നക്ഷത്രങ്ങൾക്കിടയിലിരുന്ന്​ സഫറു കാണുന്നു​; സൗഹൃദക്കൂട്ടി​ലൊരുങ്ങുന്ന സ്വപ്​നക്കൂട്​

ദോഹ: സൗഹൃദത്തിലൂടെ പടരുന്ന ബന്ധങ്ങൾ വൻമരം പോലെയാണ്​. തണലായി ഒരുപാട്​ പേർക്ക്​ ആശ്വാസം പകരും. താഴ്​വേരുകളിലൂടെ അതിരുകളില്ലാതെ, പിഴുതെറിയാനാവാത്തവിധം പടരും. മരൂഭൂമിയിൽ തളിരിടുന്ന സൗഹൃദങ്ങൾക്ക്​ ദേശ, ഭാഷാ, വർണ വ്യത്യാസമില്ല. മരുഭൂമിയിൽ വളരുന്ന ഈന്തപ്പനപോലെ, പുറം കാഴ്​ചകളേക്കാൾ കരുത്തോടെ താഴ്​വേരുകളിലേക്ക്​ സൗഹൃദം പടരും. ലോകം സൗഹൃദ ദിനം ആഘോഷിച്ച്​ ബന്ധങ്ങൾ അനുസ്​മരിച്ച്​ തിരക്കുകളിലേക്ക്​ നീങ്ങുന്നതിനിടെ ഖത്തറിൽ പൂത്തുപടർന്ന ഒരു സൗഹൃദത്തി​െൻറ കഥയറിയാം. തൃശൂർ പാവറട്ടി വെന്മേനാട് സ്വദേശി സഫറുദ്ദീ​െൻറയും അവ​െൻറ ഉറ്റമിത്രങ്ങളുടെയും കഥ​.

രണ്ടു മാസം മുമ്പാണ്​ 48കാരനായ സഫറു ദോഹയിൽ മരണ​മടയുന്നത്​. പക്ഷാഘാതത്തെ തുടർന്ന്​ കഴിഞ്ഞ സെപ്​റ്റംബറിൽ ആശുപത്രിയിൽ പ്രവേശിപ്പിച്ചു​​. അന്നു മുതൽ കൂട്ടുകാർ ആ ജീവനായി കൂടെ നിന്നു. ബോധം വന്നും പോയും നീണ്ട എട്ടുമാസത്തെ ചികിത്സക്കൊടുവിൽ തിരികെ ലഭിച്ചെന്ന്​ ആശ്വസിച്ചപ്പോഴായിരുന്നു ഹൃദയാഘാതം സഫറുവിനെ കൊണ്ടുപോയത്​. ​

വലിയൊരു സൗഹൃദകൂട്ടത്തി​െൻറ നെടൂംതൂണായിരുന്നു അന്ന്​ നഷ്​ടമായത്​. മലപ്പുറം ജില്ലയിലെ ക്രസൻറ്​ ബോർഡിങ്​ അലുംനിയിലെ കൂട്ടുകാരും നാട്ടുകാരും ഖത്തറിലെ സുഹൃത്തുക്കൾക്കും തീരാ വേദനയായ വേർപാട്​. കളിചിരി തമാശകൾക്കിടയിൽനിന്നും പെ​ട്ടെന്നൊരുനാൾ സഫറു പക്ഷാഘാതം വന്നു തളർന്ന്​ ആശുപത്രിയിലായ​പ്പോഴാണ്​ കൂട്ടുകാര​െൻറ സ്വപ്​നങ്ങൾ ആ സൗഹൃദ കൂട്ടത്തി​േൻറതുകൂടിയായത്​. ദീർഘകാലത്തെ പ്രവാസത്തിനിടയിൽ വീട്​ നിർമിക്കാനായി സ്​ഥലം വാങ്ങി അതിനുള്ള ഒരുക്കം സജീവമാക്കുന്നതിനിടെയാണ്​ സഫറു ആശുപത്രിയിലായത്​.

