ഹജ്ജ്​ അനുമതിപത്രമില്ലാതെ മക്കയിൽ കടന്നാൽ 10,000 റിയാൽ പിഴ

ജിദ്ദ: അനുമതിപത്രമില്ലാതെ മക്ക മസ്​ജിദുൽ ഹറാമിലേക്കും പരിസരങ്ങളിലേക്കും പുണ്യസ്ഥലങ്ങളായ മിന, മുസ്​ദലിഫ, അറഫ എന്നിവിടങ്ങളിലേക്കും കടക്കാൻ ശ്രമിക്കുന്നവർക്ക്​ 10,000 റിയാൽ പിഴയുണ്ടാകുമെന്ന്​ സൗദി ആഭ്യന്തര മന്ത്രാലയ വൃത്തങ്ങൾ അറിയിച്ചു. തിങ്കളാഴ്​ച മുതൽ നിയന്ത്രണം നടപ്പാവും. ഈ മാസം 23 വരെ (ദുൽഹജ്ജ്​ 13) നിയന്ത്രണം തുടരും.

നിയമലംഘനം ആവർത്തിച്ചാൽ പിഴ ഇരട്ടിയാകും. മുഴുവനാളുകളും ഹജ്ജ്​ നിർദേശങ്ങൾ പാലിക്കണമെന്നും ആഭ്യന്തര മന്ത്രാലയ വൃത്തങ്ങള്‍ ആവശ്യപ്പെട്ടു. നിയമലംഘനങ്ങൾ തടയുന്നതിനും നിയന്ത്രിക്കുന്നതിനും നിയമം ലംഘിക്കുന്നവർക്കെതിരെ പിഴ ചുമത്തുന്നതിനും സുരക്ഷ ഉദ്യോഗസ്ഥർ മസ്​ജിദുൽ ഹറാമിലേക്കും മശാഇറിലേക്കും എത്തുന്ന റോഡുകളിലുണ്ടാകും.