പെരിന്തൽമണ്ണ സ്വദേശി റിയാദിൽ ഹൃദയാഘാതം മൂലം മരിച്ചു

റിയാദ്: ശാരീരികാസ്വാസ്ഥ്യത്തെ തുടർന്ന് റിയാദിലെ​ ആശുപത്രിയിൽ ചികിത്സയിലിരുന്ന മലയാളി മരിച്ചു. മലപ്പുറം പെരിന്തല്‍മണ്ണ ആനമങ്ങാട് സ്വദേശി തയ്ക്കോട്ടിൽ വീട്ടിൽ ഉമർ (64) ആണ്​ ആസ്​റ്റർ സനദ് ആശുപത്രിയിൽ വെച്ച്​ ഹൃദയാഘാതം മൂലം മരിച്ചത്​.

ചെറിയ ശാരീരിക അസ്വസ്ഥതകൾ അനുഭവപ്പെട്ടതിനെ തുടർന്നാണ്​ ആശുപത്രിയിൽ പ്രവേശിപ്പിച്ചത്​. വിവരം അറിഞ്ഞ് നാട്ടിൽനിന്നും ഭാര്യയും ഏകമകളും ഞായറാഴ്​ച രാത്രിയിൽ എയർ ഇന്ത്യ എക്സ്പ്രസ്​ വിമാനത്തിൽ റിയാദിലെത്തി. അതിനു​ശേഷമാണ് അവർ​ മരണവിവരം അറിയുന്നത്​. ഞായറാഴ്​ച രാത്രി 10.42നാണ്​ മരിച്ചത്​.

അപ്പോൾ കുടുംബം റിയാദ്​ എയർപ്പോർട്ടിൽ എത്തിയതേയുണ്ടായിരുന്നുള്ളൂ. 34 വർഷമായി റിയാദിൽ പ്രവാസിയായ ഉമർ സ്വകാര്യ കമ്പനിയിൽ ജോലി ചെയ്യുകയായിരുന്നു.

പിതാവ്: മൊയ്തീൻ കുട്ടി, മാതാവ്: ഫാത്തിമ, ഭാര്യ: ഹലീമ, മകൾ: നദ ഫാത്തിമ. മൃതദേഹം നാട്ടിൽ കൊണ്ടുപോകുന്നതിനുള്ള നടപടികൾ പൂർത്തീകരിക്കാൻ സഹോദരൻ അസ്‌ക്കർ അലിക്ക്​ സഹായമായി റിയാദ് കെ.എം.സി.സി വെൽഫെയർ വിങ്​ ഭാരവാഹികളായ റഫീഖ് പുല്ലൂർ, റിയാസ് തിരൂർക്കാട്, റഫീഖ് ചെറുമുക്ക്, ഷെബീർ കളത്തിൽ, ബുഷീർ എന്നിവർ രംഗത്തുണ്ട്.