അവ​െൻറയും കുടുംബത്തി​െൻറയും സ്വപ്​നം കൂട്ടുകാർ ഏറ്റെടുത്തു. വീടിന്​ പ്ലാനൊരുങ്ങി, തറക്കല്ലിട്ടു, ചുമരുകൾ ഉയർന്നു, കോ​ൺക്രീറ്റും കഴിഞ്ഞു. അതിനിടയിലും അവനെ ജീവിതത്തിലേക്ക്​ എങ്ങനെയും തിരികെയെത്തിക്കാനുമുള്ള ശ്രമത്തിലായിരുന്നു അവർ. മികച്ച ചികിത്സ ഒരുക്കാനും ശ്രമിച്ചു. ആശുപത്രിയിൽനിന്നും ആരോഗ്യവാനായി പുറത്തിറങ്ങു​േമ്പാഴേക്കും കൂട്ടകാരന്​ സർപ്രൈസ്​ ആയി വീടുനൽകണമെന്നായിരുന്നു മോഹം. ജോലികൾ തകൃതിയായി. ചികിത്സയുടെ എട്ടാം മാസത്തിൽ കൈകൾ ചലിപ്പിച്ചും, കണ്ണുകൾ തുറന്നും പ്രതികരിച്ചു തുടങ്ങിയ സഫറു പ്രതീക്ഷയായി. അനിശ്ചിതത്വത്തിൽനിന്നും ജീവിതത്തിലേക്ക്​ തിരികെ വരുകയാണെന്ന്​ എല്ലാവരും ഉറപ്പിച്ചു. ഇതിനിടെ രണ്ടാഴ്​ചക്കുള്ളിൽ സഫറു വിടവാങ്ങി.

കൂട്ടുകാരൻ ആശുപത്രിക്കിടക്കവിട്ട്​ എഴുന്നേൽക്കു​േമ്പാൾ സമ്മാനമായി വീട്​ നൽകണം എന്ന്​ ആഗ്രഹിച്ചവർക്ക്​ അവ​െൻറ ചേതനയറ്റ ശരീരം പ്രിയപ്പെട്ട ഭാര്യക്കും 15ഉം 13ഉം വയസ്സുള്ള മക്കൾക്കും കുടുംബത്തിനും അരികിൽ എത്തിക്കാനായിരുന്നു നിയോഗം. നാട്ടി​ലെ മണ്ണിലേക്ക്​ സഫറു ചേർന്നെങ്കിലും അവ​െൻറ സ്വപ്​നം കൂട്ടുകാരിലൂടെ വളർന്നു. വേർപാടിനു പിന്നാലെ വീട്​ പണിക്ക്​ വേഗം കൂടി. ഇപ്പോൾ, തേപ്പും കഴിഞ്ഞ്​ അവസാന മിനുക്കുപണിയിലാണ്​ പാവർട്ടിയിലൊരുങ്ങുന്ന ആ സുന്ദര ​വീട്​. ആഗസ്​റ്റ്​ അവസാനത്തിൽ സഫറുവി​െൻറ കുടുംബത്തിന്​ തങ്ങളുടെ സ്​നേഹ സമ്മാനമായി ആ വീട്​ നൽകാൻ ഒരുങ്ങുകയാണ്​ ഈ സൗഹൃദകൂട്ടം.

ഹ​​ൃദ്യമായ സംഭാഷണംകൊണ്ടും, പെരുമാറ്റംകൊണ്ടും വ്യക്തിബന്ധം സൂക്ഷിക്കുന്നതിൽ സഫറുവി​െൻറ മികവ് അനുകരണീയമായിരുന്നുവെന്ന്​ കൂട്ടുകാർ ഓർക്കുന്നു. ചികിത്സ കാലയളവിൽ പതിനാറു വർഷം മുമ്പുള്ള സ്വദേശിയായ സ്പോൺസർ അഹമ്മദ്​ സഫറുവിനെ സന്ദർശിക്കാൻ ആശുപത്രിയിൽ എത്തുമായിരുന്നു. തൊഴിലാളി- മുതലാളി ബന്ധം, ജോലി വിടുന്നതോടെ അവസാനിക്കുന്ന കാലത്താണ്​ പഴയ തൊഴിലുടമയും സഫറുദ്ദീനും ഒന്നരപതിറ്റാണ്ട്​ പിന്നിട്ടിട്ടും ആത്മാർഥ സ്നേഹബന്ധം നിലനിർത്തിയത്​ എല്ലാവരും അറിയുന്നത്​. സഫറുവി​െൻറ മരണശേഷം അവ​െൻറ വീട്ടിലെ വിശേഷങ്ങൾ ചോദിച്ചു മനസ്സിലാക്കുന്നതിനിടയിലാണ്​ സുഹൃത്തുക്കൾ അവ​െൻറ കുടുംബത്തിനായി​ വീ​ട്​ നിർമിക്കുന്ന കാര്യം സ്​പോൺസറും അറിയുന്നത്​.

ആ സദുദ്യമത്തിൽ ത​െൻറ കൂടി പങ്കാളിത്തം ഉറപ്പാക്കാൻ സ്​പോൺസർ മറന്നില്ല. സഫറു കൂടി അംഗമായ ക്രസൻറ്​ ബോർഡിങ്ങിലെ അലുംനി പ്രവർത്തകർ, ഖത്തറിലെയും നാട്ടി​െലയും സുഹൃത്തുക്കൾ എന്നിവരാണ്​ മേൽനോട്ടം​.

നാസി ചമ്മനൂർ