മാതാപിതാക്കൾ മരിച്ചതോടെ തനിച്ചായ ആരാധ്യ നാട്ടിലേക്ക്

ദമ്മാം: താമസസ്ഥലത്ത് മരിച്ച കൊല്ലം സ്വദേശികളായ ദമ്പതികൾ അനൂപ്​ മോഹന​െൻറയും രമ്യയുടേയും മൃതദേഹങ്ങൾ തിങ്കളാഴ്ച രാത്രി നാട്ടിലേക്ക് കൊണ്ടുപോയി. ചൊവ്വാഴ്ച പുലർച്ചെ എയർ ഇന്ത്യ എക്​സ്പ്രസ് വിമാനത്തിൽ തിരുവന്തപുരം വിമാനത്താവളത്തിൽ എത്തുന്ന മൃതദേഹങ്ങൾ ബന്ധുക്കൾ ഏറ്റുവാങ്ങി സംസ്കരിക്കും. മാതാപിതാക്കൾ പോയതോടെ തനിച്ചായ ഏക മകൾ അഞ്ചു വയസുകാരി ആരാധ്യയും അച്​ഛ​േൻറയും അമ്മയുടേയും മൃതദേഹങ്ങൾക്കൊപ്പം നാട്ടിലേക്ക് പോയി.

അൽ ഖോബറിലെ തുഖ്​ബയിൽ കഴിഞ്ഞ മാസമാണ് കൊല്ലം തൃക്കരുവ സ്വദേശി നടുവിലച്ചേരി മംഗലത്തുവീട്ടില്‍ അനൂപ് മോഹനനെയും (37), ഭാര്യ രമ്യമോളെയും (28) ഫ്ലാറ്റിൽ മരിച്ചനിലയിൽ കാണപ്പെട്ടത്. ഇവരുടെ അഞ്ച്​ വയസുകാരി മകൾ ആരാധ്യയുടെ കരച്ചിൽ കേട്ടാണ്​ അയൽവാസികൾ വിവരമറിയുന്നത്​. പൊലീസെത്തി ഫ്ലാറ്റി​െൻറ വാതിൽ തുറന്ന്​ നോക്കിയപ്പോൾ അനൂപിനെ​ ഫാനിൽ തൂങ്ങി മരിച്ച നിലയിലൂം രമ്യയെ കട്ടിലിൽ മരിച്ച നിലയിലും കാണുകയായിരുന്നു.

സൗദി പൊലീസ് ആരാധ്യയെ താൽക്കാലിക സംരക്ഷണത്തിന്​ ലോക കേരളസഭാ അംഗവും സാമൂഹിക പ്രവർത്തകനുമായ നാസ് വക്കത്തിനെ ഏൽപ്പിക്കുകയായിരുന്നു. നവോദയ തുഖ്​ബ സമൂഹികക്ഷേമ വിഭാഗത്തി​െൻറ മികച്ച സഹകരണവും ലഭിച്ചിരുന്നുവെന്നും അദ്ദേഹം അറിയിച്ചു. നാസ് വക്കത്തി​െൻറ ഇടപെടലിലൂടെ അനൂപി​െൻറ പേരിൽ അൽഅഹ്​സയിൽ ഉണ്ടായിരുന്ന 1,77,000 റിയാലി​െൻറ സാമ്പത്തിക കേസും ദമ്മാമിൽ ഒരു സ്വദേശി നൽകിയ 36,000 റിയലി​െൻറ സാമ്പത്തിക കേസും പിൻവലിപ്പിച്ചതിന് ശേഷം തുടർനടപടികൾ വേഗത്തിൽ പൂർത്തിയാക്കി.

ഇതോട്​ കൂടിയാണ് ദമ്മാം മെഡിക്കൽ കോംപ്ലക്സ് മോർച്ചറിയിൽ സൂക്ഷിച്ചിരുന്ന മൃതദേഹങ്ങൾ നാട്ടിലയക്കുന്നതിനുള്ള വഴി തുറന്നത്. ഇന്ത്യൻ എംബസി കമ്യൂണിറ്റി വെൽഫെയർ ഫണ്ട് വിനിയോഗിച്ചാണ് മൃതദേഹങ്ങൾ നാട്ടിലെത്തിച്ചത്. ആരാധ്യയെയും കൊണ്ട്​ നാസ് വക്കവും ഇതേ വിമാനത്തിൽ നാട്ടിലേക്ക്​ പോയി. അനൂപ് മോഹൻ 12 വർഷമായി തുഖ്​ബ സനാഇയ്യയിൽ പെയിൻറിങ് വർക്ക്ഷോപ്പ് നടത്തിവരികയായിരുന്നു. അനൂപിന് സാമ്പത്തിക പ്രതിസന്ധികൾ ഉണ്ടായിരുന്നതായി സുഹൃത്തുക്കൾ പറയുന്നു. അഞ്ച്​ മാസം മുമ്പാണ് രമ്യയും മകളും സന്ദർശനവിസയിൽ സൗദിയിൽ എത്തിയത്.