പന്ത്രണ്ട്​ വയസ്സിനു മുകളിൽ പ്രായമുള്ള കുട്ടികൾ ഉംറക്കെത്തി തുടങ്ങി

ജിദ്ദ: 12 വയസ്സിനു മുകളിൽ പ്രായമുള്ള വാക്​സിനെടുത്ത കുട്ടികൾ ഉംറക്കെത്തി തുടങ്ങി. ഇരുഹറം കാര്യാലയമാണ്​ 12 നും 18 നുമിടയിൽ പ്രായമുള്ളവരെ മസ്​ജിദുൽ ഹറാമിൽ സ്വീകരിക്കുന്ന വീഡിയോ പുറത്തുവിട്ടത്​.

കോവിഡിനെ തുടർന്ന്​ ആരോഗ്യ സുരക്ഷ മുൻകരുതലായി ഏകദേശം ഒന്നര വർഷത്തോളമായി 18 വയസ്സ്​ വരെ പ്രായമുള്ളവർക്ക്​ ഇരുഹറമുകളിലും പ്രവേശിക്കുന്നതിനും ഉംറക്കും സിയാറത്തിനും വിലക്ക്​ ഏർപ്പെടുത്തിയിട്ടുണ്ടായിരുന്നു​​​​. അടുത്ത ദിവസമാണ്​​ 12 വയസ്സിനു മുകളിലുള്ളവരും​ കോവിഡ്​ പ്രതിരോധ കുത്തിവെപ്പെടുത്തവരുമായവർക്ക്​ കൂടി ഇരുഹറമുകളിൽ പ്രവേശനത്തിനു അനുമതി നൽകിയത്​. തീരുമാനം വന്നതോടെ നിരവധി കുട്ടികളാണ്​ രക്ഷിതാക്കളോടൊപ്പം മസ്​ജിദുൽ ഹറാമിൽ ഉംറക്കും നമസ്​കരിക്കാനുമെത്തിയത്​.