114 രാജ്യക്കാരുടെ യോഗ; ഗിന്നസ് റെക്കോഡുമായി ഖത്തർ ഇന്ത്യൻ സ്പോർട്സ് സെന്‍റർ

ദോഹ: ​ഏറ്റവും കൂടുതൽ രാജ്യക്കാർ ഒരേ സമയം, ഒന്നിച്ച്​ യോഗാഭ്യാസം നടത്തിയ റെക്കോഡിലൂടെ ഗിന്നസ്​ ബുക്കിൽ ഇടം പിടിച്ച്​ ഖത്തർ ഇന്ത്യൻ സ്​പോർട്​സ്​ സെന്‍റർ. ആസ്പയർ അക്കാദമിയിലെ ഇൻഡോർ ഫുട്​ബാൾ ഗ്രൗണ്ടിലായിരുന്ന ഖത്തർ ഇന്ത്യൻ എംബസിയുടെ അനുബന്ധ സംഘടനയായ ഇന്ത്യൻ സ്​പോർട്​സ്​ സെന്‍റർ നേതൃത്വത്തിൽ​ യോഗാഭ്യാസം സംഘടിപ്പിച്ചത്​.

114 രാജ്യങ്ങളിൽ നിന്നുള്ളവരാണ്​ വിപുലമായ യോഗാഭ്യാസത്തിൽ ഒന്നിച്ചത്​. 2017 നവംബർ 18ന്​ യു.എ.ഇയിൽ 112 രാജ്യക്കാരുമായി നടന്ന ഗിന്നസ്​ റെക്കോഡാണ്​ ഖത്തറിൽ മറികടന്നത്​. ഖത്തർ വേദിയാവുന്ന ലോകകപ്പ്​ ഫുട്​ബാളിന്​ രാജ്യത്തെ ഇന്ത്യൻ സമൂഹത്തിന്‍റെ ഐക്യദാർഢ്യം എന്ന നിലയിലാണ്​ യോഗാഭ്യാസം നടന്നത്​. ​ചരിത്രമായി മാറിയ പ്രദർശനത്തിന്​ എല്ലാ പിന്തണുയും നൽകിയ ഖത്തർ സർക്കാറിനും പൊതജുനാരോഗ്യ മന്ത്രാലയത്തിനും ഇന്ത്യൻ സ്​പോർട്​സ്​ സെന്‍റർ ഭാരവാഹികൾ നന്ദി അറിയിച്ചു.

ഗിന്നസ്​ റെക്കോഡ്​ സ്ഥാപിച്ചതിന്‍റെ അംഗീകാര പത്രം ഇന്ത്യൻ അംബാസഡർ ഡോ. ദീപക്​ മിത്തൽ, ഐ.എസ്​.സി പ്രസിഡന്‍റ്​ ഡോ. മോഹൻ തോമസ്​ എന്നിവർ അധികൃതരിൽ നിന്നും ഏറ്റുവാങ്ങി. പ്രധാനമന്ത്രി നരേന്ദ്ര മോദി, വിദേശകാര്യമന്ത്രി ഡോ. എസ്​. ജയശങ്കർ എന്നിവർ ഗിന്നസ്​ ബുക്ക്​ റെക്കോഡ്​ നേട്ടത്തെ അഭിനന്ദിച്ചു.