ത്വാഇഫിലെ അൽ-അർഫ കോട്ട

ജുബൈൽ: പടിഞ്ഞാറൻ സൗദിയിലെ ത്വാഇഫ് പട്ടണത്തിന്‍റെ വടക്കുകിഴക്കായി സ്ഥിതിചെയ്യുന്ന 13ാം നൂറ്റാണ്ടിൽ നിർമിച്ച അൽ-അർഫ കോട്ട സഞ്ചാരികളെ ആകർഷിക്കുന്നു. പ്രാചീനകാലത്തെ സാമൂഹികവും സാംസ്കാരികവുമായ ജീവിതത്തിന്‍റെ സവിശേഷതകൾ വിശദീകരിക്കുന്ന ചരിത്ര പ്രാധാന്യമുള്ള ഒന്നാണ് ഈ കോട്ട.

അൽ-അർഫ മലനിരയിൽ ആയതിനാലാണ് കോട്ടക്കും അതേ പേര് ലഭിച്ചത്. 13-ാം നൂറ്റാണ്ടിൽ സൈനിക നേതാക്കളുടെ സങ്കേതമായി പ്രവർത്തിക്കുകയും വ്യാപാര വാണിജ്യ കാര്യങ്ങളിൽ പ്രധാന പങ്കുവഹിക്കുകയും ചെയ്ത രാജ്യത്തെ പ്രശസ്ത കോട്ടകളിലൊന്നാണിത്. ഈ കോട്ട ശൈഖ് കാസിൽ എന്നും ശരീഫ് കാസിൽ എന്നും അറിയപ്പെടുന്നു. വ്യാപാര പാതകൾ സംരക്ഷിക്കുന്നതിനും ആക്രമണകാരികളായ ഗോത്രങ്ങളെ തടയുന്നതിനുമായി നിർമിച്ച നിരവധി കോട്ടകളിൽ ഒന്നായിരുന്നു ഇത്. ക്വാർട്സ് കല്ലുകൾ കൊണ്ട് അലങ്കരിച്ച രണ്ടു വാച്ച് ടവറുകൾ ഈ കോട്ടയിലുണ്ട്.

കോട്ടക്ക് മൂന്നു നിലകളാണുള്ളത്. ആദ്യത്തേത് കല്ലുകൊണ്ട്​ നിർമിച്ചതാണ്. രണ്ടാമത്തെയും മൂന്നാമത്തെയും നില കളിമണ്ണുകൊണ്ടാണ്​ നിർമിച്ചിരിക്കുന്നത്. അതിന്‍റെ ചുവരുകളിൽ തമുദിക്, കൂഫിക് നാഗരികതകൾ മുതലുള്ള നിരവധി പുരാതന ലിഖിതങ്ങളും കൊത്തുപണികളും അടങ്ങിയിരിക്കുന്നു. അവ അക്കാലത്തെ നിവാസികളുടെ ജീവിതശൈലി വരച്ചുകാട്ടുന്നവയാണ്. ഭരണകർത്താക്കൾക്കും അവരുടെ തൊഴിലാളികൾക്കുമായി പ്രത്യേകമായി ക്രമീകരിച്ച അറകളോടുകൂടിയതാണ് ഉൾഭാഗം. കോട്ടയ്ക്കുള്ളിൽ വിശാലമായ മുറികൾ, സ്​റ്റോറേജ് ഏരിയകൾ, ചെറിയ ജയിൽ, പ്രാർഥനാമുറി എന്നിവയുണ്ട്.

കോട്ടയുടെ പ്രാന്തപ്രദേശത്ത് സിലിണ്ടർ ആകൃതിയിലുള്ള ഒരു രഹസ്യാന്വേഷണ ഗോപുരം ഉണ്ട്. ചുറ്റുപാടും വീക്ഷിക്കാൻ നിരീക്ഷണ കേന്ദ്രങ്ങളുണ്ട്. വർഷം മുഴുവനും താമസക്കാർക്ക് വെള്ളം നൽകിയിരുന്ന നിരവധി കിണറുകളുമുണ്ട്. ത്വാഇഫിൽ നിന്ന് 35 കിലോമീറ്റർ വടക്കുകിഴക്കായുള്ള ഈ പർവതം വിനോദസഞ്ചാരികളെ ആകർഷിക്കുന്ന പാറകളുടെയും ലിഖിതങ്ങളുടെയും വലിയ പൗരാണിക സ്ഥലങ്ങളിൽ ഒന്നാണ്.