പടിഞ്ഞാറൻ മേഖലയിൽ കനത്ത പൊടിക്കാറ്റ്​; ഗതാഗതം തടസപ്പെട്ടു

ജിദ്ദ: രാജ്യത്തെ വിവിധ മേഖലകളിൽ ഇന്നലെ ശക്​തമായ പൊടിക്കാറ്റ്​ വീശി. വടക്ക്​ പടിഞ്ഞാറൻ മേഖലകളിലാണ്​ കൂടുതൽ ആഘാതമുണ്ടായത്​. ഇതിനൊപ്പം ചൂടും വർധിച്ചു. പല റോഡുകളിലും ദൂരക്കാഴ്​ച കുറഞ്ഞു. കാ​ഴ്​ച മങ്ങിയതിനെ തുടർന്ന്​ ജിദ്ദ - മക്ക എക്​സ്​പ്രസ്​ റോഡിൽ 12 ലേറെ വാഹനങ്ങൾ ​കൂട്ടിയിച്ചു. സംഭവത്തിൽ രണ്ടുപേർക്ക്​ പരിക്കേറ്റു​. അപകടത്തെ തുടർന്ന്​ 15 മിനിറ്റോളം റോഡിൽ ഗതാഗതം തടസ്സപ്പെട്ടു. പൊലീസെത്തി ബദൽ സംവിധാനം ഉണ്ടാക്കിയ ശേഷമാണ്​ ഗതാഗതം പുനഃസ്​ഥാപിച്ചത്​. 

കാറ്റ്​ ശക്​തമായതിനെ തുടർന്ന് 11.30 ഒാടെ​ ജിദ്ദ പോർട്ടിലെ കപ്പലുകളുടെ പോക്കുവരവ്​ നിർത്തിവെച്ചു.  എന്നാൽ വ്യോമഗതാഗതത്തെ ബാധിച്ചിട്ടില്ലെന്ന്​ വിമാനത്താവള ഒാഫീസ്​ വ്യക്​തമാക്കി. മക്ക മേഖലയിലും പകൽ കനത്ത പൊടിക്കാറ്റ്​ അനുഭവപ്പെട്ടു. ​വ്യാഴം രാവിലെ മുതൽ പൊടിക്കാറ്റിനു സാധ്യതയു​ണ്ടെന്ന്​ കാലാവസ്​ഥ വിഭാഗം നേരത്തെ മുന്നിറിയിപ്പ്​ നൽകിയിരുന്നു. ഇതേ തുടർന്ന്​ അതാതു മേഖല ഗവർണർറ്റേുകളും ബന്ധപ്പെട്ട വകുപ്പുകളും ആവശ്യമായ മുൻകരുതലെടുത്തു. തബൂക്കിൽ ആശുപത്രികൾക്കും മെഡിക്കൽ സെ​ൻററുകൾക്കും ​ആരോഗ്യകാര്യാലയം ജാഗ്രതാ നിർദേശം നൽകി. വടക്കൻ മേഖലകളിൽ കാലാവസ്​ഥ വ്യതിയാനം കാരണം ആ ഭാഗങ്ങളിലേക്കും തിരിച്ചുമുള്ള യാത്ര വൈകുമെന്ന്​ വിമാന കമ്പനികളും യാത്രക്കാരെ എസ്​.എം.എസ്​ വഴി അറിയിച്ചിരുന്നു. ചില മേഖലകളിൽ വിദ്യാഭ്യാസ സ്​ഥാപനങ്ങൾക്ക്​ അവധിയും നൽകി. വ്യാഴം രാത്രി എട്ട്​ മണിവരെ ജിദ്ദ, ഖുലൈസ്​, ബഹ്​റ, അസ്​ഫാൻ എന്നിവിടങ്ങളിൽ പൊടിക്കാറ്റുണ്ടാകുമെന്ന്​ കാലാവസ്​ഥ വകുപ്പും അറിയിച്ചിരുന്നു.