അറഫ സംഗമത്തിനായുള്ള തീർഥാടകരുടെ വരവ്​ പൂർത്തിയായി

ജിദ്ദ: അറഫ സംഗമത്തിനായുള്ള തീർഥാടകരുടെ വരവ്​ പൂർത്തിയായി. തൂവെള്ള വസ്​ത്രം ധരിച്ചും ലബൈക്ക ചൊല്ലിയും തിങ്കളാഴ്​ച സുര്യോദയത്തിനു ശേഷമാണ്​ മിനയിൽ നിന്ന്​ അറഫയിലേക്കുള്ള തീർഥാടകരുടെ വരവ്​ തുടങ്ങിയത്​.

കർശനമായ ആരോഗ്യ മുൻകരുതൽ പാലിച്ച്​ സൗദി അറേബ്യയുടെ വിവിധ ഭാഗങ്ങളിൽ നിന്നുള്ള പൗരന്മാരും രാജ്യത്തെ താമസക്കാരുമായ 60,000 പേരാണ്​ ഇൗ വർഷ​ത്തെ ഹജ്ജ്​ വേളയിലെ സുപ്രധാന ചടങ്ങിനായി വിശാലമായ അറഫ മൈതാനത്ത്​ സംഗമിച്ചിരിക്കുന്നത്​.

മുഴുവൻ തീർഥാടകരെയും ബസ്സുകളിലാണ്​ അറഫയിലെത്തിച്ചത്​. അറഫയിലെത്തിയ തീർഥാടകർ അവിടെ വെച്ച്​ ദുഹ്​റും അസ്​റും ഒരുമിച്ച്​ നമസ്​കരിച്ച്​ സുര്യാസ്​തമയം വരെ അവിടെ പാപമോചനവും കാരുണ്യവും തേടി പ്രാർഥനകളിൽ മുഴുകും. ശേഷം മുസ്​ദലിഫയിലേക്ക്​ രാപ്പാർക്കാൻ തിരിക്കും.