ആഘോഷം ബോധവത്കരണമാക്കി; പെരുന്നാളിന്​ ശമീർ അലി നടന്നുതീർത്തത് 120 കിലോമീറ്റർ

അബ്ഹ: പെരുന്നാൾ ദിനങ്ങളിൽ ശമീർ അലി നടന്നുതീർത്തത്​ 120 കിലോമീറ്റർ. എല്ലാവരും പലതരത്തിൽ ഈദ് ആഘോഷങ്ങളിൽ മുഴുകിയപ്പോഴാണ്​ ഈ മലയാളി യുവാവ്​ ആരോഗ്യ സംരക്ഷണ ബോധവത്കരണത്തിനായി ജീസാനിലെ ദർബ് മുതൽ ഖമീസ് മുശൈത്ത് വരെ കുത്തനെയുള്ള ചുരം റോഡ് നടന്നുകയറിയത്​. രണ്ട് ദിവസമെടുത്താണ്​ ഇത്രയും ദൂരം പിന്നിട്ടത്​. പെരുന്നാൾ ദിനത്തിൽ രാവിലെ ആറിന് ദർബിൽനിന്ന് തുടങ്ങിയ യാത്ര പിറ്റേദിവസം വൈകീട്ട്​ ഒമ്പതിന്​ ഖമീസ്​ മുശൈത്തിൽ അവസാനിപ്പിച്ചു.

അബഹയിലെ ടിക്ടോക്ക് കൂട്ടായ്മയായ ‘ക്ലൗഡ്‌സ് ഓഫ് അബഹ’ പ്രവർത്തകർ അബഹയിലും ഖമീസിലും സ്വീകരണം ഒരുക്കി. സമൂഹ മാധ്യമത്തിൽ സജീവമായ അലി സഞ്ചാരിയും സാഹസികയാത്ര ഇഷ്​ടപ്പെടുന്നയാളും ആണ്. യാത്രക്കിടെ നിരവധി രാജ്യക്കാരായ പ്രവാസികളും സ്വദേശികളും ആഹാരവും വെള്ളവും നൽകിയതായും പെരുന്നാൾ ദിനം താമസിക്കാൻ സ്ഥലം കണ്ടെത്തി നൽകിയത് പൊലീസ് ഉദ്യോഗസ്ഥരാണെന്നും ശമീർ അലി പറഞ്ഞു.

മലപ്പുറം കിഴിശ്ശേരി സ്വദേശിയായ ശമീർ അലി പന്നികോട്ടിൽ അലിയുടെയും ഹഫ്സത്തി​ന്റെയും മകനാണ്. നജീബയാണ് ഭാര്യ. ഐറിൻ ഷമീർ, അംരിൻ ഷമീർ എന്നിവർ മക്കളാണ്.