സർട്ടിഫിക്കറ്റിൽ ഡിപ്ലോമ ഇല്ല​; നിരവധി നഴ്​സുമാർ പിരിച്ചുവിടൽ ഭീഷണിയിൽ

റിയാദ്​: സർട്ടിഫിക്കറ്റിൽ ഡി​പ്ലോമ എന്നില്ലാത്തതിനാൽ നിരവധി നഴ്​സുമാർ സൗദി അറേബ്യയിൽ പിരിച്ചുവിടൽ ഭീഷണിയിൽ. ഡിപ്ലോമ ഇൻ ജനറൽ നഴ്​സിങ്​ എന്ന സർട്ടിഫിക്കറ്റുള്ളവർക്ക്​ മാത്രമേ ഇനി വർക്ക്​ പെർമിറ്റ്​ ലഭിക്കൂ​ എന്നാണ്​ വിവരം. സൗദി ആരോഗ്യ മന്ത്രാലയത്തി​​​​െൻറ തീരുമാനം നിലവിൽ ഇവിടെ ജോലി ചെയ്യുന്ന നൂറുകണക്കിന്​ ഇന്ത്യൻ നഴ്​സുമാരെ പ്രതികൂലമായി ബാധിക്കും. ജനറൽ നഴ്​സിങ്​ ആൻഡ്​ മിഡ്​വൈഫറി കോഴ്​സ്​ പാസായ ശേഷം സൗദി​യിലെത്തി ജോലി ചെയ്യുന്നവരുടെ വർക്ക്​ പെർമിറ്റ്​ പുതുക്കണമെങ്കിൽ സർട്ടിഫിക്കറ്റിൽ ഡിപ്ലോമ എന്നുണ്ടാവണം. 2005ന് മുമ്പ്​ പാസായവരുടെ സർട്ടിഫിക്കറ്റിൽ ഡിപ്ലോമ എന്നില്ല. ഇതാണ്​ നഴ്​സുമാരെ ആശങ്കയിലാഴ്​ത്തുന്നത്​.

ഇന്ത്യയിലെ അതാത്​ സംസ്ഥാന നഴ്​സിങ്​ ആൻഡ്​ മിഡ്​വൈവ്​സ്​ കൗൺസിലിൽ നിന്ന്​ ലഭിക്കുന്ന സർട്ടിഫിക്കറ്റാണ്​ റിക്രൂട്ടിങ്​ സമയത്ത്​ ഇവർ യോഗ്യത സർട്ടിഫിക്കറ്റായി മന്ത്രാലയത്തിൽ ഹാജരാക്കിയത്​. അതിന്​ അനുസൃതമായി ലഭിച്ച ലൈസൻസിലാണ്​​ ഇൗ കാലം വരെയും ജോലി ചെയ്​തുവന്നതും. എന്നാലിപ്പോൾ ഇൗ നിയമത്തിൽ​ മാറ്റം വരുത്തി എന്നാണ്​ നഴ്​സുമാർക്ക്​ ലഭിക്കുന്ന വിവരം​. ഡിപ്ലോമ ഇല്ലാത്തവരുടേത്​​ പുതുക്കാനിടയില്ല. അങ്ങനെ സംഭവിച്ചാൽ തൊഴിൽ നഷ്​ടപ്പെട്ട്​ നാട്ടിലേക്ക്​ മടങ്ങേണ്ടി വരും. ഇത്തരത്തിൽ സംഭവിക്കാനിടയുള്ള കൂട്ടപിരിച്ചുവിടൽ ഭീഷണിയെ ഗൗരവപൂർവം കാണണമെന്നും പ്രശ്​നപരിഹാരത്തിന്​ അടിയന്തര ഇടപെടൽ നടത്തണമെന്നും ആവശ്യപ്പെട്ട് നഴ്​സുമാർ ഇന്ത്യൻ അധികൃതർക്ക്​ പരാതി നൽകിയിട്ടുണ്ട്​.

വിദേശകാര്യ മന്ത്രി സുഷമ സ്വരാജിന്​ നഴ്​സുമാർ അയച്ച നിവേദനത്തിൽ ഡിപ്ലോമ എന്ന്​ രേഖപ്പെടുത്തിയ പുതിയ സർട്ടിഫിക്കറ്റ്​ നൽകാൻ നഴ്​സിങ്​ കൗൺസിലിനോട്​ ആവശ്യപ്പെടണമെന്നും ഇക്കാര്യം സൗദി ആരോഗ്യമന്ത്രാലയത്തെ ബോധ്യപ്പെടുത്തണമെന്നുമാണ്​ ആവശ്യപ്പെട്ടിരിക്കുന്നത്​. 2005ന്​ ശേഷം ജനറൽ നഴ്​സിങ്​ കോഴ്​സ്​ പാസായവരുടെ സർട്ടിഫിക്കറ്റുകളിലെല്ലാം ഡിപ്ലോമ എന്ന്​ രേഖപ്പെടുത്തിയിട്ടുണ്ട്​. അതിന്​ മുമ്പുള്ള ആരുടേയും സർട്ടിഫിക്കറ്റിൽ ഡി​പ്ലോമ ഇല്ല. പുതുതായി ജോലിക്കെത്തുന്നവരെല്ലാം നഴ്​സിങ്​ ബിരുദമുള്ളവരാണ്​. അതുകൊണ്ട്​ തന്നെ നിയമത്തിലെ ഇൗ മാറ്റം ബാധിക്കുക നിരവധി വർഷങ്ങളായി ജോലി ചെയ്യുന്ന സീനിയർ നഴ്​സുമാരെ തന്നെയാവും. സൗദി ആരോഗ്യമന്ത്രാലയത്തിന്​ കീഴിൽ മാത്രമല്ല സ്വകാര്യമേഖലയിൽ ജോലി ചെയ്യുന്ന ജനറൽ നഴ്​സുമാർക്കും ഇത്​ പ്രതികൂലമാണ്​.

രൂക്ഷമായേക്കാവുന്ന ഇൗ പ്രതിസന്ധിയിൽ അടിയന്തര ഇടപെടൽ ആവശ്യപ്പെട്ട്​ പ്രവാസി സംഘടനകളും രംഗത്തെത്തിയിട്ടുണ്ട്​. ജിദ്ദ നവോദയ ഇൗ വിഷയം കേരള നഴ്​സിങ്​ അസോസിയേഷൻ, മുഖ്യമന്ത്രി, ആരോഗ്യ മന്ത്രി എന്നിവരുടെ ശ്രദ്ധയിൽപെടുത്തി​. ജിദ്ദയിലെ ഇന്ത്യൻ കോൺസൽ ജനറൽ നൂർ റഹ്​മാൻ ശൈഖിന്​ നിവേദനം നൽകുകയും ചെയ്​തു. കേരള ബി.ജെ.പി എൻ.ആർ.​െഎ സെൽ സൗദി ഘടകം സുഷമ സ്വരാജിന്​ പരാതി നൽകിയതായി ഭാരവാഹി ബാബു കല്ലുമല അറിയിച്ചു.