നീന്തിത്തുടിക്കാം; ഈ പൊയ്​കയിലെ പന്തോളങ്ങളിൽ

ജിദ്ദ: ഈ വർഷത്തെ ജിദ്ദ സീസൺ ആഘോഷ വേദികളിൽ ഏറ്റവും ആകർഷണീയത സിറ്റി വാക്കിലെ ബീച്ച്​ ക്ലബ്ബിനാണ്​. അതുല്യമായ വിസ്​മയാനുഭവം സമ്മാനിക്കുന്ന ഈ ഏരിയയിലാണ്​ 20 ലക്ഷം വെള്ളയും മഞ്ഞയും പന്തുകൾ നിറഞ്ഞ ‘ബാൾ പൂൾ’ (പന്തുകളുടെ പൊയ്​ക) ഉള്ളത്​. കുട്ടികളെയും മുതിർന്നവരെയും ഒര​ുപോലെ ആകർഷിക്കുന്ന ഈ പൂളിൽ നിറഞ്ഞുകിടക്കുന്ന ബാളുകൾക്കിടയിൽ ചാടിമറിഞ്ഞും നീന്തിതുടിച്ചും കളിച്ചും ഉല്ലാസത്തിൽ ആറാടാനുള്ള അവസരമാണ്​ ഒരുക്കിയിരിക്കുന്നത്​. മുതിർന്നവർക്കും കുട്ടികൾക്കുമായി ബാൾ പൂൾ രണ്ടായി വിഭജിച്ചിട്ടുണ്ട്​.

മുതിർന്നവർക്കുള്ള പൂളിന്​ ഒരു മീറ്ററും കുട്ടികളുടെ പൂളിന്​ അര മീറ്ററും ആഴമാണുള്ളത്​. റീസൈക്കിൾഡ്​ പ്ലാസ്​റ്റിക്​ കൊണ്ട്​ നിർമിച്ചതാണ്​ ബാളുകൾ. നാടകങ്ങൾ, തത്സമയ കലാ-സാംസ്കാരിക പ്രകടനങ്ങൾ, നൂതന വിനോദ-കായിക-വിനോദസഞ്ചാര ആക്​ടിവിറ്റികൾ, തദ്ദേശീയവും അന്തർദേശീയവുമായ റെസ്​റ്റോറൻറുകൾ, കഫേകൾ, നിരവധി വിസ്​മയകരമായ അനുഭവങ്ങൾ, സാഹസിക പ്രവൃത്തികൾക്കുള്ള ഉപാധികൾ, സംവേദനാത്മക ഗെയിമുകൾ എന്നിവ ഇത്തവണത്തെ ജിദ്ദ സീസൺ ഏരിയകൾ സന്ദർശർക്ക്​ സമ്മാനിക്കുന്നു. ഇതിനോടൊപ്പം ഏറ്റവും പ്രശസ്തമായ അന്താരാഷ്​ട്ര ബ്രാൻഡുകളുടെ ഇഷ്​ട ഉൽപന്നങ്ങൾ സ്വന്തമാക്കാനുള്ള ഷോപ്പിങ്​ ഏരിയകളും ഒരുക്കിയിട്ടുണ്ട്​.

ജിദ്ദ നഗരത്തിലെ വിനോദസഞ്ചാര, ചരിത്ര, സാംസ്കാരിക, സമുദ്ര സാധ്യതകളിൽ മുതലിറക്കി വ്യാവസായിക വളർച്ചക്ക്​ ശ്രമിക്കു​േമ്പാൾ അതിനൊപ്പം തനതായ വിനോദ അനുഭവം സന്ദർശകർക്ക്​ പകർന്ന്​ തദ്ദേശീയ ടൂറിസത്തെ മെച്ചപ്പെടുത്തുകയും ജിദ്ദ സീസൺ ആഘോഷങ്ങളുടെ ലക്ഷ്യമാണ്​.