ഗസ്സ ആക്രമണം അവസാനിപ്പിക്കണമെന്ന്​ അറബ്-ഇസ്‌ലാമിക് ഉച്ചകോടി

റിയാദ്​: ഗസ്സ ആക്രമണത്തെ ‘സ്വയംപ്രതിരോധം’ എന്ന് ഇസ്രായേൽ വിശേഷിപ്പിക്കുന്നതോ ന്യായീകരിക്കുന്നതോ സമ്മതിച്ചുതരാനാവില്ലെന്ന്​ അറബ്-ഇസ്‌ലാമിക് ഉച്ചകോടി അന്തിമ പ്രസ്​താവന. ഗസ്സയിലെ യുദ്ധം അവസാനിപ്പിക്കണമെന്ന് പ്രസ്​താവന ആവശ്യപ്പെട്ടു.

ഫലസ്തീനികൾക്കെതിരായ ഇസ്രായേൽ നടപടികളെ സ്വയംപ്രതിരോധമായി ന്യായീകരിക്കുന്നത് തള്ളിക്കളയുകയാണ്​. ഗസ്സ മുനമ്പിൽ ഇസ്രായേൽ നടത്തുന്ന ആക്രമണം യുദ്ധക്കുറ്റമാണ്​. അധിനിവേശ ഭരണകൂടത്തിന്‍റെ ക്രൂരവും മനുഷ്യത്വരഹിതവുമായ ഈ കൂട്ടക്കൊലകളെ ഉച്ചകോടി ശക്തമായി അപലപിക്കുന്നു.

ഗസ്സയിലെ ഉപരോധം അവസാനിപ്പിക്കാനും അവിടേക്ക്​ മാനുഷിക സഹായം അനുവദിക്കാനും ഇസ്രായേലിലേക്കുള്ള ആയുധ കയറ്റുമതി നിർത്തിവയ്ക്കാനും പ്രസ്​താവന ആവശ്യപ്പെട്ടു. ഭാവിയിലെ ഫലസ്തീൻ രാഷ്​ട്രത്തിൽ ഗാസയെ വെസ്​റ്റ്​ ബാങ്കിൽ നിന്ന് വേറിട്ട് നിർത്തുന്ന ഏതൊരു നിർദ്ദേശവും തങ്ങൾ നിരസിക്കുന്നതായി അറബ്, മുസ്​ലിം നേതാക്കൾ പറഞ്ഞു.

കിഴക്കൻ ജറൂസലേമിനെ തലസ്ഥാനമാക്കി, ഫലസ്തീൻ രാജ്യത്തിന്‍റെ പ്രദേശമെന്ന നിലയിൽ ഗസ്സയുടെയും വെസ്​റ്റ്​ ബാങ്കി​െൻറയും ഐക്യത്തി​െൻറ പ്രാധാന്യം അന്തിമ പ്രസ്താവനയിൽ ഊന്നിപ്പറഞ്ഞു. ഇസ്രയേലി​െൻറ നിരോധിത ആയുധ പ്രയോഗത്തെ കുറിച്ച് അന്വേഷിക്കാൻ രാസായുധ നിരോധന സംഘടനയോട് സംയുക്ത അറബ്-ഇസ്​ലാമിക് ഉച്ചകോടി ആവശ്യപ്പെടുന്നതായും പ്രസ്​താവനയിൽ പറഞ്ഞു. ഫലസ്തീൻ ജനതയ്‌ക്കെതിരായ ഇസ്രായേലി​െൻറ കുറ്റകൃത്യങ്ങൾ അന്വേഷിക്കാൻ അന്താരാഷ്​ട്ര ക്രിമിനൽ കോടതിയോട്​ ഉച്ചകോടി ആവശ്യപ്പെട്ടു.