സൗദിയിൽ നിന്നുള്ള മുട്ടക്കും കോഴിയിറച്ചിക്കും യു.എ.ഇയിൽ വിലക്ക്​

ദുബൈ: പക്ഷിപ്പനി കണ്ടെത്തിയതിനെത്തുടർന്ന്​ സൗദിഅറേബ്യയിൽ നിന്ന്​ കോഴിയിറച്ചിയും മുട്ടയും ഇറക്കുമതി ചെയ്യുന്നത്​ യു.എ.ഇ. നിരോധിച്ചു. എല്ലാത്തരം പക്ഷികളെയും കുഞ്ഞുങ്ങ​െളയും കൊണ്ടുവരുന്നതും ഭക്ഷണത്തിനായോ കുഞ്ഞുങ്ങളെ വിരിയിക്കാനായോ മുട്ടകൾ ഇറക്കുമതി ചെയ്യുന്നതും നിരോധിച്ചിട്ടുണ്ട്​. പരിസ്​ഥിതി, കാലവസ്​ഥാ വകുപ്പാണ്​ ഇത്​ സംബന്ധിച്ച ഉത്തരവ്​ പുറ​െപ്പടുവിച്ചത്​. മാരകമായ എച്ച്​5എൻ8 ഇനത്തിൽ പെട്ട വൈറസാണ്​ റിയാദിൽ വ്യാപിച്ചിരിക്കുന്നത്​. ഇൗ വൈറസ്​ മനുഷ്യരെ ബാധിച്ചതായി സൂചനകളില്ലെന്ന്​ ലോകാരോഗ്യ സംഘടന വ്യക്​തമാക്കിയിട്ടുണ്ട്​. അതേസമയം സമാനമായ എച്ച്​5എൻ6 വൈറസ്​ ചൈനയിൽ പലർക്കും ബാധിച്ചതായി റിപ്പോർട്ടുകളുണ്ട്​. എച്ച്​5എൻ8 മനുഷ്യരെ ബാധിക്കാനിടയില്ലെന്നും എന്നാൽ സാധ്യത തള്ളിക്കളയാനാവില്ലെന്നും ഡബ്ലിയുഎച്ച്​ഒ മുന്നറിയിപ്പ്​ നൽകുന്നു. കുതിരകൾക്കും തിമിംഗലങ്ങൾക്കും വരെ ബാധിച്ചേക്കാവുന്ന തരത്തിലുള്ള പക്ഷിപ്പനി വൈറസുകളെയും കണ്ടെത്തിയിട്ടുണ്ട്​. 1900 ൽ ഇറ്റലിയിലാണ്​ ആദ്യം പക്ഷിപ്പനി കണ്ടെത്തിയത്​. പിന്നീട്​ ഇത്​ ലോകം മുഴുവൻ വ്യാപിക്കുകയായിരുന്നു.