രാജ്യം പെരുന്നാളാഘോഷത്തിൽ

ജിദ്ദ: ഇൗദുൽ ഫിത്വർ ആഘോഷത്തിനായി രാജ്യത്തെ നഗരങ്ങളും ഗ്രാമങ്ങളും ഒരുങ്ങി. അതതു മേഖലകളിലെ മുനിസിപ്പാലിറ്റികൾക്കും ഗ്രാമസഭകൾക്കും കീഴിൽ ​വിപുലമായ ഒരുക്കങ്ങളാണ്​ പൂർത്തിയാക്കിയിരിക്കുന്നത്​. മതകാര്യ​ ഒാഫീസുകൾക്ക് കീഴിൽ വിവിധ ഭാഗങ്ങളിൽ നിരവധി  ഇൗദുഗാഹുകളും ഒരുക്കിയിട്ടുണ്ട്​​. സന്ദർശകരെ സ്വീകരിക്കാൻ ഉല്ലാസ കേന്ദ്രങ്ങളും ഒരുങ്ങികഴിഞ്ഞു. പ്രധാന റോഡുകളും പൂന്തോട്ടങ്ങളും ഗവൺമ​​െൻറ്​ കെട്ടിങ്ങളും പാലങ്ങളും അലങ്കരിച്ചിട്ടുണ്ട്​. ഗാർഡനുകളിലെ കളി ഉപകരണങ്ങൾ കുറ്റമറ്റതാണെന്ന്​ ഉറപ്പുവരുത്തി. കോർണിഷ്​ പോലുള്ള സ്​ഥലങ്ങളിൽ റോഡുകളിലെ തിരക്കൊഴിവാക്കാൻ ട്രാഫിക്ക്​വിഭാഗം കൂടുതൽ ആളുകളെ നി​​യോഗിച്ചിട്ടുണ്ട്​. ഇൗദാഘോഷങ്ങൾ ഒരുക്കിയ സ്​ഥലങ്ങൾ ബന്ധപ്പെട്ട വകുപ്പ് മേധാവികൾ സന്ദർശിച്ച്​ ഒരുക്കങ്ങൾ പരിശോധിച്ചു. 
മക്കയിൽ മുനിസിപ്പാലിറ്റിക്ക്​ കീഴിൽ പതിവുപോലെ പ്രധാന റോഡുകളും തോട്ടങ്ങളും പാലങ്ങളും സ്​തൂപങ്ങളും കമാനങ്ങളും വർണവിളക്കുകളാൽ അലങ്കരിച്ചിട്ടുണ്ട്​.  മക്കയെ മോടി പിടിപ്പിക്കുന്നതിന്​ പുത്തൻ അലങ്കാര മാതൃകകൾ​  രുപകൽപന നടത്തിയത്​ വിഗദ്​ധരുടെ സംഘമാണെന്ന്​ മുനിസിപ്പാലിറ്റി ലൈറ്റ്​ വിഭാഗം മേധാവി എൻജിനീയർ ഉമർ ബിൻ അബ്​ദുറഹ്​മാൻ ബാബകി പറഞ്ഞു. തോട്ടങ്ങളിലും കെട്ടിടങ്ങളിലും 10000 ലധികം ലെഡ്​ ​സ്​പോട്ട്​ ലൈറ്റുകളും 9000 സാധാരണ സ്​പോട്ട്​ ലൈറ്റുകളും ഘടിപ്പിച്ചിട്ടുണ്ട്​.  വിത്യസ്ത രൂപത്തിലുള്ള 200 ലധികം മോഡലുകൾ  സ്​ഥാപിച്ചിട്ടുണ്ട്​.  വിവിധ ഭാഗങ്ങളിൽ 25000 മീറ്റർ നീളത്തിൽ ലഡ്​ സംവിധാനത്തിലുള്ള വിത്യസ്​ത നിറങ്ങളിൽ അലങ്കാര ബൾബുകളുടെ തോരണങ്ങൾ ഒരുക്കിയതായും അദ്ദേഹം പറഞ്ഞു. മക്കയിലേക്ക്​ എത്തുന്നവരുടെ ദൃഷ്​ടികൾക്ക്​ ആനന്ദവും മനസ്സിന്​ സന്തോഷവും പകരുന്നതോടൊപ്പം മക്കയുടെ വിശുദ്ധിക്ക്​ അനുയോജ്യമായ വിധത്തിലുള്ള അലങ്കാര പണികളാണ്​ ഇൗദുൽഫിത്വറിനോടനുബന്ധിച്ച്​ ഒരുക്കിയിരിക്കുന്നതെന്നും അദ്ദേഹം പറഞ്ഞു.  മൂന്നുറോളം തോട്ടങ്ങൾ മക്കയുടെ വിവിധ ഭാഗങ്ങളിലായി ഒരുക്കിയതായി മുനിസിപ്പാലിറ്റി അധികൃതർ പറഞ്ഞു. ഇവിടങ്ങളിൽ 500 ലധികം ഉപകരണങ്ങൾ കുട്ടികൾക്ക്​ കളിക്കാനൊരുക്കിയിട്ടുണ്ട്​.  
ത്വാഇഫ്​ മുനിസിപ്പാലിറ്റി പെരുന്നാൾ ആഘോഷത്തിന്​ മൂന്ന്​ സ്​ഥലങ്ങളാണ്​ ഒരുക്കിയിരിക്കുന്നത്​. നസീമിലെ കിങ്​ അബ്​ദുല്ല ഉല്ലാസ കേന്ദ്രം, ഹവിയയിലെ ഫൈസലിയ തോട്ടം, റുദഫ്​ ഉല്ലാസ കേന്ദ്രം എന്നിവിടങ്ങളിൽ പെരുന്നാളിനു ശേഷം മൂന്ന്​ ദിവസം ആഘോഷം നടക്കും. കുട്ടികൾക്കും കുടുംബങ്ങൾക്കുമായി വൈവിധ്യമാർന്ന കലാവിനോദ മൽസര പരിപാടികളുണ്ടാകും​. ആളുകൾ കൂടുതലാ​യെത്തുന്ന സ്​ഥലങ്ങളിൽ ശൂചീകരണ ജോലികൾക്ക്​ കൂടുതൽ തൊഴിലാളികളെ മുനിസിപ്പാലിറ്റി നിയോഗിച്ചിട്ടുണ്ട്​.