സൗദിയിൽ​ കാണാതായ ആലിക്കുട്ടിക്കായി കുടുംബത്തി​ന്‍റെ കണ്ണീരുണങ്ങാ കാത്തിരിപ്പിന്​ അഞ്ചാണ്ട്​​

റിയാദ്​: സൗദി അറേബ്യയിൽനിന്ന്​ അഞ്ചുവർഷം മുമ്പ്​ നാട്ടിലേക്ക്​ തിരിച്ച ആലിക്കുട്ടി ഇനിയും വീട്ടിലെത്തിയില്ല. പ്രിയതമയുടെയും മക്കളുടെയും ഉമ്മയുടെയും കൂടപിറപ്പുകളുടെയും കണ്ണീരുണങ്ങാ കാത്തിരിപ്പ്​ രാപ്പകലുകളറിയാതെ നീളുന്നു. കോഴിക്കോട്​ കൊടുവള്ളി ആവിലോറ കൊല്ലരുകണ്ടിയിൽ അബൂബക്കർ ഹാജിയുടെയും പാത്തുമ്മയുടെയും ആറുമക്കളിൽ മൂത്തയാളായ ആലിക്കുട്ടി (55) 20 വർഷത്തിലേറെയായി സൗദിയിൽ പ്രവാസിയായിരുന്നു. ഖസീം പ്രവിശ്യയിലെ അൽറസിൽ ലഘുഭക്ഷണശാല (ബൂഫിയ) നടത്തുകയായിരുന്നു.

അഞ്ച്​ വർഷം മുമ്പ്​ വരെ നാട്ടിൽ വീട്ടുകാരുമായി നിരന്തരം ഫോണിൽ ബന്ധപ്പെട്ടിരുന്നു. പെ​ട്ടെന്നൊരുദിവസം വിളിപ്പുറത്തില്ലാതാവുകയായിരുന്നു. ഏഴുവർഷം മുമ്പാണ്​ അവസാനമായി നാട്ടിൽപോയി മടങ്ങിയത്​. മൂന്ന്​ ആൺകുട്ടിയുടെയും ഒരു പെൺകുട്ടിയുടെയും പിതാവായ ആലിക്കുട്ടി ഭാര്യയും മക്കളും മറ്റ്​ കുടുംബാംഗങ്ങളുമായി നല്ല ബന്ധത്തിലാണ്​ കഴിഞ്ഞിരുന്നത്​.

അവധിക്ക്​ പോകുന്നു എന്ന്​ പറഞ്ഞയാളെ പിന്നീട്​ കാണാതാവുകയാണ്​ ഉണ്ടായത്​. നാട്ടിലേക്ക്​ വരികയാണെന്ന്​ ബന്ധുക്കളോടും സുഹൃത്തുക്കളോടുമൊക്കെ പറഞ്ഞിരുന്നതാണ്​​. എന്നാൽ നാട്ടിലോ വീട്ടിലോ എത്തിയില്ല. സൗദിയിലുള്ള അനുജന്മാരും ബന്ധുക്കളും സുഹൃത്തുക്കളുമെല്ലാം വ്യാപക അന്വേഷണം നടത്തി. 2018 ജൂലൈ 24-ന്​ നാട്ടിൽ പോകാൻ റീഎൻട്രി വിസ അടിച്ചിരിക്കുന്നതായി കണ്ടെത്തി. ആറുമാസ അവധിയുള്ളതായിരുന്നു വിസ. ആലിക്കുട്ടിയെ കുറിച്ച്​ ഒന്നും അറിയാതായ ശേഷം ലഭിച്ച ഏക വിവരവും രേഖയുമാണ്​ ഇത്​.

