2022 ഫോർമുല വൺ കാറോട്ട മത്സരത്തിന് ജിദ്ദയിൽ തുടക്കം, ഫൈനൽ ഞായറാഴ്​ച

ജിദ്ദ: 2022 ഫോർമുല വൺ കാറോട്ട മത്സരം ജിദ്ദയിൽ ആരംഭിച്ചു. വെള്ളിയാഴ്​ച ഉച്ചക്ക്​ ശേഷമാണ്​ ജിദ്ദ കോർണിഷിലൊരുക്കിയ ട്രാക്കിൽ മൂന്ന്​ ദിവസം നീണ്ടു നിൽക്കുന്ന കാറോട്ട മത്സരത്തിന്റെ ആദ്യ പരീക്ഷണ ഓട്ടം ആരംഭിച്ചത്​. കഴിഞ്ഞ ഡിസംബറിലാണ്​ ആദ്യ ഫോർമുല വൺ കാറോട്ട മത്സരത്തിന്​ ജിദ്ദ കോർണിഷ്​ ആതിഥേയത്വം വഹിച്ചത്​.

മൂന്ന്​​​ മാസം പിന്നിടുമ്പോഴാണ്​ വീണ്ടും ജിദ്ദ നഗരം എസ്​.ടി.സി ഫോർമുല വൺ 2022 കാറോട്ടത്തിന്റെ തീ പാറുന്ന മത്സരത്തിന്​ വേദിയാകുന്നത്​​. 20 ടീമുകളെ പ്രതിനിധീകരിച്ച്​ 10 ഡ്രൈവർമാരാണ്​ മത്സരത്തിൽ പങ്കെടുക്കുന്നത്​. ശനിയാഴ്​ചയും പരീക്ഷണ, യോഗ്യതാ റൗണ്ടുകൾ നടക്കും. ഞായറാഴ്​ച രാത്രി എട്ടരക്കാണ്​ എസ്​.ടി.സി ഫോർമുല വൺ സൗദി ഗ്രാന്‍റ്​ പ്രിക്​സിന്റെ​ ഫൈനൽ റൗണ്ട്​ മത്സരം നടക്കുക. ഫൈനൽ റൗണ്ടുകൾ രണ്ട്​ മണിക്കൂർ വരെ നീണ്ടു നിൽക്കും. മത്സരത്തിന്റെ ടിക്കറ്റ്​ വിൽപന ദിവസങ്ങൾക്ക്​ മുമ്പ്​ സംഘാടകർ ആരംഭിച്ചിട്ടുണ്ട്​. കൂടാതെ മത്സര വേദിയിലേക്ക്​ സൗജന്യ ബസ്​ സർവിസും സംഘാടകർ ഒരുക്കിയിരുന്നു.

സൗദി അന്താരാഷ്​ട്ര ഓ​ട്ടോമൊബൈൽ ഫെഡറേഷൻ ഈ വർഷം സംഘടിപ്പിക്കുന്ന മൂന്നാമത്തെ പ്രധാന ലോക ചാമ്പ്യൻഷിപ്പാണ്​ ജിദ്ദയിൽ ആരംഭിച്ച 2022 ഫോർമുല വൺ കാറോട്ട മത്സരം. അടുത്തിടെയാണ്​ ഡക്കാർ റാലിക്കും ഫോർമുല ഇ സീസണിന്റെ ഓപ്പണിങ്​ റൗണ്ടിനും സൗദി അറേബ്യ വേദിയായത്​. രാജ്യം ഇപ്പോൾ മോട്ടോർ സ്‌പോർട്‌സിന്റെ ഭവനമായി മാറിയിരിക്കുന്നുവെന്ന്​ 2022 ഫോർമുല വൺ മത്സരം ആരംഭിക്കുന്നതിന്​ രണ്ട്​ ദിവസം മുമ്പ് സൗദി കായിക മന്ത്രി അമീർ അബ്​ദുൽ അസീസ്​ ബിൻ തുർക്കി പറഞ്ഞിരുന്നു.​

ഫോർമുല വൺ മത്സരത്തിൽ ഇതുവരെ അനുഭവിച്ചിട്ടില്ലാത്ത പുതിയത്​ നേടാനാണ്​ ഞങ്ങൾ ശ്രമിക്കുന്നത്​. ആദ്യ ഫോർമുല വൺ മത്സരം വൻ വിജയമായിരുന്നു. കായികരംഗത്ത്​ താൽപര്യമുള്ളവരെ അത്​ അമ്പരപ്പിച്ചു. രണ്ടാം മത്സരവും വലിയ നേട്ടമാകുമെന്നാണ്​ പ്രതീക്ഷിക്കുന്നത്​. മത്സരത്തിനായി കുറഞ്ഞ മാസങ്ങൾക്കുള്ളിൽ ലോകത്തെ​ ഏറ്റവും നീളമുള്ള സർക്യൂട്ട്​ ഒരുക്കാൻ സാധിച്ചു. മൂന്ന് ദിവസങ്ങളിലായി നേരത്തെ ജിദ്ദ കോർണിഷ് സർക്യൂട്ടിൽ നടന്ന ആദ്യ ഫോർമുല വൺ മത്സരം 1,40,000ത്തിലധികം ​പേർ കണ്ടതായും കായിക മന്ത്രി പറഞ്ഞു.