തീർഥാടകർക്ക് സ്​മാർട്ട്​ ഫോണുകളിൽ ബയോമെട്രിക്ക്​ സംവിധാനം

ജിദ്ദ: ഹജ്ജ്,​ ഉംറ തീർഥാടകർക്ക്​ സ്​മാർട്ട്​ ഫോണുകളിലൂടെ വിരലടയാളമടക്കമുള്ള സുപ്രധാന വ്യക്തിഗതവിവരങ്ങൾ സ്വയം രേഖപ്പെടുത്താൻ കഴിയുന്ന ബയോമെട്രിക്​ ആപ്ലിക്കേഷൻ വിദേശകാര്യ മന്ത്രി അമീർ ഫൈസൽ ബിൻ ഫർഹാൻ ഉദ്​ഘാടനം ചെയ്​തു. വിസ, ട്രാവൽ സൊലൂഷൻ കമ്പനി വഴിയാണ്​ ഇത്​ നടപ്പാക്കുന്നത്.

തീർഥാടകർക്ക്​ നൽകുന്ന സേവനങ്ങൾ മികച്ചതാക്കുന്നതിനും നടപടികൾ എളുപ്പമാക്കുന്നതിനുമുള്ള സൽമാൻ രാജാവി​െൻറയും കിരീടാവകാശിയുടെയും നിർദേശത്തെ തുടർന്നാണ്​ ആപ്ലിക്കേഷൻ ഒരുക്കിയത്​.

ഹജ്ജ്​, ഉംറ വിസകൾക്ക്​ അപേക്ഷിക്കുന്നവർക്ക്​ സ്വന്തം രാജ്യങ്ങളിലിരുന്നുതന്നെ തങ്ങളുടെ സ്​മാർട്ട്​ ഫോണിലൂടെ നടപടിക്രമങ്ങൾ പൂർത്തിയാക്കാനും വിരലടയാളമുൾപ്പെടെ ആവശ്യമായ വ്യക്തിഗതവിവരങ്ങൾ രേഖപ്പെടുത്താനും കഴിയും.

ഇതിനായി വിസ നടപടികൾ നടത്തുന്ന കാര്യാലയങ്ങളെ നേരിൽ സമീപിക്കേണ്ട ആവശ്യമില്ല. ബയോമെ​ട്രിക്​​ സംവിധാനത്തി​ലൂടെ രജിസ്​ട്രേഷൻ​ അനുസരിച്ച്​ വിസകൾ ഓൺലൈനിലൂടെ ലഭിക്കും. ഇതോടെ ഉംറ, ഹജ്ജ്​ വിസ നടപടികൾ കൂടുതൽ എളുപ്പമാകും.

ആപ്ലിക്കേഷൻ ഉദ്​ഘാടന ചടങ്ങിൽ ഡെപ്യൂട്ടി വിദേശകാര്യ മന്ത്രി എൻജി. വലീദ്​ ബിൻ അബ്​ദുൽ കരീം അൽഖുറൈജി, എക്​സിക്യൂട്ടിവ്​ കാര്യ അസിസ്​റ്റൻറ്​ അബ്​ദുൽ ഹാദി അൽമൻസൂരി, വിദേശകാര്യാലയത്തിലെ കോൺസുലർ കാര്യ അണ്ടർ സെക്രട്ടറി അംബാസഡർ തമീം അൽദോസരി എന്നിവർ പ​െങ്കടുത്തു.