സൗദിയിൽനിന്ന്​ പോയിരിക്കും എന്നാണ്​ ബന്ധുക്കളും സുഹൃത്തുക്കളുമൊക്കെ കരുതുന്നത്​. എന്നാൽ നാട്ടിലെത്തിയിട്ടില്ല, എങ്കിൽപിന്നെ എങ്ങോട്ട്​ പോയി. അതാണ്​ ഉത്തരംകിട്ടാ ചോദ്യമായി ഉറ്റവരെയും ഉടയവരെയും വിഷമിപ്പിച്ചുകൊണ്ടിരിക്കുന്നത്​.

കുടുംബം വഴിക്കണ്ണുമായി കാത്തിരിപ്പ്​ ഇപ്പോഴും തുടരുന്നു. പിതാവ്​ നേരത്തെ മരിച്ചിരുന്നു. വാർദ്ധക്യത്തിലെത്തിയ ഉമ്മയുടെയും, ഭാര്യയുടെയും മക്കളുടെയും കണ്ണീര്​ തോർന്നിട്ടില്ല. രണ്ടുവർഷം മുമ്പ്​ മൂത്ത മകൾ വിവാഹിതയായി. രണ്ടാമത്തെ മകൻ 10-ാം ക്ലാസിലും മൂന്നാമൻ ഏഴാം ക്ലാസിലും ഏറ്റവുമിളയ മകൻ ഒന്നാം ക്ലാസിലും പഠിക്കുന്നു​. ഇവരെല്ലാം ഉപ്പയെ കാത്തിരിക്കുകയാണ്​​.

കാണാതായ ശേഷം സുഹൃത്തുക്കൾ സമൂഹമാധ്യമങ്ങൾ വഴി കാര്യമായ അന്വേഷണം നടത്തിയിരുന്നു. പക്ഷേ ഒരു സൂചനയും ലഭിച്ചില്ല. എന്നാൽ കുറച്ചുകാലം മുമ്പ്​ വരെ ഫേസ്​ബുക്കിൽ അലി ആവിലോറ എന്ന അക്കൗണ്ട്​ സജീവമായിരുന്നു. പല വിഷയങ്ങളിലും പ്രതികരിക്കുകയും പോസ്​റ്റുകൾ ഇടുകയും ചെയ്​തിരുന്നു. അൽറസിൽ കെ.എം.സി.സിയുടെ സജീവ അംഗമായ ഇദ്ദേഹം സാമൂഹികപ്രവർത്തകനെന്ന നിലയിൽ പല വിഷയങ്ങളിലും പ്രതികരിച്ചിരുന്നു. ഫേസ്​ബുക്കിലുണ്ടെന്ന്​ മനസിലാക്കി ബന്ധുക്കൾ​ മെസഞ്ചറിലൂടെ ബന്ധപ്പെടാൻ ശ്രമിച്ചെങ്കിലും ​പ്രതികരണമുണ്ടായില്ല.

രണ്ട്​ സഹോദരങ്ങൾ സൗദിയിലുണ്ട്​​. ഖത്വീഫിൽ ഷുക്കൂറും ജിദ്ദയിൽ സുബൈറും. ദുബൈയിൽ മറ്റൊരു സഹോദരൻ ബഷീറും. ഇവ​രെല്ലാം തങ്ങൾക്ക്​ സാധ്യമായ മാർഗങ്ങളിലൂടെ കഴിഞ്ഞ അഞ്ചുവർഷമായി അന്വേഷണം നടത്തുകയാണ്​. ഭാര്യയുമായി എന്തോ ഒരു ചെറിയ സൗന്ദര്യ പിണക്കമുണ്ടായി എന്നതല്ലാതെ വീട്ടിൽനിന്ന്​ മാറിനിൽക്കാൻ കാര്യമായ എന്തെങ്കിലും കാരണമുള്ളതായി ഇവർക്കാർക്കും അറിയില്ല. ഇദ്ദേഹത്തെ കുറിച്ച്​ എന്തെങ്കിലും വിവരം ലഭിക്കുന്നവർ 0504331778 എന്ന നമ്പറിൽ ബന്ധപ്പെടണമെന്ന്​ സഹോദ​രൻ ഷുക്കൂർ അറിയിച്ചു.