പുതിയ സ്വകാര്യ സ്​കൂളുകൾ തുടങ്ങാൻ അപേക്ഷിക്കാം

ദോഹ: രാജ്യത്ത്​ സ്വകാര്യമേഖലയിൽ പുതിയ സ്​കൂളുകൾ ആരംഭിക്കാനുള്ള അപേക്ഷകൾ വിദ്യാഭ്യാസ ഉന്നത വിദ്യാഭ്യാസ മന്ത്രാലയം സ്വീകരിച്ചുതുടങ്ങി. 2021-22 അധ്യയന വർഷത്തിൽ സ്വകാര്യ സ്​കൂളുകൾ, കിൻറർ ഗാർട്ടനുകൾ എന്നിവ തുടങ്ങാനുള്ള അനുമതിക്കായി നവംബർ ഒന്നുമുതൽ ഡിസംബർ 31 വരെയാണ്​ അപേക്ഷിക്കേണ്ടത്​.

പ്രൈവറ്റ്​ സ്​കൂൾ ലൈസൻസിങ്​ മാന്വൽ പ്രകാരമുള്ള കെട്ടിടമടക്കമുള്ള സൗകര്യം ഉള്ളവർക്ക്​ അപേക്ഷ നൽകാം. അപേക്ഷകൻ വിദ്യാഭ്യാസ മന്ത്രാലയത്തിൻെറ ജീവനക്കാരോ മന്ത്രാലയത്തിൻെറ കീഴിലുള്ള അനുബന്ധ വിഭാഗങ്ങളിലെ ജീവനക്കാരോ ആകരുത്​. 21വയസ്സ്​​ പൂർത്തിയായ ആളാകണം അപേക്ഷകൻ. ഖത്തർ തിരിച്ചറിയൽ കാർഡിൻെറ കോപ്പി അപേക്ഷക്കൊപ്പം നൽകണം. മന്ത്രാലയത്തിൻെറ http://www.edu.gov.qa വെബ്​സൈറ്റ്​ മുഖേനയാണ്​ അപേക്ഷകൾ നൽകേണ്ടത്​. കൂടുതൽ വിവരങ്ങൾ മന്ത്രാലയത്തിൻെറ സ്വകാര്യ സ്​കൂൾ ലൈസൻസിങ്​ വിഭാഗത്തിൽനിന്നറിയാം. ഫോൺ: 44045128, 44044772.

സ്വകാര്യ സ്കൂളുകളും കിൻറർഗാർട്ടനുകളുമായി ആകെ 287 സ്ഥാപനങ്ങളാണ് രാജ്യത്ത് പ്രവർത്തിക്കുന്നത്.പുതിയ സ്​കൂളുകളുടെ ആവശ്യകത പരിശോധിക്കാനായി പുതിയ സമിതി രൂപവത്​കരിക്കുന്നതിനുള്ള കരട് നിയമത്തിന് മന്ത്രിസഭ ഈയടുത്താണ്​ അംഗീകാരം നൽകിയത്​.സ്​കൂൾ പ്രിൻസിപ്പൽമാരെ തെരഞ്ഞെടുക്കുന്ന ചുമതലയും ഈ സമിതിക്കായിരിക്കും.വിദ്യാഭ്യാസ സംവിധാനം വികസിക്കുന്നത്​ കണക്കിലെടുത്താണ്​ തീരുമാനം.സ്​കൂൾ ജീവനക്കാരെ തെരഞ്ഞെടുക്കുന്നതിനുള്ള സമിതിയും രൂപവത്​കരിക്കും. ഇതിനുള്ള കരട് നിയമത്തിനും മന്ത്രിസഭ അംഗീകാരം നൽകിയിട്ടുണ്ട്​.

സ്​കൂളുകൾക്കുള്ള മാർഗരേഖകളും നിയന്ത്രണങ്ങളും തയാറാക്കി സമർപ്പിക്കുക, സ്​കൂൾ ജീവനക്കാരുടെ കാര്യക്ഷമത വർധിപ്പിക്കുന്നതിനാവശ്യമായ മാർഗനിർദേശങ്ങൾ മുന്നോട്ടുവെക്കുക തുടങ്ങിയവയായിരിക്കും സമിതിയുടെ പ്രധാന ഉത്തരവാദിത്തങ്ങൾ.

ഖത്തറിലെ സ്​കൂളുകളിലെ ഫീസ്​ വർധന​ അടക്കമുള്ള വിഷയങ്ങൾ വിദ്യാഭ്യാസമന്ത്രാലയത്തിലെ സ്വകാര്യ സ്കൂൾസ് ലൈസൻസിങ് വിഭാഗത്തിൻെറ കീഴിലാണ്​. സ്കൂളുകൾ നടത്താനുള്ള സാമ്പത്തിക ആവശ്യങ്ങൾ, അക്കാദമിക്–വിദ്യാഭ്യാസ കാര്യങ്ങളുടെ നിലവാരം ഉയർത്തൽ, സ്കൂളുകളുടെ നടത്തിപ്പിനുള്ള സാമ്പത്തിക ആവശ്യങ്ങളുടെ കമ്മി, കെട്ടിടങ്ങളുടെ മാറ്റം, ഒരു കെട്ടിടത്തിൽനിന്ന് മറ്റൊരു കെട്ടിടത്തിലേക്കുള്ള സ്കൂളുകളു െട മാറ്റം, വാടകനിരക്കിലുള്ള വർധന തുടങ്ങിയ ഘടകങ്ങൾ പരിശോധിച്ചാണ്​ സ്കൂളുകൾക്ക് ഫീസ് വർധിപ്പിക്കാൻ മന്ത്രാലയം അനുമതി നൽകുന്നത്.