അവധിക്കാലത്തെ വരവേൽക്കാൻ അസീർ സജീവമായി

ഖമീസ് മുശൈത്ത്: നാട്ടിലും ഗൾഫിലും അവധിക്കാലമായതോടെ സന്ദർശകരെ സ്വീകരിക്കാൻ ദക്ഷിണ സൗദിയിലെ അസീർ മേഖല ഒരുങ്ങി. ഇന്ത്യയിൽ അവധിക്കാലം ആരംഭിക്കുകയും സൗദിയിലേക്ക്​ സന്ദർശക വിസ ലഭിക്കാൻ നടപടിക്രമങ്ങൾ ലളിതമാകുകയും ഫീസ്​ കുറയുകയും ചെയ്​തതോടെ പ്രവാസി കുടുംബങ്ങൾ ധാരാളമായി വരാൻ തുടങ്ങിയിട്ടുണ്ട്​. ഇവരിൽ അധികവും സൗദി അറേബ്യയിലെ ഉൗട്ടിയെന്ന്​ മലയാളികൾ വിശേഷിപ്പിക്കാറുള്ള അസീർ മേഖലയിലെ അബ്​ഹ ഉൾപ്പെടെയുള്ള സുഖവാസ, വിനോദ സഞ്ചാര കേന്ദ്രങ്ങൾ സന്ദർശിക്കാനെത്തുന്നുണ്ട്​​.

റമദാൻ കഴിയുന്നതോടെ ഗൾഫ് രാജ്യങ്ങളിൽ നിന്ന്​ കൂടി സന്ദർശകർ എത്തി സീസൺ സജീവമാകും. സന്ദർശകരെ വരവേൽക്കാൻ മേഖലയാകെ മോടിപിടിപ്പിക്കാനും കൂടുതൽ സൗകര്യങ്ങൾ ഒരുക്കാനും അധികൃതർ തകൃതിയായ പ്രവർത്തനങ്ങളാണ്​ നടത്തുന്നത്​. പെരുന്നാളിന്​ അബ്ഹ ഫെസ്​റ്റിവൽ കൂടി തുടങ്ങുന്നതോടെ പൂർണമായും ഉത്സവാന്തരീക്ഷമാകും.

സന്ദർശകർ കൂടുതൽ എത്തുന്നത് അബ്ഹയിലെ അൽസുദ, റിജാൽ അൽമ, ഗ്രീൻ മൗണ്ടൻ, ആർട്​സ്​ മ്യൂസിയം, ആർട്​സ്​ സ്ട്രീറ്റ്, അബ്ഹ ഡാം, ഖയാൽ പാർക്ക്, സഹാബ് പാർക്ക്, ദർബ് ചുരം, മഹായിൽ ചുരം, ഹബ്‌ല, ദന്തഹ ഡാം എന്നിവയും സമീപ പ്രദേശത്തെ നജ്റാൻ ഹുദൂദ്, ജിസാനിലെ ശുഖൈഖ് ബീച്ച്, ജിസാൻ ബീച്ച്, ഫർസാൻ ദീപ് തുടങ്ങിയ ഇടങ്ങളിലുമാണ്. ഇപ്പോൾ കൂടുതലായി ഈ ഇടങ്ങളിൽ എത്തുന്നത് സ്വദേശികളും മലയാളി കുടുംബങ്ങളുമാണ്.
സന്ദർശകരുടെ പ്രവാഹം ആരംഭിച്ചതോടെ വ്യാപാര രംഗവും ഉണർന്നുകഴിഞ്ഞു.