സൗദിയിൽ സംസ്​കരിച്ച തമിഴ്​നാട്​ സ്വദേശിയൂടെ മൃ​തദേഹം പുറത്തെടുത്തു

സ്വന്തം ലേഖകൻ

റിയാദ്: സൗദി അറേബ്യയിൽ രണ്ടുമാസം മുമ്പ്​ സംസ്​കരിച്ച തമിഴ്​നാട്​ സ്വദേശിയുടെ മൃതദേഹം നാട്ടിലെത്തിച്ച്​ ആചാരപ്രകാരം സംസ്​കരിക്കണമെന്ന ബന്ധുക്കളുടെ ആവശ്യപ്രകാരം പുറത്തെടുത്തു. മധ്യപ്രവിശ്യയിലെ ശഖ്‌റയില്‍ അടക്കം ചെയ്ത മധുര തോപ്പുലംപട്ടി സ്വദേശി ആണ്ടിച്ചാമി പളനിസാമിയുടെ (42) മൃതദേഹമാണ് റിയാദ് കെ.എം.സി.സി മലപ്പുറം ജില്ല വെല്‍ഫയര്‍ വിങ്​ പ്രവര്‍ത്തകര്‍ പുറത്തെടുത്ത്​ നാട്ടിലെത്തിക്കാൻ മുന്നിട്ടിറങ്ങിയത്​. ശുമൈസി മോര്‍ച്ചറിയില്‍ സൂക്ഷിച്ചിരിക്കുന്ന മൃതദേഹാവശിഷ്ടങ്ങള്‍ നടപടികള്‍ പൂര്‍ത്തിയാക്കി ഉടൻ നാട്ടിലെത്തിക്കും.

ഇന്ത്യന്‍ എംബസി, ഗവര്‍ണറേറ്റ്, ബലദിയ (മുനിസിപ്പാലിറ്റി), പൊലീസ്, ആശുപത്രി എന്നിവടങ്ങളിലെ ഉദ്യോഗസ്ഥരുടെ സാന്നിധ്യത്തില്‍ ശനിയാഴ്ച വൈകീട്ടാണ് മൃതദേഹം പുറത്തെടുത്തത്. നാട്ടിൽ കൊണ്ടുപോയി ആചാരപ്രകാരം സംസ്​കരിക്കുന്നതിന്​ സൗദിയില്‍ ഇങ്ങനെ പുറത്തെടുക്കുന്ന രണ്ടാമത്തെ ഇന്ത്യക്കാര​െൻറ മൃതദേഹമാണ്​ ഇത്​. സ്വകാര്യ കമ്പനിയില്‍ ജോലി ചെയ്​തിരുന്ന ആണ്ടിച്ചാമിയെ ഈ വർഷം മെയ് 19നാണ് താമസസ്ഥലത്ത്​ മരിച്ചുകിടക്കുന്ന നിലയില്‍ കണ്ടത്.

മൃതദേഹം നാട്ടിലെത്തിക്കുന്നതിനുള്ള നടപടികളുമായി കെ.എം.സി.സി വെല്‍ഫയര്‍ വിങ്​ പ്രവര്‍ത്തകര്‍ മുന്നോട്ട് പോകുന്നതിനിടെ ജൂണ്‍ 16ന് ശഖ്​റയിൽ അടക്കം ചെയ്യുകയായിരുന്നു. നാട്ടില്‍ കൊണ്ടുപോകുന്നതിനുള്ള എൻ.ഒ.സി ഇന്ത്യന്‍ എംബസി ഇഷ്യു ചെയ്യുകയും ചെയ്തിരുന്നു. അതിനിടെയാണ് അടക്കം നടന്നത്.

തുടര്‍ന്ന് മൃതദേഹം നാട്ടിലെത്തിക്കണമെന്ന് ബന്ധുക്കള്‍ ഇന്ത്യന്‍ എംബസിയോട് ആവശ്യപ്പെട്ടു. തുടര്‍ന്ന് എംബസി ഈ വിഷയം കെ.എം.സി.സി വെല്‍ഫയര്‍ വിങ്ങിനെ ഏല്‍പ്പിച്ചു. അവര്‍ റിയാദ് ഗവര്‍ണറേറ്റ്, റിയാദ് പൊലീസ്, മജ്മഅ, ശഖ്‌റ എന്നിവിടങ്ങളിലെ പൊലീസ്, ആശുപത്രി അധികൃതർ, മജ്മഅ ഗവര്‍ണറേറ്റ്, ബലദിയ എന്നിവയുമായി ബന്ധപ്പെട്ടാണ് മൃതദേഹം പുറത്തെടുക്കാനുള്ള അനുമതി നേടിയത്.

​ശുമൈസി ഫോറൻസിക് ഡിപ്പാര്‍ട്ടുമെന്റിലെ അഞ്ച്​ ഉദ്യോഗസ്ഥര്‍, എംബസി ഡത്ത് സെക്ഷൻ ഉദ്യോഗസ്ഥന്‍, ശഖ്​റയിലെ പൊലീസ് ഉദ്യോഗസ്ഥർ, ബലദിയ ഉദ്യോഗസ്ഥര്‍, റിയാദ് ഇന്ത്യൻ എംബസി കമ്യൂണിറ്റി വെല്‍ഫെയര്‍ വളൻറിയറും കെ.എം.സി.സി വെൽഫെയർ വിങ്​ ചെയർമാൻ റഫീഖ് പുല്ലൂർ, വൈസ് ചെയര്‍മാന്‍ റഫീഖ് ചെറുമുക്ക്, വിങ്​ മീഡിയ ചെയർമാൻ സലീം സിയാംകണ്ടം, ഇസ്ഹാഖ് താനൂർ എന്നിവരുടെ നേത്വത്തിലാണ് മൃതദേഹം പുറത്തെടുത്ത് റിയാദിൽ എത്തിച്ചത്. ബാക്കി നടപടികള്‍ പൂര്‍ത്തിയാക്കി ഉടനെ നാട്ടിൽ അയക്കും.

palani swami

ഫോ​ട്ടോ: ആണ്ടിച്ചാമി പളനിസാമി