യുവകലാസാഹിതി മെഡിക്കൽ ക്യാമ്പ്

ദോഹ: സി.കെ. ചന്ദ്രപ്പൻ സ്മരണാർഥം യുവകലാസാഹിതി ഖത്തറും നോവ ഹെൽത്ത് കെയറും സംയുക്തമായി സൗജന്യ മെഡിക്കൽ ക്യാമ്പ് സംഘടിപ്പിച്ചു. ക്യാമ്പിന്‍റെ ഔപചാരിക ഉദ്ഘാടനം ഐ.സി.സി പ്രസിഡന്‍റ് പി.എന്‍. ബാബുരാജന്‍ നിർവഹിച്ചു. പ്രവാസികൾക്ക് കൈത്താങ്ങായി നിലകൊള്ളുന്ന യുവകലാസാഹിതി ഖത്തറിന്റെ ഉദ്യമങ്ങൾ മാതൃകാപരവും ശ്ലാഘനീയവുമാണെന്നും അദ്ദേഹം പറഞ്ഞു. യുവകലാസാഹിതി ഖത്തർ പ്രസിഡന്‍റ് അജിത് പിള്ള അധ്യക്ഷതവഹിച്ചു.

നോവ ഹെൽത്ത് കെയർ മാർക്കറ്റിങ് മാനേജർ റെയ്‌മോൻ ബാസ്റ്റിൻ, ഡോ. ബോണി ടോം എന്നിവരടങ്ങിയ മെഡിക്കൽ സംഘം ക്യാമ്പിന് നേതൃത്വം നൽകി. നോർക്ക രജിസ്ട്രേഷനും പ്രവാസി ക്ഷേമനിധി പെൻഷൻ രജിസ്ട്രേഷനും യുവകലാസാഹിതി വനിത വേദി സെക്രട്ടറി ഷാന ലാലു നേതൃത്വം നൽകി. മെഡിക്കൽ ക്യാമ്പ് കോഓഡിനേറ്റർമാർ കെ.ഇ. ലാലു, ജീമോൻ ജേക്കബ്, രജി പുത്തൂറാൻ, മോഹൻ ജോൺ, ഇബ്രൂ ഇബ്രാഹിം, രഘുനാഥ് എന്നിവർ നിയന്ത്രിച്ചു. സെക്രട്ടറി രാഗേഷ് കുമാർ നന്ദി പറഞ്ഞു.