സൗദി ദേശീയ ദിനാഘോഷത്തിന്​ വർണപകി​ട്ടേകി വെടിക്കെട്ട്

ജിദ്ദ: സൗദി അറേബ്യയുടെ 92-ാമത്​ ദേശീയ ദിനാഘോഷത്തിന്​ വർണപകിട്ടും മാസ്മകരിക ശബ്ദവുമേകി കമ്പക്കെട്ടും. രാജ്യത്തെ 18 നഗരങ്ങളിലാണ്​​ വിവിധതരം കരിമരുന്ന് പ്രയോഗങ്ങളിലൂടെ ആകാശത്ത്​ വർണവിസ്​മയങ്ങൾ തീർത്തത്​.

'ഇത്​ നമ്മുടെ വീടാണ്​' എന്ന മുദ്രാവാക്യത്തിന്റെ അകമ്പടിയിൽ പൊതുവിനോദ അതോറിറ്റി സംഘടിപ്പിച്ച ദേശീയദിനാഘോഷത്തിലെ പ്രധാന പരിപാടികളിലൊന്നായിരുന്നു വെടിക്കെട്ട്​. ദേശീയ ദിനമായ വെള്ളിയാഴ്ച രാത്രി ഒമ്പതിനാണ്​ വെടിക്കെട്ട്​ ആരംഭിച്ചത്​. അഞ്ച്​ മുതൽ 15 മിനുറ്റ്​ വരെ നീണ്ടുനിന്നു മാനത്ത് മാരിവില്ലഴക് വിരിയിച്ച കമ്പക്കെട്ട്. മാനത്ത് ആയിരക്കണക്കിന് നക്ഷത്രങ്ങൾ പൊട്ടിവിരിഞ്ഞു. പൂവാടികൾ വിരിഞ്ഞുനിറഞ്ഞു. പച്ച വസ്ത്രം ധരിച്ചും സൗദി പതാക ഉയർത്തിയും 'ഇത് ഞങ്ങളുടെ വീടാണ്' എന്ന എന്നെഴുതിയ ബാനറുകൾ വഹിച്ചും നിരവധി കുടുംബങ്ങളും കുട്ടികളും വിവിധ ​നഗരങ്ങളിലെ വെടിക്കെട്ടുകൾ കാണാനെത്തിയിരുന്നു.

വെടിക്കെട്ട്​ കാഴ്​ചകൾ മൊബൈൽ കാമറകളിൽ പകർത്തി സമൂഹമാധ്യങ്ങളിലൂടെ പ്രചരിപ്പിക്കാൻ അവർ മത്സരിച്ചു. കൂടാതെ ദേശീയ ദിനത്തിൽ വൈവിധ്യമാർന്ന മറ്റ്​ പരിപാടികൾക്കും പ്രദർശനങ്ങൾക്കും സൗദിയിലെ എല്ലാ നഗരങ്ങളും സാക്ഷ്യം വഹിച്ചു.

എയർഷോകൾ, പാരമ്പര്യ നാടൻ കലകളുടെ പ്രദർശനം, പൈതൃകം, കരകൗശല വസ്​തു പ്രദർശനങ്ങൾ, കവിത സയാഹ്​നങ്ങൾ തുടങ്ങി ഡസൻ കണക്കിന് പരിപാടികളാണ്​ രാജ്യത്തിന്റെ വിവിധ ഭാഗങ്ങളിൽ അരങ്ങേറിയത്​. രാജ്യത്തിന്റെ പൈതൃകം ആഘോഷിക്കാൻ ഏറ്റവും പുതിയ ശബ്ദ, വെളിച്ച സാങ്കേതികവിദ്യകൾ ഉൾക്കൊള്ളുന്ന ഇൻട്രാക്ടീവ് പ്ലാറ്റ്‌ഫോമുകളും പരിപാടികളും ഉൾപ്പെടുത്തിയിരുന്നു. ദേശീയദിനാഘോഷ പരിപാടികൾ സെപ്​റ്റംബർ 26 വരെ തുടരും.

ഫോട്ടോ: സൗദി ദേശീയദിനാഘോഷത്തിന്റെ ഭാഗമായി നടന്ന വെടിക്കെട്ട്