ഹജ്ജിനായി ലണ്ടനിൽ നിന്ന്​ സൈക്കിളിൽ സൗദിയിലേക്ക്​

റിയാദ്​: ഇത്തവണത്തെ ഹജ്ജിന്​ ബ്രിട്ട​​​​െൻറ തലസ്​ഥാനമായ ലണ്ടനിൽ നിന്ന്​ എട്ടുപേർ സൈക്കിളിൽ എത്തുന്നു. ആറാഴ്​ച നീണ്ടുനിൽക്കുന്ന യാത്ര ഇന്ന്​ ആരംഭിക്കും. യുദ്ധം തകർത്ത സിറിയയിലേക്ക്​ വൈദ്യസഹായം എത്തിക്കുന്നതിന്​ ഒരുദശലക്ഷം പൗണ്ട്​ സമാഹരിക്കുക കൂടിയാണ്​ ഇവരുടെ ലക്ഷ്യം. ഹജ്ജിന്​ കരയാത്ര ചെയ്​ത്​ വരികയെന്ന ആദ്യകാല മുസ്​ലിം പാരമ്പര്യം ഉയർത്തിപ്പിടിക്കുകയാണ്​ തങ്ങളെന്നും സംഘം പറയുന്നു. ഇൗസ്​റ്റ്​ ലണ്ടനിൽ നിന്നാണ്​ സംഘം യാത്ര പുറ​പ്പെടുക. അവിടെ നിന്ന്​ 100 കിലോമീറ്ററോളം യാത്ര ചെയ്​ത്​ തെക്കൻ തുറമുഖ നഗരമായ ന്യൂഹാവനിലേക്ക്​. ഫെറിയിൽ കയറി ഇംഗ്ലീഷ്​ ചാനൽ മറികടന്ന്​ ഫ്രാൻസ്​ തീരത്തെ ദിയപ്​ പട്ടണത്തിലെത്തും.

വീണ്ടും സൈക്കിളിൽ ഫ്രഞ്ച്​ തലസ്​ഥാനമായ പാരീസിൽ. ഏതാണ്ട്​ 200 കിലോമീറ്ററാണ്​ ദിയപ്​^ പാരീസ്​ ദൂ​രം. പാരീസിൽ നിന്ന്​ സ്വിറ്റ്​സർലാൻഡ്​, ജർമനി, ആസ്​ട്രിയ, ലൈഷെൻസ്റ്റൈൻ വഴി ഇറ്റലിയിലേക്ക്​. ഇറ്റലിയിലെ കനാൽ നഗരമായ വെനീസാണ്​ ലക്ഷ്യം. ആയിരം കിലോമീറ്ററിലേറെ ദൂരമുള്ള അതികഠിനമായ പാതയാണ്​ പാരീസ്​-വെനീസ്​. ഗ്രീസിലെ ഇഗുമെനിസ്​റ്റയിലേക്ക്​ ഫെറി കയറാനാണ്​ വെനീസിൽ എത്തുന്നത്​. വടക്ക്​ പടിഞ്ഞാറൻ നഗരമായ ഇഗുമെനിസ്​റ്റയിൽ നിന്ന്​ 450 കിലോമീറ്റർ താണ്ടി തലസ്​ഥാനമായ ഏതൻസിലേക്ക്​. യാത്രയുടെ ഒരു ഘട്ടം ഇവിടെ അവസാനിക്കും. ഇനി യൂറോപ്പിൽ നിന്ന്​ ആഫ്രിക്കയിലേക്ക്​. 

ഏതൻസിൽ നിന്ന്​ വിമാനത്തിൽ ഇൗജിപ്​തി​​​​െൻറ വടക്കൻ പട്ടണമായ അലക്​സാൻഡ്രിയയിൽ. അലക്​സാൻഡ്രിയയിൽ വെച്ച്​ വീണ്ടും സൈക്കിളിൽ കയറി തലസ്​ഥാനമായ കൈറോ വഴി കിഴക്കൻ തീര പട്ടണമായ ഹ​ുർഗാദയിൽ എത്തും. 700 കിലോമീറ്ററിനടുത്താണ്​ ഇൗ വഴിയുടെ ദൂരം. അവിടെ നിന്ന്​ വീണ്ടും ഫെറി. ഫെറിയിൽ സൗദിയിലെ യാമ്പുവിലെത്തും. യാമ്പുവിൽ വൻ സ്വീകരണം ഏറ്റുവാങ്ങുന്ന സംഘം നേരെ 225 കിലോമീറ്റർ യാത്ര ചെയ്​ത്​ മദീനയിലെത്തും. ഏതാണ്ട്​ 3,500 കിലോമീറ്ററിലേറെ സൈക്കിളിൽ തന്നെയാണ്​ ഇവർ യാത്ര ചെയ്യുക. മൊത്തം എട്ടുരാജ്യങ്ങളും. എട്ടുപേരും പ്രഫഷനൽ സൈക്കിളിസ്​റ്റുകളല്ല. യാത്ര ചെയ്യുന്ന രാജ്യങ്ങളിൽ ഇവർക്ക്​ വിവിധ ഗ്രൂപ്പുകൾ സ്വീകരണം നൽകും.

അതാത്​ രാജ്യങ്ങളിലെ സൈക്കിളിങ്​ ഗ്രൂപ്പുകൾ അതിർത്തികൾ വരെ ഇവർക്കൊപ്പം യാത്ര ചെയ്യും. ഇൗയാത്രയിൽ സിറിയൻ ഫണ്ടിനായി ആൾക്കാരിൽ നിന്ന്​ സംഘം സംഭാവനകൾ സ്വീകരിക്കും. ബ്രിട്ടനിലെയും മലേഷ്യയിലെയും ചില സന്നദ്ധ സംഘങ്ങളുടെ പ്രവർത്തനങ്ങൾക്ക്​ ശക്​തി പകരുകയാണ്​ ലക്ഷ്യം. ഇൗ സംഘങ്ങൾ നിലവിൽ 85 ആംബുലൻസുകൾ സിറിയയിലേക്ക്​ അയച്ചിട്ടുണ്ട്​. ഇൗ പ്രവർത്തനം വിപുലമാക്കാനാണ്​ ശ്രമിക്കുന്നത്​.പകൽ യാത്ര ചെയ്യുകയും രാത്രി വിശ്രമിക്കുകയും ചെയ്യുന്ന തരത്തിലാണ്​ യാത്രാപദ്ധതി തയാറാക്കിയിട്ടുള്ളത്​. യാത്ര വിവരങ്ങൾ അനുദിനം പുറംലോകത്തെ അറിയിക്കാൻ വെബ്​സൈറ്റും ആരംഭിച്ചിട്ടുണ്ട്​.