ലോകകപ്പ്​ ഒരുക്കം: സുസ്​ഥിരത പ്രോഗ്രസ്​ റിപ്പോർട്ടുമായി ഖത്തറും ഫിഫയും

ദോഹ: ഖത്തർ ലോകകപ്പ് ഫുട്ബോൾ ടൂർണമെൻറിന്‍റെ മുഖമുദ്രയായ സുസ്​ഥിരതയുമായി ബന്ധപ്പെട്ട പ്രേ​ാഗ്രസ്​ റിപ്പോർട്ടുമായി ഖത്തറും ഫിഫയും. ലോകകപ്പ് ഫുട്ബാൾ ചരിത്രത്തിലാദ്യമായി പൊതുജനങ്ങൾക്ക് ലഭ്യമാകും വിധത്തിലാണ് റിപ്പോർട്ട് തയാറാക്കിയിരിക്കുന്നത്. ടൂർണമെൻറുമായി ബന്ധപ്പെട്ട സുസ്​ഥിരതാ ശ്രമങ്ങളുടെ പുരോഗതിയും നേട്ടങ്ങളും വിശദമാക്കുന്ന റിപ്പോർട്ടിന്‍റെ പുതിയ രൂപം പൊതുജനങ്ങളിലേക്കും ഓഹരിയുടമകളിലേക്കും എത്തിക്കാൻ ഫിഫ, സുപ്രീം കമ്മിറ്റി, ഫിഫ ലോകകപ്പ് ഖത്തർ 2022 എൽ.എൽ.സി എന്നിവരെ പ്രാപ്തമാക്കും. ലോകകപ്പ് ടൂർണമെൻറിന്‍റെ പ്രൈമറി ഡെലിവറി പങ്കാളികളുമായി സഹകരിച്ചാണ് ഖത്തർ ലോകകപ്പ് സുസ്​ഥിരത സ്​ട്രാറ്റജി വികസിപ്പിച്ചിരിക്കുന്നത്. സുപ്രധാന സുസ്​ഥിരതാ വിഷയങ്ങളായ മാനവിക, സാമൂഹിക, സാമ്പത്തിക, പാരിസ്​ഥിതിക, ഭരണനിർവഹണ തലങ്ങളെ അഭിമുഖീകരിക്കാൻ പാകത്തിലാണ് സ്​ട്രാറ്റജി രൂപപ്പെടുത്തിയിരിക്കുന്നത്.

ലോകകപ്പിന്‍റെ അന്തിമ വിസിൽ മുഴങ്ങിയാലും ദീർഘകാലത്തേക്ക് വരും തലമുറക്ക് കൂടി പ്രയോജനപ്പെടുത്താൻ വിധത്തിലാണ് ഖത്തർ ലോകകപ്പ് ടൂർണമെൻറിന്‍റെ സുസ്​ഥിരത പദ്ധതികൾ. 79 സംരംഭങ്ങളുമായും ബന്ധപ്പെട്ട പുരോഗതി റിപ്പോർട്ടിൽ വിവരിക്കുന്നുണ്ട്. ടൂർണമെൻറിനാവശ്യമായ നിർമാണ പ്രവർത്തനങ്ങളിൽനിന്നും ടൂർണമെൻറ് സംഘാടനത്തിലേക്ക് സംഘാടകർ എത്തിച്ചേർന്നിട്ടുണ്ട്. കഴിഞ്ഞ 18 മാസക്കാലയളവിൽ തൊഴിൽ നിയമത്തിലെ പരിഷ്കരണമടക്കം സുസ്​ഥിരതയുമായി ബന്ധപ്പെട്ട് നിരവധി നാഴികക്കല്ലുകളാണ് ഖത്തറും ഫിഫയും പിന്നിട്ടത്. പരിസ്​ഥിതി സൗഹൃദം, കാർബൺ ന്യൂട്രൽ, ഭിന്നശേഷിക്കാർക്കുൾപ്പെടെ സമൂഹത്തിലെ എല്ലാവർക്കും ആക്സസിബിൾ, കാർബൺ പ്രസരണം കുറക്കൽ തുടങ്ങി നിരവധി ഘടകങ്ങൾ സുസ്​ഥിരതയുമായി ബന്ധപ്പെട്ട് കിടക്കുന്നുണ്ട്.