നിതാഖാത്ത്​: ഭിന്നശേഷിക്കാരുടെ പരിഗണന രണ്ടായി ചുരുക്കി

റിയാദ്: നിതാഖാത്തില്‍ ഭിന്നശേഷിക്കാരുടെ (വികലാംഗർ) നിയമന വ്യവസ്​ഥയിൽ ഭേദഗതി. സ്വദേശിയായ ഒരു ഭിന്നശേഷിക്കാര​​െൻറ നിയമനത്തിന്​ ഇനി രണ്ടു സ്വദേശികളെ നിയമിച്ച പരിഗണനയാകും ലഭിക്കുക. നേരത്തെ ഇത്​ നാലായിരുന്നു. പുതിയ വ്യവസ്​ഥ ഡിസംബർ 19 ന്​ പ്രാബല്യത്തിൽ വരും. ഇത്​ രണ്ടുവർഷം തുടരും. 2019 അവസാനത്തോടെ ഭിന്നശേഷിക്കാരുടെ നിയമനത്തിന്​ പ്രത്യേകം പരിഗണന ഉണ്ടാകില്ല. 
നിതാഖാത്ത് പ്രാബല്യത്തില്‍ വന്ന 2011 മുതല്‍ തൊഴിൽ മന്ത്രാലയത്തി​​െൻറ പ്രത്യേക ഉത്തരവ്​ പ്രകാരമാണ്​ ഭിന്നശേഷിക്കാരുടെ നിയമനത്തിന്​ നാല് പേരുടെ പരിഗണന നല്‍കിയിരുന്നത്. 
എന്നാല്‍ സൗദി തൊഴില്‍ വിപണിയുടെ പുരോഗതിയും പാകപ്പെട്ട സാഹചര്യവും വിലയിരുത്തുമ്പോള്‍ തുടക്കത്തില്‍ നല്‍കിയ പ്രത്യേക പരിഗണനയില്‍ മാറ്റം വരുത്തേണ്ടതുണ്ടെന്നാണ് മന്ത്രാലയത്തി​​െൻറ വിലയിരുത്തിയത്. ഭിന്നശേഷിക്കാരെ ജോലിക്ക് നിയമിച്ച സ്ഥാപനങ്ങള്‍ രണ്ട് പേരുടെ പരിഗണന ലഭിക്കാന്‍ പ്രത്യേകം അപേക്ഷിക്കണമെന്ന് ആവശ്യമായ രേഖകള്‍ സമര്‍പ്പിക്കണമെന്നും തൊഴില്‍ മന്ത്രാലയ വക്താവ് ഖാലിദ് അബല്‍ഖൈല്‍ പറഞ്ഞു.
 ഇത്തരത്തില്‍ അപേക്ഷ സമര്‍പ്പിക്കാനുള്ള കാലാവധി ഡിസംബര്‍ 19ഓടെ അവസാനിക്കുമെന്ന് വക്താവ് കൂട്ടിച്ചേര്‍ത്തു.