ്ടാം മത്സരം ജയിച്ചത്​. ഒടുവിൽ ഫൈനലിൽ ചെക്കോസ്ലവാക്യയെ വീഴ്ത്തിയപ്പോൾ അധിക സമയത്തെ വിജയ ഗോൾ കുറിച്ച്​ ഷിയാവിയോ ദേശീയ ഹീറോയായി മാറി.

ലോകഫുട്​ബാളിൽ ആഘോഷമാക്കിയ ആദ്യ സൂപ്പർ താരമെന്നായിരുന്നു കരുത്തനായ സെന്‍റർഫോർവേഡിനെ വിശേഷിപ്പിച്ചത്​. ഡ്രിബ്ലിങ്ങും, അതിവേഗത്തിൽ കുതിപ്പും, ആക്രമണോത്സുക മുന്നേറ്റവുമായി നിറഞ്ഞു നിന്ന കരിയർ. ഒമ്പതു വർഷമാണ്​ ഇറ്റാലിയൻ കുപ്പായമണിഞ്ഞത്​. 1928 മുതൽ 35 വരെ നീണ്ട കരിയറിൽ 21 മത്സരങ്ങളിൽ കളിച്ചു.

എന്നാൽ, അതിനേക്കാൾ ഇറ്റാലിയൻ ക്ലബായ ബൊളോനയുടെ വിശ്വസ്തനായ സ്​ട്രൈക്കർ എന്ന നിലയിലായിരുന്നു ഷിയാവിയോയുടെ കരിയർ അറിയപ്പെട്ടത്​. 1922 മുതൽ 1939ൽ പരിക്ക്​ അലട്ടിയതോടെ മൈതാനം വിടും വരെ അവിടെ തുടർന്നു. കളിയവസാനിപ്പിച്ച ശേഷം, ബൊളോനയുടെയും ഇറ്റലി ദേശീയ ടീമിന്‍റെയും (1953-58) പരിശീലകനായും ഇദ്ദേഹമുണ്ടായിരുന്നു.

അടിമുടി ഫാസിസ്റ്റ്​ ദേശീയതയിൽ മതിഭ്രമിച്ച ​ഇറ്റാലിയൻ ടീമിൽ നിന്നും വ്യത്യസ്തനായിരുന്നു ഷിയാവിയോ. 1934ലെ ലോകകപ്പ്​ വിജയത്തിനു പിന്നാലെ, രണ്ടു ദിവസം കഴിഞ്ഞു നടന്ന പ്രധാനമന്ത്രി ബെനിറ്റോ മുസോളിനിയുടെ അനുമോദന ചടങ്ങിനൊന്നും കാത്തിരിക്കാതെ നാട്ടിലേക്ക്​ മടങ്ങിയ ചരിത്രമുണ്ട്​ അന്ന്​ 29കാരനായ ഷിയാവിയോക്ക്​. ടീം അംഗങ്ങളിലും മാനേജിങ്​ സ്റ്റാഫിലുമായി മുസോളിനിയുടെ അനുമോദനം ഏറ്റുവാങ്ങാത്ത ഏക വ്യക്​തിയും ഷിയാവിയോ ആയിരുന്നു.

'ആർക്കും പ്രകർത്താൻ കഴിയാത്ത പ്രതിഭയായിരുന്നു ഷിയാവിയോ. അവന്റെ ഡ്രിബ്ലിംഗ്, ഇംപ്രൊവൈസേഷൻ, ഷോട്ടുകൾ, ടീമംഗങ്ങളുമായി ബന്ധം സ്ഥാപിക്കാനും പൊസിഷൻ മാറ്റാനുമുള്ള കഴിവ്... അങ്ങനെ ഷിയാവിയോക്ക്​ മാത്രമുളള ഒരുപാട്​ സവിശേഷതകളുണ്ടായിരുന്നു. അവനെ പോലെ മറ്റൊരു കളിക്കാരനില്ല' -മുൻ ഫുട്​ബാളറും മാധ്യമ പ്രവർത്തകനുമായ എറ്റോറെ ബെറയുടെ വാക്കുകൾ ഇങ്ങനെയായിരുന്നു. ലോകകപ്പ്​ ഫുട്​ബാളിന്‍റെ ആദ്യകാല സൂപ്പർമായി വാണ ഷിയാവിയോ 1990ൽ തന്‍റെ 84ാം വയസ്സിൽ ഓർമയായി.